မဲခေါင်၊ ဒီဇင်ဘာ ၂၃
ဥရောပအပါအဝင် ကမ္ဘာက ၇ နှစ်စာ အချိန်ယူရမည့် ဘောလုံးပြိုင်ပွဲကို PNO က တစ်လကျော်ဖြင့် ကျင်းပနိုင်ခဲ့သဖြင့် လီဗားပူးအသင်းကပါ နောင်ကားဘောလုံးပွဲကို အံ့ဩခဲ့သည်ဟု ဥက္ကဌ ခွန်စံလွင်က ဆိုသည်။
ကမ္ဘာတွင် ဘောလုံးပြိုင်ပွဲများကို နှစ်စဉ် အသင်း ၂၀ ဖြင့်သာ ကျင်းပလေ့ ရှိသော်လည်း PNO ၏ နောင်ကား ဘောလုံးပွဲသည် အကြီးတန်း ၁၄ သင်း၊ အငယ်တန်း ၁၂၉ သင်း စုစုပေါင်း အသင်း ၁၄၀ကျော်ရှိသည်ဟု ခွန်စံလွင်က နောင်ကား ဘောလုံးပွဲဖွင့်ပွဲတွင် ပြောသည်။
“နိုင်ငံတကာနှင့် ဥရောပ ဘောလုံးအသင်းတွေမှာ ဆိုရင် တစ်နှစ်ပတ်လုံးမှ အသင်း ၂၀ ဖြစ်တဲ့အတွက်ကြောင့် ကျွန်တော်တို့အနေနဲ့ ဆိုရင် ဒါ ၇ နှစ်စာကို တစ်လကျော်သာ အတွင်းမှာ ကျင်းပတာ ဖြစ်ပါတယ်။”ဟု ၎င်းက ဆိုသည်။
ထို့ကြောင့် နောင်ကားဘောလုံးပွဲသည် အသင်းလည်း များသဖြင့် အင်္ဂလန်ရှိ လီဗာပူးအသင်းကပါ အံ့ဩ ချီးကျုးခဲ့ရကြောင်း ၎င်းက ပြောသည်။
“ဥရောပအထင်ကရ အင်္ဂလန်လက်ရွေးစင် ဘောလုံးအသင်းဖြစ်တဲ့ လီဗာပူးအသင်းဟာ ကာလတစ်ခု ၂၀၀၂ ဝန်းကျင်မှာ ကျွန်တော်တို့ ဒေသကို ရောက်ရှိပြီးတော့မှ ကျွန်တော်တို့ ဘောလုံးပြိုင်ပွဲကို အားပေး ချီးမြှင့်ခဲ့တာ ဖြစ်ပါ တယ်။ သူတို့ အံ့လည်းအံ့ဩတယ် အသင်းလည်း များတယ် ပရိသတ်လည်း များတယ် “ဟု ၎င်းက ဖွင့်ပွဲတွင် ပြောသည်။
ယခုနှစ်တွင် ကျင်းပသည့် နောင်ကားဘောလုံးပွဲကို လီဗာပူးအသင်းက လာရောက်ချင်သော်လည်း ဒီဇင်ဘာကာလ ဖြစ်သည့်အတွက် မလာရောက်နိုင်ခြင်း ဖြစ်ပြီး ခရစ္စမတ် ဆုတောင်းပေးခဲ့သည်ဟုလည်း ၎င်းက ဆိုသည်။
လက်ရှိတွင် တောင်ကြီးမြို့နယ်၊ နောင်ကားကျေးရွာ၌ PNO ဥက္ကဌဖလား ပြိုင်ပွဲကို ကျင်းပနေပြီး ကျေးရွာ အချို့တွင် ဘောလုံးပွဲအတွက် ဟုဆိုကာ ငွေကြေး ကောက်ခံနေမှုလည်း ရှိသည်။
PNO ပြည်သူ့စစ်ခေါင်းဆောင်နှင့် PNO ပါတီ ဥက္ကဌလည်း ဖြစ်သူ ခွန်စံလွင်သည် စစ်ကောင်စီ အကြံပေးအဖွဲ့တွင် ပါဝင်သဖြင့် အမျိုးသားညီညွတ်ရေးအစိုးရ – NUG က အကြမ်းဖက်သမားအဖြစ် ကြေညာခံထားရသူ ဖြစ်သည်။
#MeKongNews
#ဘောလုံးပွဲ
#PNO
#တစ်လကျော်
#လီဗာပူး
#ခွန်စံလွင်
