မဲခေါင်၊ ဒီဇင်ဘာ ၁၁
ရှမ်းပြည်မြောက်ပိုင်း၊ နမ့်ဖတ်ကာ၌ လင်မယား ၂ ဦးကို ဓားဖြင့် ခုတ်သူတစ်ဦးအား TNLA ရဲတပ်ဖွဲ့က ၆ ရက် အကြာတွင် ဖမ်းမိကြောင်း ဒေသ သတင်းအရင်းအမြစ်အရ သိရသည်။
ယင်းဖြစ်စဉ်မှ ကျူးလွန်သူကို ဒီဇင်ဘာ ၈ ရက်တွင် ဖမ်းမိခြင်းဖြစ်ပြီး ၎င်းမှာ နမ့်ဖတ်ကာ ရပ်ကွက်(၁)တွင် နေထိုင်သည့် မဂွန်းအားတန် ဆိုသူဖြစ်ကြောင်း သိရသည်။
ဒီဇင်ဘာ ၂ ရက်၊ ညနေ ၄ နာရီခန့်တွင် နမ့်ဖတ်ကာ ကျေးရွာအုပ်စု၊ လွယ်ကန်ကျေးရွာ လယ်ကွင်းအနီး၌ ဦးအေးလိုင်နှင့် ဒေါ်အီမေးတို့နှစ်ဦးအား ဓားဒဏ်ရာများဖြင့် လဲကျနေသည်ကို ရွာသားများက တွေ့ရှိခဲ့ခြင်း ဖြစ်သည်။
“ဓားနဲ့ခုတ်ခံရတဲ့ ဦးအေးလိုင်က ဘယ်ပါး ဒဏ်ရာကြီးတယ်၊ ဒေါ်အီမေးက လက်ပြတ်တယ်၊ ဒဏ်ရာကြီးလို့ နမ့်ဖတ်ကာ ဆေးရုံကနေ ကွတ်ခိုင်ကို ပြောင်းကုနေတယ်။ ဒေါ်အီမေး ပြောတာက သူတို့ကို အင်္ကျီအနက်ရောင် နဲ့ ပြောက်ကျားဘောင်းဘီ ဝတ်ထားတဲ့ အမျိုးသားတစ်ဦးက ဓားနဲ့ ခုတ်သွားတာလို့ ဖြေတယ်”ဟု ဒေသခံတစ်ဦးက ပြောသည်။
ယင်းအမှုနှင့် ပတ်သက်ပြီး မသင်္ကာသူများကို TNLA ရဲတပ်ဖွဲ့က ဖမ်းဆီးခဲ့သော်လည်း နောက်ပိုင်းတွင် ပြန်လွှတ် ပေးခဲ့ပြီးနောက် နမ့်ဖတ်ကာ အရပ်ဘက် အုပ်ချုပ်ရေးအဖွဲ့များက TNLA ရဲတပ်ဖွဲ့နှင့်အတူ တရားခံကို ဝိုင်းဝန်းဖော်ထုတ် ဖမ်းဆီးမိခဲ့ကြောင်း သိရသည်။
“ ထင်းခိုးခုတ်ရာက စတာပဲ၊ အကြမ်းဖျဥ်း ပြောရရင်တော့ လူမျိူးရေး ဆိုရမလားပဲ။ ဒီမှာက ကချင်၊ ပလောင်တွေ ရောနှော နေထိုင်နေကြတာ”ဟု နမ့်ဖတ်ကာ နေသူတစ်ဦးက ပြောသည်။
ယင်းဖြစ်ရပ်မျိုး ယခုနှစ် အတွင်းမှာပင် ကွတ်ခိုင်၌ တစ်ကြိမ်၊ မိုင်းယူး၌ တစ်ကြိမ်နှင့် ယခု နမ့်ဖက်ကာတွင် တစ်ကြိမ် ဖြစ်ပွားခဲ့ရာ အမျိုးသားတစ်ဦး သေဆုံးပြီး သုံးဦး ဒဏ်ရာ ပြင်းထန်ခဲ့သည်ဟု ၎င်းက ပြောသည်။
နမ့်ဖတ်ကာသည် ၁၀၂၇ စစ်ဆင်ရေး နောက်ပိုင်း လူမျိုးပေါင်းစုံ ပါဝင်သော အရပ်ဘက်အုပ်ချုပ်ရေး ယန္တရားကို ဖွဲ့ စည်းကာ မြို့ပြစီမံကိန်းကို ဖော်ဆောင်နေသော ကျေးရွာဖြစ်ကြောင်း သိရသည်။
#MeKongNews
#နမ့်ဖတ်ကာ
#လင်မယား
#ဓားဖြင့်ခုတ်
#TNLA
