မဲခေါင်၊ ဒီဇင်ဘာ ၅
ရှမ်းပြည်၊ တောင်ကြီးမြို့လယ်ရှိ ပြည်နယ်အားကစားကွင်းကို နိုင်ငံတကာအဆင့်မီ အားကစားကွင်း၊ အားကစားရုံ နှင့် ရေကူးကန်၊ လူငယ်ရေးရာ စင်တာများ တည်ဆောက်သွားမည့် စီမံကိန်းအတွက် ကွင်းပတ်လည်ရှိ တိုက်ခန်း၊ ဆိုင်ခန်းများ အားလုံး စတင် ဖယ်ရှားရန် အားကစားနှင့် ကာယပညာဦးစီးဌာနက ဒီဇင်ဘာ ၃ ရက် ရက်စွဲဖြင့် ကြေညာဖြစ်သည်။
ယင်းကြေညာစာတွင် စီမံကိန်းအတွက် ဆိုင်ခန်းများ ဖယ်ရှားမည်ဖြစ်ပြီး ယခုလမှစ၍ ဆိုင်ခန်းခများ မကောက်ခံ တော့ကြောင်း အသိပေးထားသည်။
ယင်းကို ဆိုင်ခန်းများအား ကြိုတင် အသိမပေးဘဲ ရုတ်တရက် ကြေညာခဲ့ခြင်း ဖြစ်၍ ဆိုင်ခန်းပိုင်ရှင်များ လုံးဝ လက်မခံနိုင် ဖြစ်နေကြပြီး ဆိုင်များ ဖျက်သိမ်းခံရပါက မည်သို့ ဆက်လက် ရပ်တည်ရမည်ကို မတွေးတတ်တော့ကြောင်း ဆိုင်ခန်းပိုင်ရှင်များက ပြောသည်။
“ရုတ်တရက်ကြီးဗျာ ပြီးတော့ ချက်ခြင်းအမြန်ရွှေ့ရမယ်ဆိုတော့ ဘာလုပ်လို့ ဘာကိုင်ရမှန်းမသိဘူး ဖြစ်နေတာ၊ ဘဝတွေ ပျက်ကုန်ပြီ။ အခြား နေရာတွေ ရွှေ့ရဖို့ကလည်း တန်ဖိုး ထောင်ချီနေတာ ဘယ်လိုမှ အဆင်မပြေနိုင်တော့ဘူး” ဟု ဆိုင်ခန်းပိုင်ရှင်တစ်ဦးက မဲခေါင်သို့ ပြောသည်။
ယင်းနေရာမှ ဖယ်ရှားပေးရမည့် ဆိုင်ခန်းပေါင်း ၁၆၂ ဆိုင်ရှိပြီး ဘောလုံးကွင်း မြောက်ဘက် မျက်နှာစာတွင် စားသောက်ဆိုင်များ၊ တောင်ဘက်နှင့် အနောက်ဘက်တွင် ကားပစ္စည်းဆိုင်များရှိပြီး အရှေ့ဘက်တွင် အပျောက်စနစ်ဖြင့် ရောင်းထားသည့် ၄ ထပ်၊ ၆ ခန်းတွဲ အငြိမ်းစား ဝန်ထမ်းအိမ်ရာ ရှိကြောင်းသိရသည်။
“မနေ့က အစည်းအဝေးမှာတော့ ဆိုင်ခန်းတွေအပေါ်ရပ်တည်နေရတဲ့ မိသားစုဘဝအခြေအနေတွေပါ ပြောကြတယ်။ အစားထိုးပေးဖို့တော့ ဝန်ကြီးချုပ် အစည်းအဝေးကပဲ ဆုံးဖြတ်နိုင်မယ် ပြောတယ်၊ ဖြစ်နိုင်ခြေက အဝေရာ မီးပုံးပျံကွင်းဘက်နဲ့ ဟိုပုံးဘက်အထွက် ကားကြီးဝင်းဘက် ပြန်ချပေးနိုင်တယ်လို့ သိရတယ်။ မူလ နေရာကိုတော့ ပြန်မရနိုင်တော့ဘူး၊ ပဲခူးနဲ့ မန္တလေးဘက် စီမံကိန်းတွေ တုန်းကတော့ အစားထိုး ပြန်ပေးတယ် ပြောတယ်။ ရွှေ့ရမှာတော့ ၆ လအတွင်းလို့ ဆိုတယ်”ဟု ဆိုင်ခန်းရှင်များနှင့် နီးစပ်သူတစ်ဦးက မဲခေါင်သို့ ပြောသည်။
ယခုကဲ့သို့ ဆိုင်ခန်းများ ဖယ်ရှားခိုင်းနေသည့်အတွက် ဘောလုံးကွင်း အရှေ့ရှိ လွတ်လပ်ရေးကျောက်တိုင်ကွင်းပါ ပျောက်ကွယ်သွားမည်ကို တောင်ကြီး ဒေသခံများက စိုးရိမ်နေကြသည်။
“အခု လွတ်လပ်ရေးနေ့ကို မီးပုံပျံကွင်းမှာပဲ သွားကျင်းပနေပြီး မူလ အခြေပြုရာ ကျောက်တိုင်က မျက်ကွယ်ပြုခံနေရတာ။ အရင်က ကျောက်တိုင်းကွင်းမှာ အခမ်းအနားတွေ လုပ်ခဲ့တယ်။ ခုတော့ ဖျက်မလား၊ ဘာလား မသိပါဘူး” ဟု မြို့ခံတစ်ဦးက ပြောသည်။
ယခုစီမံကိန်းမှာ စစ်ခေါင်းဆောင်၏ တိုက်ရိုက်အမိန့်ဟု သတင်းထွက်နေပြီး စီမံကိန်းကို ၎င်း၏သမီးဖြစ်သူက ရုရှားအကူအညီဖြင့် ဆောက်လုပ်မည်ဟု သတင်းထွက်နေကြောင်း၊ အားကစားကွင်း ရှေ့ဘက် ၄ ထပ် ၆ခန်းတွဲများမှာမူ အပျောက်စနစ်ဖြင့် အပိုင်ဝယ်ယူထား၍ မည်သို့ ပြုလုပ်ပေးမည်ကို မသိရသေးကြောင်း တိုက်ခန်းပိုင်ရှင်များထံမှ သိရသည်။
“စစ်ခေါင်းဆောင်ရဲ့တိုက်ရိုက်အမိန့်နဲ့ လို့ကြားတယ်။ နိုင်ငံတော်အဆင့်ဖြစ်ပြီး ဒီစီမံကိန်းကိုလည်း သူ့သမီးက ရုရှား အကူအညီနဲ့လုပ်မှာတဲ့။ တိုက်ခန်းတွေက အပိုင်ဆိုပေမယ့် ဘယ်လိုလုပ်ပေးမယ် မသိရသေးဘူး”ဟု တိုက်ခန်း ပိုင်ရှင်နှင့် နီးစပ်သူတစ်ဦးက မဲခေါင်သို့ ပြောသည်။
ယင်းဘောလုံးကွင်းမှာ တောင်ကြီးမြို့သမိုင်းနှင့်အတူ တည်ရှိလာခဲ့ပြီးနောက် ၁၉၉၄ ခုနှစ် ကျောင်းသား အားကစားပွဲတော် ရန်ပုံငွေရရှိရန် ဆိုင်ခန်းများကို ရောင်းချခဲ့ခြင်းဖြစ်ရာ နှစ်ပေါင်း ၃၀ ကျော် သက်တမ်းရှိပြီ ဖြစ်ကြောင်း သိရသည်။
#MeKongNews
#တောင်ကြီး
#အားကစားကွင်း
#ဆိုင်ခန်းများ
#ဖယ်ခိုင်း
