မဲခေါင်၊ နိုဝင်ဘာ ၁၇
ရှမ်းပြည်တောင်ပိုင်း၊ ဟိုပုံးမြို့နယ်၊ လွယ်အွန်းကျေးရွာအုပ်စုတွင် စစ်ကောင်စီလက်အောက်ခံ PNO ပြည်သူ့စစ်က နိုဝင်ဘာလအတွက် တစ်အိမ် ၅ သောင်းကျပ် ဆက်ကြေးကောက်ခံနေကြောင်း ဒေသခံများက ပြောသည်။
ယင်းဆက်ကြေးငွေများကို PNO မှ ကျေးရွာအုပ်စုတာဝန်ခံ ထွက်ပညာ၊ ခွန်သုတ တို့ဆိုသူက ဦးဆောင်ကာ စစ်ကောင်စီ နှင့် PNO အတွက် ထောက်ပံ့ကြေးဟု ပြောကာ ကောက်ခံခြင်းဖြစ်ကြောင်း ဒေသခံများက ပြောသည်။
“ဒီလက တစ်အိမ် ၅ သောင်းတဲ့၊ ရွာသားတွေ ပိုက်ဆံ ၅ သောင်းရဖို့ဆိုတာ အရမ်းခက်ခဲတယ်ဗျ။ အခုလုပ် အခုပိုက်ဆံပေါ်တာ မဟုတ်ဘူးလေ။ အရင် အောက်တိုဘာလလည်း တစ်အိမ် ၉ သောင်းထည့်ရတယ်။ လတိုင်း အကြောင်းအမျိုးမျိုးပြပြီး ကောက်နေတော့တာပဲ။ အဲလို အဖွဲ့ရန်ပုံငွေဆိုပြီး အထက်ကခိုင်းလို့ ကောက်တာလို့ပြောပြီး ကောက်လာတာလည်း တစ်သက်လုံးပဲ ဘယ်နေရာမှာသုံးလဲ တစ်ခါမှစာရင်းမမြင်ဖူးဘူး” ဟု ဒေသခံသတင်းရင်းမြစ်တစ်ဦးက ပြောသည်။
လွယ်အွန်းကျေးရွာအုပ်စုတွင် PNO က မကြာခဏ ဆက်ကြေးကောက်ခံနေပြီး ယင်းသို့ ကောက်ခံရာတွင် ၎င်းတို့ ခန့်ထားသည့် ကျေးရွာအုပ်စုမှူးများက အထက်က ခိုင်းထားသည်ထက် ပိုကောက်လေ့ရှိသည်ဟုလည်း ဒေသခံများ၏ ပြောပြချက်အရ သိရသည်။
“ PNO ဗဟိုက တစ်အိမ် ၃ သောင်းကောက်ခိုင်းရင် မြို့နယ်မှူးတွေ၊ အုပ်စုမှူးတွေက သူတို့အတွက်ပါ ကျန်အောင် တစ်အိမ် ၅ သောင်း အဲလိုမျိုး ပိုပိုကောက်ကြတယ်၊ လုပ်စားကြတယ်။ အဲလိုလုပ်စားတာကို သူတို့ အထက်လူကြီးတွေ မသိဘူးလားဆိုလည်း မဟုတ်ဘူး၊ သိသိကြီးနဲ့ကို အတူတူလုပ်စားကြတာ။ အုပ်စုမှူးတွေ၊ မြို့နယ်မှူးတွေ ဆိုတာကလည်း သေနတ်နဲ့ ယူနီဖောင်းနဲ့ဆိုတော့ ဘယ်သူမှပြန်မပြောရဲဘူး” ဟု လွယ်အွန်းကျေးရွာအုပ်စုမှ ဒေသခံတစ်ဦးက ပြောသည်။
ဟိုပုံးမြို့နယ်၊ လွယ်အွန်းကျေးရွာအုပ်စုတွင် လွယ်အွန်း၊ နောင်ခုံး၊ ထီကတူး စသည့် ကျေးရွာပေါင်း ၁၀ ကျော်ရှိပြီး လူဦးရေ ၇၀၀၀ ကျော် နေထိုင်သည်။
စစ်ကောင်စီ လက်အောက်ခံ PNO ပြည်သူ့စစ်သည် ယခင်က စစ်အာဏာရှင်ကို တော်လှန်သည့် တပ်ဖွဲ့ဖြစ်ခဲ့ဖူးသော်လည်း ၁၉၉၁ ခုနှစ်တွင် စစ်တပ်နှင့်အပစ်ရပ်ကာ ၂၀၀၉ ခုနှစ်တွင် စစ်တပ်လက်အောက်ခံ အသွင်ပြောင်းပြည်သူ့စစ်အဖြစ် ပြောင်းလဲခဲ့သည်။
ထိုသို့ ပြောင်းလဲဖွဲ့စည်းပြီးနောက် ဦးအောင်ခမ်းထီက PNO ၏ နိုင်ငံရေးကော်မတီနှင့် စစ်ရေးကော်မတီဥက္ကဌ အဖြစ်တာဝန်ယူကာ စစ်ကောင်စီနှင့်အတူ တော်လှန်ရေးတပ်ဖွဲ့များကို လက်ရှိအချိန်ထိ တိုက်ခိုက်လျက်ရှိသည်။
#MeKongNews
#ဟိုပုံး
#လွယ်အွန်း
#PNO
#ဆက်ကြေးကောက်
