မဲခေါင်၊ နိုဝင်ဘာ၂၈
ရှမ်းပြည်တောင်ပိုင်း၊ မိုင်းနောင်မြို့နယ်အတွင်းရှိ ကျားဖြန့်များကို စစ်ကောင်စီတပ်များက ဖမ်းဆီးခဲ့ရာ တရုတ်နိုင်ငံသား ၂၆ ဦး အပါအဝင် နိုင်ငံသား ၈ ဦးနှင့် စုစုပေါင်း ၃၄ ဦး ကိုလက်နက်ခဲယမ်းများ၊ လုပ်ငန်းသုံးပစ္စည်းများနှင့်အတူ ဖမ်းမိခဲ့ကြောင်း စစ်ကောင်စီ၏ သတင်းအရ သိရသည်။
ကျားဖြန့်များနှင့်အတူ MA-1 သေနတ် တစ်လက်၊ MA-13 သေနတ် တစ်လက်၊ AK-12 သေနတ် တစ်လက်၊ ကာဘိုင် သေနတ် တစ်လက်၊ WICHESTER 12 V သေနတ် တစ်လက်၊ ၉ မမကျည် ၁၀ တောင့်၊ 12 V ကျည် ၂တောင့်၊ ၉ မမကျည်အိမ် ၁ ခု၊ AK ကျည်အိမ် ၁ ခုနှင့် ကာဘိုင်ကျည်အိမ် ၁ ခုတို့ကို သိမ်းဆည်းရမိခဲ့သည်ဟု သိရသည်။
ယင်းဖမ်းဆီးမှုကို ပြီးခဲ့သည့် နိုဝင်ဘာ ၂၄ ရက်မှ ၂၆ ရက်အတွင်း မိုင်းနောင်မြို့နယ် နောင်တောက်ကျေးရွာ၊ကောင်းဟိုင်းကျေးရွာနှင့်ဝမ်ကျောင်းကျေးရွာများအနီးတွင် ပြုလုပ်ခဲ့ခြင်းဖြစ်ကြောင်း သိရသည်။
စစ်ကောင်စီက ထိုသို့ အဖမ်းပြသော်လည်း မိုင်းနောင်၊ ကျေးသီး တစ်ကြောတွင် ကျားဖြန့်များစွာ ကျန်နေသေးကြောင်း မိုင်းကိုင်ဒေသခံတစ်ဦးက ပြောသည်။
“အဲဒီ မိုင်းနောင်၊ မိုင်းကိုင်၊ ကျေးသီး တစ်ကြောလုံး ၇၅၈ နေရာတွေပဲ။ အဲဒီ မိုင်းနောင်၊ နောင်တောက်နဲ့ မိုင်းကိုင်က မိုင်းခွန်အုပ်စု ဟွေရုပ်နဲ့ ကပ်နေတာ၊ ခုက နဲနဲပဲ အဖမ်းပြတာ၊ ကျားဖြန့်တွေအများ ကြီးကျန်သေးတယ်” ဟု ၎င်းက မဲခေါင်သို့ ပြောသည်။
၎င်းပြောသည့် ၇၅၈ မှာ အရှေ့အလယ်ပိုင်းတိုင်းစစ်ဌာနချုပ်(ခိုလန်)လက်အောက်ခံ ပြည်သူ့စစ်တပ်မဟာ (၇၅၈) ဖြစ်ပြီး ယခင်က RCSS အဖွဲ့၏ လက်အောက်ခံ တပ်မဟာ တစ်ခု ဖြစ်ခဲ့သော် လည်း ၂၀၀၆ ခုနှစ်၌ RCSS မှ ခွဲထွက်ကာ စစ်အစိုးရထံ လက်နက်ချခဲ့သည့် အဖွဲ့ဖြစ်သည်။
၂၀၀၈ ဖွဲ့စည်းပုံ ပေါ်ပေါက်လာသည့်နောက်ပိုင်း ပြည်သူ့စစ်အဖွဲ့ အဖြစ် ပြောင်းလဲ ဖွဲ့စည်းခဲ့ပြီးယင်း ပြည်သူ့စစ် တပ်မဟာ ၇၅၈ မှာ စစ်ကောင်စီ၏ တိုက်ရိုက်ကွပ်ကဲမှုအောက်တွင်ရှိနေကြောင်း သိရသည်။
လက်ရှိ ယင်း ၇၅၈ ကို အုပ်ချုပ်သူမှာ တပ်မဟာမှူး ဦးဒေါန(ခေါ်)ဦးအောင်ညွန့်ဖြစ်ပြီး ၎င်း၏သားဖြစ်သူ ဗိုလ်စိုင်းဆေစင်က ကျားဖြန့်လုပ်ငန်းများကို ဦးစီးနေကြောင်း ဒေသခံများထံမှ သိရသည်။
အခြားနေရာများမှ ရောက်ရှိလာသည့်အွန်လိုင်း ငွေလိမ် ကျားဖြန့်လုပ်ငန်းများသည် ရှမ်းပြည်တောင်ပိုင်းရှိ မိုင်းရှူး၊ မိုင်းနောင်၊ လဲချား၊ ခိုလမ်နှင့် ကွန်ဟိန်း မြို့နယ်များ အကြားရှိ တောတောင်များအတွင်း၌ ပြည်သူ့စစ်အဖွဲ့များ၏ အကာအကွယ်ဖြင့် လုပ်ငန်းများ ဆက်လက်ကြီးထွားလာနေကြကြောင်း ဒေသခံများက ပြောသည်။
#MeKongNews
#ကျားဖြန့်
#ရှမ်းပြည်
#မိုင်းနောင်
#ပြည်သူ့စစ်
ဓာတ်ပုံ – စစ်ကောင်စီ
