မဲခေါင်၊ နိုဝင်ဘာ ၂၀
ကိုးကန့်တပ်ဖွဲ့ – MNDAA ၏ စစ်သုံ့ပန်း ဖြစ်ခဲ့ဖူးသူ စစ်ကောင်စီ ကွန်ပျူတာနှင့် နည်းပညာသိပ္ပံကျောင်းအုပ် ဗိုလ်မှူးချုပ်သန့်ထင်စိုးသည် ရှမ်းပြည်တောင်ပိုင်း၊ ဟိုပုံး – မိုင်းပွန်လမ်းမကြီးပေါ်တွင် စစ်ဆေးရေးဂိတ်ဖွင့်ကာ ကုန်တင်ယာဉ်များထံမှ ငွေတောင်းကြမ်းနေကြောင်း သတင်းရင်းမြစ်များက ပြောသည်။
ယင်းဂိတ်ကို ၎င်းကိုယ်တိုင်ဦးစီးကာ သင်တန်းကျောင်းရှေ့ လမ်းမကြီးပေါ်တွင် ဖွင့်လှစ် စစ်ဆေးနေခြင်းဖြစ်ပြီး ကုန်တင်ယာဉ်များထံမှ ငွေတောင်းကြမ်းနေခြင်း ဖြစ်သည်။
ယင်းဂိတ်သည် ဖြတ်သန်းသွားလာသည့် ပြည်သူများကို မတရားစစ်ဆေးသည့်အပြင် ကုန်တင်ယာဉ်များကို ငွေတောင်းခြင်း၊ ယာဉ်များကိုဖမ်းဆီးကာ ငွေဖြင့်ပြန်လည်ရွေးခိုင်းများ ပြုလုပ်နေကြောင်း ယာဉ်ပိုင်ရှင်များက ပြောသည်။
“သူတို့ ကျောင်းဝင်ပေါက်ရှေ့က လမ်းမပေါ်မှာ ခုံချပြီးစစ်ဆေးတာ ကျောင်းအုပ်ဆိုတဲ့ သန့်ထင်စိုးငတိကိုယ်တိုင် လာထိုင်တာလည်း တွေ့ရတယ်။ အဓိက ငွေတောင်းချင်တာ စစ်ခံရပြီဆိုတာနဲ့ ငွေကအနည်းနဲ့အများ ပေးရပြီ။ တရုတ်ထုတ်ကုန်ပါတဲ့ ကားတွေဆို ဖမ်းပြီး ငွေသိန်းသုံးလေးဆယ်နဲ့ ပြန်ရွေးခိုင်းတာလည်း လုပ်တယ်။ ဒီငတိက ကိုးကန့် ပြန်လွှတ်ပေးလို့ အခု ကျောင်းအုပ်လာဖြစ်နေတာ” ဟု သတင်းရင်းမြစ်တစ်ဦးက ပြော သည်။
စစ်ကောင်စီ၏ ယင်းစစ်ဆေးရေးဂိတ်သည် ကုန်တင်ယာဉ်များကို စစ်ဆေးရာတွင် အထောက်အထား အပြည့်အစုံပြနိုင်သည့် ယာဉ်များကိုပါ ကုန်ပစ္စည်းများကို ဖောက်ထွင်းယူခြင်းများ ပြုလုပ်ကြကြောင်း ယာဉ်ပိုင်ရှင်များက ပြောသည်။
“အထောက်အထားပြည့်စုံတဲ့ ကားတွေကိုကျ အမျိုးမျိုးရစ်ပြီး ကားပေါ်မှာပါတဲ့ ပစ္စည်းတွေကိုယူတာတို့ လက်ဖက်ရည်ဖိုးဆိုပြီး ငွေတစ်သိန်းတောင်းတာတို့ လုပ်ကြတယ်ဗျာ” ဟု ကိုယ်တိုင်ကြုံရသည့် ယာဉ်မောင်းတစ်ဦးက ပြောသည်။
ယင်းဂိတ်မှ ဖမ်းဆီးသည့်ကားများကို ပြန်လည် ရွေးချယ်ရာတွင်လည်း ကားများသာ ပြန်လည်ရရှိပြီး ကားပေါ်ပါ ပစ္စည်းများကိုမူ စစ်ကောင်စီတပ်က အကုန် သိမ်းဆည်းသွားကြောင်းလည်း သိရသည်။
စစ်ကောင်စီ၏ အရှေ့မြောက်တိုင်းစစ်ဌာနချုပ်တွင် ယခင်က တိုင်းစစ်ဦးစီးချုပ်ဖြစ်သည့် ဗိုလ်မှူးချုပ်သန့်ထင်စိုးသည် လားရှိုးမြို့သိမ်းတိုက်ပွဲတွင် MNDAA ၏ ဖမ်းဆီးခြင်းခံခဲ့ရပြီး နှစ်ဘက်အပစ်ရပ်ပြီးနောက် ပြန်လည်လွတ်မြောက်လာခြင်း ဖြစ်သည်။
#MeKongNews
#ဟိုပုံး
#ဗိုလ်မှူးချုပ်သန့်ထင်စိုး
#ငွေတောင်းကြမ်း
#MNDAA
