မဲခေါင်၊ နိုဝင်ဘာ ၁၅
ရှမ်းပြည်တောင်ပိုင်း၊ ပင်လောင်းမြို့နယ်၊ ဆောင်းပြောင်းကျေးရွာအနီး တောတောင်ထဲတွင် ခိုလှုံနေရသော စစ်ဘေးရှောင် ၅၅၁ ဦးအတွက် စောင်၊ မိုးကာ၊ ဆေးဝါးများ ပြတ်လပ်ပြီး အရေးပေါ် လိုအပ်နေကြောင်း စစ်ဘေးရှောင်ကူညီသူများထံမှ သိရသည်။
ယင်းစစ်ဘေးရှောင်များသည် အောက်တိုဘာ ပထမပတ်ကတည်းက ရှောင်တိမ်းလာကြခြင်းဖြစ်ပြီး အအေးဒဏ်ကြောင့် နှာစေး၊ ချောင်းဆိုးဖျားနာသူ များပြားနေကြောင်း သိရသည်။
“၁၅ ပေပတ်လည်တောင်မရှိတဲ့ မိုးကာတဲလေးထဲမှာ မိသားစု ၆ စုထိ ဖြစ်သလို စုပေါင်းနေနေရတာ ၁ လလောက်ရှိလာပြီ။ အခုက အရမ်းလည်းအေးတော့ ဖျားနာသူများတယ်။ စုပေါင်းပြီးနေတော့ တစ်ယောက်နဲ့ တစ်ယောက် ကူးကြတယ်။ အဲဒါကြောင့် ဖျားသူများတယ်။ အခုဆို ဆေးဝါး၊ မိုးကာ၊ စောင်အရေးပေါ်လိုတယ်” ဟု စစ်ဘေးရှောင်ကူညီသူတစ်ဦးက မဲခေါင်သို့ ပြောသည်။
ယင်းစစ်ဘေးရှောင်များသည် နေအိမ်မီးရှို့ခံရသော ဘောရန်ရွာမှ ကလေးငယ်များ၊ သက်ကြီးရွယ်အိုများ၊ အမျိုးသမီးများ အများစုပါဝင်သော ဒေသခံများဖြစ်ကြကြောင်း သိရသည်။
“စစ်ရှောင်လာတုန်း အရေးကြီးတဲ့ အိမ်ထောင်စုဇယား၊ မှတ်ပုံတင်နဲ့ စားစရာတွေပဲ ယူလာနိုင်တယ်။ အိမ်မှာကျန်တဲ့ အဖိုးတန်ပစ္စည်းတွေလည်း အိမ်မီးရှို့ခံရပြီး အကုန်ပါသွားတယ်။ စိုက်ပျိုးထားတဲ့ တောင်ယာ တွေလည်း ပြန်မသိမ်းရဘူး။ အခုဆို စစ်ဘေးရှောင်တွေက အလှူရှင်အပေါ်ပဲ အဓိကမှီခိုရတယ်” ဟု စစ်ဘေးရှောင်တစ်ဦးက ပြောသည်။
စစ်ရှောင်ကာလ ကြာလာသည်နှင့်အမျှ ဆေးဝါး၊ မိုးကာ၊ စောင်များအပြင် စားနပ်ရိက္ခာ၊ ခြင်ထောင်၊ ခြင်ဖြန်းဆေး၊ အမျိုးသမီးလစဉ်သုံးပစ္စည်းများလည်း လိုအပ်နေကြောင်း ၎င်းက ဆက်ပြောသည်။
ဘေားရန်ကျေးရွာသည် စစ်ကောင်စီနှင့် ပအိုဝ်းပြည်သူ့စစ် – PNO တို့စစ်ကြောင်းထိုးလာပြီးနောက် အောက်တိုဘာ ၁၃ ရက်တွင် အိမ်ခြေ ၃၀၀ ကျော်ကို ရွာလုံးကျွတ် မီးရှို့ဖျက်ဆီးသွားခဲ့ကြောင်း သိရသည်။
#MeKongNews
#ဆောင်းပြောင်း
#ပင်လောင်း
#စစ်ဘေးရှောင်
#အရေးပေါ်လိုအပ်
