မဲခေါင်၊ နိုဝင်ဘာ ၂၉
ရှမ်းပြည်တောင်ပိုင်း၊ ညောင်ရွှေမြို့နယ်၊ ကျောက်ရေအိုး – အမက ကျောင်းဆုပေးပွဲအတွက် ဟုဆိုကာ ကျောင်းအုပ်ကြီးနှင့် ကျောင်းကော်မတီများက ငွေကောက်ခံနေခြင်းကြောင့် ရွာခံများ အခက်အခဲ ဖြစ်နေကြကြောင်း ဒေသခံများက ပြောသည်။
ယင်းငွေကောက်ခံမှုကို နိုဝင်ဘာ ဒုတိယပတ်တွင် စတင်ခဲ့ပြီး ဆုပေးပွဲမတိုင်မီ ဒီဇင်ဘာ ၁၀ ရက်တွင် နောက်ဆုံးထား ထည့်ရန်လည်း ပြောထားကာ ကျောင်းသားရှိအိမ်ကို ၄၅၀၀၀ ကျပ်နှင့် မရှိသည့်အိမ်ကို ၃၅၀၀၀ ကျပ်ဖြင့် ကောက်ခံနေကြောင်း ၎င်းတို့က ပြောသည်။
“ဒီပမာဏက တစ်နေ့လုပ်တစ်နေ့စား ကျောင်းသားမိဘအတွက် အရမ်းအဆင်မပြေ ဖြစ်ရပါတယ်၊ ကလေးတွေ ပညာရေးကို အားမပေးတာတော့ မဟုတ်ပါဘူး။ အဆင်မပြေတဲ့ ကာလမှာဆိုတော့ ပွဲကိုခမ်းခမ်းနားနား မဟုတ်ဘဲ တင့်တယ်ဆိုရုံလေးပဲ လုပ်စေချင်ပါတယ်”ဟု ဒေသခံတစ်ဦးက မဲခေါင်သို့ ပြောသည်။
ထို့ပြင် ယင်းကျေးရွာတွင် ကျောင်းသားတစ်ဦးအတွက် အချိန်ပိုကြေး တစ်လစာ တစ်သောင်းကျပ်လည်း ထည့်ရပြီး ပအိုဝ်းပြည်သူ့စစ် – PNO၏ စစ်စရိတ်အတွက် တစ်လ ၃၀၀၀၀ ကျပ် နှင့် စစ်ကောင်စီ၏ စစ်မှုထမ်းစရိတ်အတွက် တစ်လ တစ်သောင်းကျပ်လည်း လစဉ် ထည့်ပေးရကြောင်း ၎င်းက ဆက်ပြောသည်။
“အခုက အလုပ်တွေလည်း သိပ်အဆင်မပြေကြဘူး။ အကောက်အခွန်လည်း လစဉ်လစဉ် ပုံမှန်ရှိတယ်၊ မထည့်ရင်လည်း သားသမီးတွေ မျက်နှာငယ်မှာ ပတ်ဝန်းကျင်တွေ ပြောမှာစိုးလို့ နေ့စားခကို အရင်ကြိုယူပြီး ထည့်ရတာရှိတယ်။ တချို့ဆို ချေးငှားပြီး ထည့်ရတယ်”ဟု ဒေသခံတစ်ဦးက မဲခေါင်သို့ ပြောသည်။
ကျောက်ရေအိုးရွာသည် အေးသာယာ – ညောင်ရွှေ သွားရာလမ်းတွင်ရှိပြီး ပအိုဝ်း၊ တောင်ရိုးနှင့် အင်းသား တိုင်းရင်းသားအများစု နေထိုင်ကြကြောင်း ဒေသခံများထံမှ သိရသည်။
ညောင်ရွှေ၌ လက်ရှိတွင် PNO က မဲဆွယ် စည်းရုံးနေသော်လည်း ၎င်းတို့ ဆက်ကြေးများကို ဆက်ကောက်နေဆဲ ဖြစ်ကြောင်းဆိုသည်။
#MeKongNews
#ညောင်ရွှေ
#ကျောင်းဆုပေးပွဲ
#ကျောက်ရေအိုး
#ရွာခံများ
