မဲခေါင်၊ ဒီဇင်ဘာ ၁၀
စစ်ကောင်စီ လက်အောက်ခံ PNO ပြည်သူ့စစ်က ပအိုဝ်းဒေသအားကျော်လွန်ကာ ကရင်နီပြည်ဘက်သို့ ကျူးကျော် ထိုးစစ်ဆင်တိုက်ခိုက်နေသဖြင့် လွိုင်ကော်မြို့နယ် လွိုင်လင်လေးမြို့အနီးတွင် နေ့စဉ်တိုက်ပွဲဖြစ်ပွားနေသည်ဟု ကရင်နီစစ်ရေးသတင်းရင်းမြစ်များထံမှ သိရသည်။
PNO ပြည်သူ့စစ်သည် အင်အားအများအပြားသုံးကာ ရှမ်းပြည်မှ ကရင်နီပြည်အတွင်းသို့ ထိုးစစ်ဆင်လာခြင်းဖြစ်ပြီး ၎င်းတို့ကို တော်လှန်ရေးတပ်ဖွဲ့များက ပူးပေါင်းတိုက်ခိုက်သဖြင့် အကျအဆုံးလည်းများပြားနေသည်ဟု သတင်းရင်းမြစ်တစ်ဦးက ပြောသည်။
ရှမ်းပြည် ဆီဆိုင်မြို့နယ်မှ ကရင်နီပြည် လွိုင်ကော်မြို့နယ် လွိုင်လင်လေးမြို့ဘက်သို့ PNO ပြည်သူ့စစ်မှ ကျူးကျော်လာခြင်းကြောင့် နိုဝင်ဘာလမှစတင်ပြီး ယနေ့အထိ တိုက်ပွဲဖြစ်ပွားနေလျက်ရှိသည်။
“တိုက်ပွဲက နေ့တိုင်းလိုလိုဖြစ်တယ်။ PNO နဲ့ စကမ ပေါင်းပြီး ရွာတွေဘက်ကို ပစ်ခတ်တာ စစ်ကြောင်းထိုးတာတွေ ရှိနေတယ်။ အသေအကျများပေမယ် လူတွေထပ်ဖြည့်ပြီး ထိုးနေတာတွေ့ရတယ်” ဟု ကရင်နီစစ်ရေးသတင်းရင်းမြစ်တဦးကပြောသည်။
ပြီးခဲ့သည့် နိုဝင်ဘာလတွင် လွိုင်ကော်မြို့နယ်အတွင်း စစ်ကြောင်းထိုးသည့် စစ်ကောင်စီနှင့် PNO ကို တော်လှန်ရေးတပ်ဖွဲ့က တိုက်ခိုက်ခဲ့ရာ စစ်ကော်မရှင်နှင့် PNO အများအပြားသေဆုံးပြီး လက်နက် ၂၂ လက် သိမ်းဆည်းခဲ့ရသေးသည်။
ကရင်နီပြည်ကို ဝင်ရောက်တိုက်ခိုက်နေသည့်အကြောင်းကို စစ်ကောင်စီလက်အောက်ခံ PNO ပြည်သူ့စစ်ကလည်း ၎င်းတို့၏ ဝါဒဖြန့်ချီသည့် လူမှုကွန်ယက်စာမျက်များတွင် ဖော်ပြထားသည်ကိုတွေ့ရသည်။
လွိုင်ကော်မြို့နယ် ထီးစဲခါးတောင်ဘက် လွိုင်လင်လေးဘက်တွင် ဒီဇင်ဘာ ၁ ရက်နေ့မှ ၄ ရက်နေ့အထိ PNO နှင့်တော်လှန်ရေးအဖွဲ့များ နေ့တိုင်းတိုက်ပွဲဖြစ်ပွားနေသည်ဟု ပအိုဝ်းဘာသာဖြင့် ဒီဇင်ဘာ ၉ ရက် နံနက်တွင် ဝါဒဖြန့်ချီထားသည်ကိုတွေ့ရသည်။
“PNO ပြည်သူ့စစ်နဲ့ ပဒေါင်(မူရင်းအသုံးအနှုန်း)တွေ အခုလက်ရှိ လွိုင်လင်လေးဘက်မှာ တိုက်ပွဲဖြစ်နေတယ်။ ၁ ရက်နေ့ကနေ ဒီနေ့အထိ နေ့တိုင်းတိုက်ပွဲဖြစ်နေတယ်လို့ PNO က ပအိုဝ်းဘာသာနဲ့ သတင်းတင်တာပါ” ဟု PNO ပြည်သူ့စစ်၏ ဝါဒဖြန့်ချီမှုကို ဘာသာပြန်ပေးသည့် ပအိုဝ်းလူငယ်တဦးက ပြောသည်။
တိုက်ပွဲအတွင်း သေဆုံးမှုများပြားသဖြင့် PNO ပြည်သူ့စစ်သည် ဒီဇင်ဘာ ၄ ရက်နေ့တွင် နောင်ကားကျေးရွာနှင့် နောင်ပစ်ကျေးရွာတွင် လူထပ်မံစုဆောင်ပြီး ကရင်နီပြည်ဘက်သို့ ပို့ဆောင်ခဲ့သည်။
“နောင်ကားနဲ့ နောင်ပစ်မှာ လူစုပြီး ကရင်နီဘက်ကို ထပ်ပို့တာ အများကြီးပဲ ကားအစီး ၃၀ ကျော် ရှိတယ်။ဖိုးဝီးကားတွေကော ကင်တာကားတွေကော။ ၁၀ ရက်သင်တန်း တက်ထားတဲ့သူတွေလည်း ပါတယ်။ သင်တန်းမတက်ဖူးတဲ့သူတွေလည်း ပါတယ်။ ကရင်နီဖက်ကို အင်အားဖြည့်ရမယ်ဆိုပြီး ခေါ်သွားတာ” ဟု ဒေသခံသတင်း ပအိုဝ်းလူငယ်သတင်းရင်းမြစ်ကပြောသည်။
စစ်ကော်မရှင်လက်အောက်ခံ PNO ပြည်သူ့စစ်သည် ယခင်တွင် တော်လှန်ရေးတပ်ဖွဲ့ဖြစ်ခဲ့ဖူးသော်လည်း ဦးအောင်ခမ်းထီဦးဆောင်ကာ ၂၀၀၉ ခုနှစ်တွင် စစ်တပ်လက်အောက်ခံ ပြည်သူ့စစ်အဖြစ် အသွင်ပြောင်းခဲ့ပြီး လက်ရှိတွင်လည်း စစ်ကောင်စီနှင့်အတူ ကရင်နီပြည်ကို ကျူးကျော်ကာ တော်လှန်ရေးတပ်ဖွဲ့များကို တိုက်ခိုက်လျက်ရှိသည်။
#MeKongNews
#PNO
#ထိုးစစ်
#လွိုင်ကော်
#တိုက်ပွဲဖြစ်
