မဲခေါင်၊ ဒီဇင်ဘာ ၂
မိုးကုတ်နှင့် မိုးမိတ်မြို့ကို စစ်ကောင်စီထံ ပြန်ပေးလိုက်ရသည့် အပေါ် တအာင်းအမျိုးသားလွတ်မြောက်ရေး တပ်မတော် – TNLA ဗိုလ်ချုပ်တားဘုန်းကျော်က အနူးအညွတ် တောင်းပန်ကြောင်း ပြောသည်။
ဒီဇင်ဘာ ၁ ရက် ညသန်းခေါင်တွင် လူမှုကွန်ရက်စာမျက်နှာ မှတစ်ဆင့် ‘မိုးကုတ်ဋီကာ’ ခေါင်းစဉ်တပ်ကာ ရေးသည့်ပို့စ်တွင် ၎င်းက တောင်းပန်ခဲ့ခြင်းဖြစ်သည်။
“ပထမဆုံး တကယ် ပေးဆပ်နစ်နာသူတွေကို တောင်းပန်ချင်ပါတယ်။ ရင်ထဲလှိုက်လှိုက်လှဲလှဲ နာကျင်ရတာမို့ အနူးအညွတ်တောင်းပန်ပါတယ်။”ဟု ၎င်းက ပြောသည်။
တအာင်းနိုင်ငံရေး၏ ပန်းတိုင်တစ်ခုမှာ မိုးကုတ်မြို့ကို တအာင်းပြည်နယ်ထဲ ပြန်ပါအောင် ကြိုးပမ်းရေးဖြစ်ပြီး မိုးကုတ်သည် တအာင်းလူမျိုး လက်ထဲ ပြန်ရောက်ရမည်ဟု ရည်မှန်းထားကြောင်းလည်း ၎င်းက ပြောသည်။
“အခုတော့ လက်ထဲရောက်တဲ့ ကိတ်မုန့်ကို မစားရဘဲ ပုတ်ချခံလိုက်ရသလိုမျိုး အသည်းကွဲရပါတယ်။ ကံမကုန် သေးရင်တော့ ကြိုးစားသူအတွက် ရလာဒ်ရှိစမြဲလို့ ယုံကြည်ပါတယ်။”ဟု ၎င်းက ပြောသည်။
TNLA အနေဖြင့် ကျည်ဆံနှင့် ဘတ်ဂျက်ငွေ မရှိတော့ခြင်းကြောင့် မိုးကုတ်နှင့် မိုးမိတ်ကို ပေးရခြင်းဖြစ်ကြောင်းလည်း ၎င်းက ဆိုသည်။
“ကျည်မရှိ၊ ဘတ်ဂျတ်မရှိ၊ သေစရာလူသူလည်း နည်းလာတော့ မိုးကုတ် – မိုးမိတ်နဲ့ ညှိပြီး အပစ်ရပ်ရတယ်။ ပွဲကမပြီးသေးပါဘူး”ဟု ၎င်းက ရေးသားထားသည်။
၁၀၂၇ စစ်ဆင်ရေးတွင် TNLA သည် မဟာမိတ်များနှင့် ပေါင်းပြီး မြို့ ၁၂ မြို့ကို သိမ်းပိုက်နိုင်ခဲ့သည်။
သို့သော် စစ်ကောင်စီထိုးစစ်ကြောင့် ၂၀၂၅ ခုနှစ်တွင် နောင်ချို၊ သီပေါ၊ ကျောက်မဲမြို့ကို ပြန်လည် လက်လွှတ်ခဲ့ရသည်။
ထို့နောက် အောက်တိုဘာလတွင် တရုတ် ကြားဝင်စွက်ဖက်မှုဖြင့် မိုးကုတ်နှင့် မိုးမိတ်မြို့ကို စစ်ကောင်စီထံ ပြန်လည် ပေးအပ်ကာ အပစ်ခတ်ရပ်စဲခဲ့သည်။
အပစ်ရပ်ပြီးနောက် စစ်ကောင်စီတပ်သည် TNLA ၏ လုံခြုံရေးပေးမှုဖြင့် နိုဝင်ဘာ ၂၉ ရက်တွင် မိုးကုတ်နှင့် မိုးမိတ်မြို့တွင်းသို့ ပြန်လည် ဝင်ရောက်လာခဲ့သည်။
ထို့သို့ ဝင်လာပြီးနောက် စစ်ကောင်စီတပ်သည် မြို့ထဲမှ မြို့ပြင်ဘက်သို့ စစ်ကြောင်းထိုး လှုပ်ရှားလာသဖြင့် နိုဝင်ဘာ ၃၀ ရက်မှ စတင်ကာ ပြည်သူ့ကာကွယ်ရေးတပ်ဖွဲ့ – PDFနှင့် တိုက်ပွဲ ပြင်းထန်နေသည်။
ထို့ပြင် မြို့တွင်း တပ်စွဲနေသည့် စစ်ကောင်စီတပ်သည် လက်နက်ကြီးများဖြင့် ရမ်းသန်း ပစ်ခတ်နေသည်။
#MeKongNews
#မိုးကုတ်
#TNLA
#ဗိုလ်ချုပ်တားဘုန်းကျော်
#တောင်းပန်
