မဲခေါင်၊ ဒီဇင်ဘာ ၁၈
တောင်ကြီးအခြေစိုက် ရှမ်းပြည် ဗုဒ္ဓကလျာဏယုဝအသင်း – YMBA ဥက္ကဌ ဦးစိုင်းရီကျော်မှ စစ်ကောင်စီကျင်းပမည့် ရွေးကောက်ပွဲအား ဂုဏ်ပြုသည့်အနေဖြင့် သွေးလှူဒါန်းပွဲ ကျင်းပခဲ့သော်လည်း အသင်းသားများကို ဘာသာရေးကို ခုတုံးလုပ်သည်ဟု ယူဆသဖြင့် တစ်ယောက်မျှ ပါဝင်သွေးလှူခြင်းမရှိခဲ့ကြောင်း သိရသည်။
ဒီဇင်ဘာ ၁၆ ရက်နေ့က တောင်ကြီးမြို့၊ မိခင်နှင့်ကလေးဆေးရုံတွင် ကျင်းပခဲ့ခြင်းဖြစ်ပြီး အသင်းသားများ ပါဝင်လှူဒါန်းခြင်းမရှိသည့်အတွက် ၎င်း၏နီးစပ်ရာ ဆွေမျိုးမိတ်ဆွေများ၊ နိုင်ငံရေးပါတီအချို့မှ ပုဂ္ဂိုလ်များကသာ သွေးလှူခဲ့ကြောင်း YMBA အသင်းနှင့် နီးစပ်သည့် သတင်းရင်းမြစ်များထံမှ သိရသည်။
“သူ့(ဦးစိုင်းရီကျောက်) လုပ်ရပ်တွေ အမျိုး၊ ဘာသာ၊ သာသနာ၊ ယဉ်ကျေးမှုခေါင်းစဉ်တပ်ပြီး လုပ်နေတာတွေက စစ်တပ်ကို မျက်နှာလုပ်၊ ဖားတာတာမျိုးတွေ များလာလို့ပါ။ အခုလာမယ့် ရွေးကောက်ပွဲအတွက် အစိုးရကို မျက်နှာလိုချင်လို့ သူ့အင်အားနဲ့ အသုံးပြုတာပါ” ဟု အသင်းဝင်များနှင့် နီးစပ်သူတစ်ဦးက ပြောသည်။
YMBA အသင်းသားများထဲတွင် သွေးလှူဒါန်းမည့်သူ မရှိသဖြင့် ရှမ်းပြည်တွင်း ဝင်ရောက်ယှဉ်ပြိုင်မည့် ပါတီစုံမှ အသင်းဝင် သွေးအလှူရှင်အနည်းငယ်ဖြင့်သာ ပြုလုပ်ခဲ့ရပြီး လက်ခံရရှိသည့် သွေးအိတ်အရေအတွက်ကိုလည်း မထုတ်ပြန်ခဲ့ကြောင်း နီးစပ်သူများထံမှ သိရသည်။
ဦးစိုင်းရီကျောက်မှာ YMBA အသင်းအမည်ကို အသုံးချကာ စစ်တပ်ကို မျက်နှာချိုသွေးခြင်း၊ ကိုယ်ကျိုးစီးပွား ဖော်ဆောင်ရန်ကြိုးပမ်းခြင်းများကြောင့် အသင်းဝင်များနှင့်လည်း အဆင်မပြေကြောင်း နီးစပ်သူများက ပြောသည်။
ဦးစိုင်းရီကျောက်သည် ပြီးခဲ့သည့် ဩဂုတ်လအတွင်း ပြုလုပ်သည့် စစ်ကောင်စီဇာတ်ညွှန်းရေးသည့် မဟာမိတ်တပ်များ ရှမ်းများမှ ထွက်ခွာပေးရေး လုပ်ဇာတ်ဆန္ဒပြပွဲများကိုလည်း တောင်ကြီးမြို့တွင် ဦးဆောင်ပြုလုပ်ခဲ့ခြင်းဖြစ်သည်။
ယခင်နှစ်များက ရှမ်းပြည်နယ် ဗုဒ္ဓကလျာဏယုဝအသင်း(YMBA) အနေနှင့် သာမန်သွေးလှူပွဲများသာ ကျင်းပပြုလုပ်လေ့ရှိသော်လည်း ယခုနှစ်မှ ဥက္ကဌ ဦးစိုင်းရီက ၎င်းတစ်ဦးတည်းသဘောဖြင့် စစ်ကောင်စီမှ ကျင်းပမည့် ပါတီစုံ အထွေထွေရွေးကောက်ပွဲအား ထောက်ခံသည့် သွေးလှူဒါန်းပွဲဟု ဆိုကာ ပြုလုပ်ခြင်းဖြစ်ကြောင်း သိရသည်။
မှတ်ချက် – ပုံဟောင်းအသုံးပြုထားသည်။
ပုံအညွှန်း – ၂၀၂၅ ခုနှစ်၊ ဖေဖော်ဝါရီလ ၉ရက်က တောင်ကြီး YMBA မှ ပြည်ထောင်စုနေ့ အထိမ်းအမှတ် သွေးလှူနေပုံ
#MeKongNews
#YMBA
#သွေးလှူ
#ဗုဒ္ဓကလျာဏယုဝအသင်း
#တောင်ကြီး
