မဲခေါင်၊ ဒီဇင်ဘာ ၆
ရှမ်းပြည်တောင်ပိုင်း၊ ပင်လောင်းမြို့နယ်၊ လုံးနဂါးပတ်ရွာ အနောက်ဘက်တွင် ပအိုဝ်းပြည်သူ့စစ် – PNO တပ်သားများက ဘိန်းမဲချက်နေကြောင်း ဒေသခံ သတင်းရင်းမြစ်များထံမှ သိရသည်။
ယင်းကို PNO မှ ဦးနေဝင်းထွန်း လက်အောက်ရှိ တပ်သားများက ဦးဆောင်နေပြီး နဂါးပတ်ရွာခံများနှင့် ပင်လောင်းမြို့၊ တောင်ကြီးမြို့တို့မှ သူဌေးများက ရှယ်ယာ ဝင်ထားကြောင်း ဒေသခံများက ဆိုသည်။
“သူတို့ချက်နေတာ ၃/၄နှစ်ရှိပြီ။ မနှစ်တော့ ရှုံးကြတယ်။ ဒီနှစ်လည်း ချက်နေတယ်။ ရှယ်ယာဝင်တဲ့ လူတွေကလည်း တကယ့် PNO နဲ့ နီးစပ်တဲ့လူတွေ ပအိုဝ်းသူဌေးတွေ”ဟု ဒေသခံတစ်ဦးက မဲခေါင်သို့ ပြောသည်။
ပင်လောင်း၊ ဟိုပုံး၊ စံကားနှင့် ဖယ်ခုံထွက် ဘိန်းများကို PNO က ဝယ်ယူပြီး ယင်းနေရာတွင် ချက်ကြကြောင်း ၎င်းက ဆက်ပြောသည်။
PNO သည် ဒေသခံများ ဘိန်းစိုက်လျှင် ဆက်ကြေး ကောက်သည့်အပြင် ဒေသခံများ၏ ဘိန်းစိမ်းကို ပြန်ဝယ်ရာတွင်လည်း ငွေအကုန်မချေဘဲ WY ဆေးပြားဖြင့် တစ်ဝက် ပေးချေကြောင်း ဒေသခံများက ပြောသည်။
ယင်းဒေသ၌ ဘိန်းမဲတစ်ကီလို ကျပ် ၆ သိန်းကျော်ရှိပြီး ဘိန်းမဲနှင့် ဓာတုပစ္စည်းများ ရောစပ် ချက်လုပ်သည့် ဟွမ်ဖီးဟု ခေါ်သည့် နံပါတ် ၃ မူးယစ်ဆေးဝါးမှာ ဈေးကွက်များတွင် အရည်အသွေးအလိုက် တစ်ကီလို ကျပ်သိန်း ၇၀ မှ ၈၀ အထိ ပေါက်ဈေးရှိသည်။
“တချို့ ရွာဆိုရင် PNOနဲ့ စကားလက်ခံထားတာ ရှိတယ်။ ဘိန်းပေါ်ချိန် သူတို့ဆီပဲ ရောင်းရမယ် ပြီးရင် ငွေနဲ့ ၈၀ ရာခိုင်နှုန်း လက်ခံရမယ်။ ၂၀ ရာခိုင်နှုန်းကျ ဆေးပြား လက်ခံရမယ်ဆိုပြီး အပေးအယူ လုပ်ထားတာရှိတယ်။ အဲလိုတွေကြောင့် ဒေသခံတွေက အေးအေးဆေးဆေး စိုက်ပျိုးနိုင်တယ်။ ရဲ၊ စစ်သား လာဖျက်မှာကိုလည်း မကြောက်ရတော့ဘူး”ဟု ဒေသခံတစ်ဦးက မဲခေါင်သို့ ပြောသည်။
ပင်လောင်းတောင်ဖက်နှင့် အနောက်ဖက် ကျေးရွာအများစုသည် စစ်အာဏာ သိမ်းပြီးနောက် ဘိန်းကို အဓိက စိုက်ပျိုးကြပြီး မိုးရာသီနှင့် ဆောင်းရာသီတွင် ရေသွင်း၍ တစ်နှစ်နှစ်ကြိမ် စိုက်ပျိုးကြကြောင်း ဒေသခံများထံမှ သိရသည်။
#MeKongNews
#PNO
#ပင်လောင်း
#ဘိန်းချက်
#လုံးနဂါးပတ်ရွာ
