မဲခေါင်၊ ဒီဇင်ဘာ ၁၂
တော်လှန်ရေး အောင်မြင်သည်အထိ ပြည်ထောင်စုသွေးချင်း တော်လှန်ရေး အင်အားစုနှင့် လက်တွဲသွားမည်ဟု ပအိုဝ်းအမျိုးသား ဖက်ဒရယ်ကောင်စီ – PNFC နှင့် ပအိုဝ်းအမျိုးသား လွတ်မြောက်ရေးအဖွဲ့ချုပ် – PNLO တို့က ပူးတွဲ ကြေညာသည်။
ပဒေသရာဇ် စနစ်ဆိုးကို ဆန့်ကျင် တော်လှန်ရန် စတင် ဆင်နွှဲခဲ့သော ပအိုဝ်းတော်လှန်ရေးနေ့သည် ဒီဇင်ဘာ ၁၁ရက်တွင် ၇၆ နှစ်မြောက် အထိမ်းအမှတ် အဖြစ် ယင်းအဖွဲ့အစည်းများက ထုတ်ပြန်ခဲ့ခြင်း ဖြစ်သည်။
“မတရား ဖိနှိပ်ချုပ်ချယ်တဲ့ စနစ်ဆိုးတွေကို လက်ရှိ တော်လှန်ရေးနဲ့ အတူတူ ပူးတွဲပြီး လုပ်ဆောင်သွားဖို့၊ ပအိုဝ်းလူမျိုးများ အနေနဲ့လည်း မတရားဖိနှိပ်တဲ့ စနစ်ဆိုးတွေကို တော်လှန်ခဲ့တာကို သတိဝင်စေပြီးတော့ ကျနော်တို့ ခေါင်းဆောင်ဟောင်းတွေ ချမှတ်ခဲ့တဲ့ လမ်းစဥ်တွေကိုလည်း ပြန်လည် လျှောက်လှမ်းဖို့၊ ဒါတွေကိုလည်း မျိုးဆက်သစ် အင်အားစု၊ မျိုးဆက်သစ် လူငယ်တွေ အနေနဲ့လည်း တကယ့်စစ်မှန်တဲ့ လွတ်မြောက်မှု၊ စစ်မှန်တဲ့ တရားမျှတမှုတွေရဖို့ ဆက်လက် ပူးပေါင်းတော် လှန်သွားကြဖို့ တိုက်တွန်းပါတယ်”ဟု PNFC ၏ အတွင်းရေးမှူး ၁ ခွန်ဦးက မဲခေါင်သို့ ပြောသည်။
စစ်ကောင်စီ အာဏာ တည်မြဲရေးနှင့် ၎င်းတို့ ကျူးလွန်ခဲ့သော စစ်ရာဇဝတ်မှုများ၊ လူသားမျိုးနွယ် အပေါ် ကျူးလွန်သော ရာဇဝတ်မှုများ ဖုံးကွယ် ဖျောက်ဖျက်နိုင်ရန် သေနတ်ထောက် ကျင်းပမည့် တရားမဝင် ရွေးကောက်ပွဲကို ဆန့်ကျင်ပြီး ကန့်ကွက် ရှုံ့ချကြောင်းလည်း ထုတ်ပြန်ချက်တွင် ပြောထားသည်။
ထို့ပြင် ဒီဇင်ဘာ ၁၀ ရက်တွင် ရခိုင်ပြည်နယ်၊ မြောက်ဦးမြို့ရှိ ပြည်သူ့ဆေးရုံကြီးကို ရည်ရွယ်ချက်ရှိရှိ လေကြောင်းမှ ဗုံးကြဲတိုက်ခိုက် ကျူးလွန်မှုအား ပြင်းပြင်းထန်ထန် ကန့်ကွက် ရှုံ့ချကြောင်းလည်း ဆိုထားသည်။
ထို့နောက် ပအိုဝ်းဒေသ အပါအဝင် မြန်မာနိုင်ငံ နေရာအနှံ့အပြားမှ အပြစ်မဲ့ ပြည်သူများကို နေ့စဉ် ပစ်မှတ်ထား တိုက်ခိုက်နေသော စစ်ကောင်စီနှင့် စစ်အုပ်စုများကို နိုင်ငံတကာက လက်ပိုက် ကြည့်မနေဘဲ ဝိုင်းဝန်းထိန်းကျောင်း အပြစ်ပေး အရေးယူကြရန်လည်း ထုတ်ပြန်ချက်တွင် တောင်းဆိုထားသည်။
#MeKongNews
#တော်လှန်ရေး
#သွေးချင်းအင်အားစု
#PNFC
#PNLO
