မဲခေါင်၊ ဒီဇင်ဘာ ၉
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းလေးဒေသတွင် ငလျင်ဒဏ်သင့် ပြည်သူများအား စစ်ကောင်စီက ထောက်ပံ့မှုကို အုပ်ချုပ်ရေးမှူးနှင့် နီးစပ်သူများသာ ရကြောင်း ဒေသခံများထံမှ သိရသည်။
သစ်သားအိမ်ဖြစ်ပြီး အကုန် ပြိုကျပျက်စီးသော နေအိမ် ကျပ်သိန်း ၁၈၀၊ သစ်သားတစ်ထပ်အိမ် သိန်း ၁၂၀ နှင့် ယိုင်သွားသောအိမ်ကို သိန်း ၈၀ ထောက်ပံ့ကြေး ပေးနေကြောင်း ဒေသခံများက ပြောသည်။
“အုပ်ချုပ်ရေးမှူးတွေ၊ ရွာသူကြီးတွေ၊ ဆယ်အိမ်ခေါင်းတွေရဲ့ အမျိုးတွေပဲ ရတယ်၊ ရွာမှာ ဘာရာထူးမှမရှိ မဖားတတ်ရင် အိမ်အလုံးလိုက် ပြိုလည်း ပိုက်ဆံကရမှာ မဟုတ်ဘူး။ ရချင်လို့တော့ မဟုတ်ဘူး စာရင်း လာကောက်တုန်းက တိတိကျကျ ဒီလောက်ရမယ် ပြောပြီးမှ ပိုက်ဆံ ထုတ်ချိန်ကျ သူတို့တွေပဲ ထုတ်သွားတယ်၊ သူတို့ အမျိုးတွေပဲ ရတယ်။ တကယ် ခက်ခဲတဲ့သူက မရဘူး ရတဲ့သူကျတော့ NGO အဖွဲ့လာလည်း သူတို့ပဲ ဘယ်အဖွဲ့ပဲ လာလာ သူတို့ပဲ ရနေတာ”ဟု အင်းလေး ဒေသခံတစ်ဦးက မဲခေါင်သို့ ပြောသည်။
အုပ်ချုပ်ရေးအဖွဲ့ဝင် မဟုတ်သည့် သာမာန်ရွာခံများမှာ အိမ်ပျက်စီးမှု အပေါ်မူတည်၍ ကျပ်သိန်း ၃၀၊ ၁၂ သိန်း၊ ၆ သိန်း စသဖြင့်သာ ရရှိကြကြောင်း ဆိုသည်။
ထို့ပြင် ရသည့်ပမာဏကို အခြား သူများအား မပြောရန်၊ ပြဿနာ မရှာရန်နှင့် လူမှုကွန်ရက်ပေါ် မတင်ကြရန်လည်း ကျေးရွာ အုပ်ချုပ်ရေးမှုများက ဖိအားပေးထားကြောင်း ဒေသခံများက ပြောသည်။
“တချို့ဆို အိမ်လည်းမပျက်ဘူး၊ အလှူငွေယူပြီး ကုန်းပေါ်မှာ အိမ်ဝယ် ကားဝယ်နိုင်ကြတယ်။ အဲလို လူတွေကြောင့် တကယ်ခံစားရတဲ့ ပြည်သူတွေ အရမ်းနစ်နာတယ်။ ထွေအုပ်ရုံးလူကြီးရယ် အုပ်ချုပ်ရေးမှူးတွေ၊ ရာအိမ်မှူးတွေက ပေါင်းပြီး ဝေစားမျှစားပဲ လုပ်နေတာ၊ အထက်လူကြီးများ ကွင်းဆင်းပြီးတော့ လေ့လာပြီး အရေးယူစေချင်ပါတယ် “ဟု နောက်ဒေသခံတစ်ဦးက မဲခေါင်သို့ ပြောသည်။
မတ် ၂၈ ရက်တွင် လှုပ်ခတ်ခဲ့သော အင်အားပြင်း ငလျင်ကြောင့် အင်းလေးဒေသတွင် လူနေအိမ် ၃ ထောင် ကျော် ပျက်စီးသွားပြီး ၂၀၀ ကျော် သေဆုံးခဲ့ကြောင်း ဒေသခံများထံမှ သိရသည်။
#MeKongNews
#အင်းလေး
#ငလျင်ဒဏ်သင့်
#ထောက်ပံ့ကြေး
#အုပ်ချုပ်ရေး
