မဲခေါင်၊ နိုဝင်ဘာ ၁၄
စစ်ကောင်စီကျင်းပမည့် ရွေးကောက်ပွဲတွင် လဲချားမြို့နယ်မှ ကျားဖြူပါတီကိုယ်စားပြု ဝင်ပြိုင်မည့် ကိုယ်စားလှယ်လောင်း ဒေါ်နန်းခမ်းလူနှင့် ၎င်း၏ အမျိုးသားဖြစ်သူ လဲချားမြို့နယ် ကျားဖြူပါတီဥက္ကဌ ဦးစိုင်းရွှေဆိုင် တို့ကို ဝမ်ပန်တပ်မဟာ ၇၅၈ ပြည်သူ့စစ် ခေါင်းဆောင် စိုင်းဆေးစင်က အသက်အန္တရာယ် ခြိမ်းခြောက်သဖြင့် တောင်ကြီးမြို့သို့ ထွက်ပြေးတိမ်းရှောင်နေရကြောင်း မိသားစုဝင်များထံမှ သိရသည်။
ပြီးခဲ့သည့် အောက်တိုဘာ ၃၀ ရက်တွင် ဒေါ်နန်းခမ်းလူ မိသားစုပိုင် လဲချားမြို့နယ်၊ ဝမ်ဆေကျေးရွာအုပ်စု၊ မတ်လန်းရွာရှိ “တိုင်းဧကရီ” သီးနှံအခြောက်ခံစက်ရုံဝန်း ပတ်ပတ်လည်ကို ကာရံထားသည့် ခြံစည်းရိုးကို ၇၅၈ ပြည်သူ့စစ် ဗိုလ်စိုင်းဆေးစင်နှင့် လက်နက်ကိုင် ၂၀ ခန့်က အင်အားသုံးကာ ဖျက်ဆီးခဲ့ပြီး ယင်းကိစ္စကို ကာယကံရှင်က သူ၏ လူမှုကွန်ရက်တွင် တင်ပြထားသည်။
ယင်းနောက် အောက်တိုဘာ ၃၁ ရက်တွင် မဲခေါင်သတင်းဌာနမှလည်း သတင်းဖော်ပြခဲ့ပြီးနောက် ယင်းအပေါ် ဆက်လက် ခြိမ်းခြောက်လာခြင်း ဖြစ်ကြောင်း ဒေသခံများထံမှ သိရသည်။
“စိုင်းဆေးစင်ရဲ့ အမေ ဒေါ်နန်းရွှေနုက သတင်းတွေပါပြီး ညနေဘက်မှာ သူတို့ ခြံရှေ့ လျှောက်သွားဆဲတယ်။ အဲလို သတင်းတင်ရကောင်းလားပေါ့။ အမေက ‘ရှက်’ လို့ တောင်ပြောတယ်။ သားဖြစ်သူက နန်းခမ်းလူကို သတ်မယ်လို့ ပြောတာ။ အဖေဖြစ်သူ ဦးဒေါနကတော့ ‘လင်ရော မယားရော နှစ်ယောက်လုံးကို သတ်မယ်’ လို့ ပြန်ကြားလို့ သူတို့ ကြောက်ပြီး မိသားစုလိုက် တောင်ကြီးကို ထွက်ပြေးလာရတာ” ဟု မိသားစုနှင့် ရင်းနှီးသူတစ်ဦးက မဲခေါင်သို့ ပြောသည်။
ဒေါ်နန်းခမ်းလူ၏ ခင်ပွန်း ဦးစိုင်းရွှေဆိုင်း သည်လည်း လဲချားမြို့နယ် ကျားဖြူပါတီ ဥက္ကဌ ဖြစ်ပြီး မိသားစုကို အသက်အန္တရာယ် ခြိမ်းခြောက်နေသည်ကို တပ်ချုပ်၊ ရှမ်းအစိုးရ၊ ရလခ တိုင်းမှူး (ခိုလန်) များထံသို့ နိုဝင်ဘာ ၉ ရက်က စာဖြင့် တိုင်ကြားထားကြောင်း သိရသည်။
“ရွေးကော်ကအစ အားလုံး တိုင်ထားတယ် လို့ သိရတယ်။ လွှတ်တော် ကိုယ်စားလှယ်လောင်းနဲ့ မိသားစုအသက်ကိုလည်း စောင့်ရှောက်ပေးဖို့ တောင်းဆိုထားတာ။ ခုထိတော့ ဘာမှ အကြောင်းမထူးသေးဘူး။ မိသားစုက သူတို့အတွက် စိုးရိမ်နေကြတယ်” ဟု မိသားစုနီးစပ်သူက ပြောသည်။
ခြိမ်းခြောက်သူ စိုင်းဆေးစင်သည် လက်ရှိတွင် မိုင်းကိုင်မြို့နယ်၊ မိုင်းခွန်ကျေးရွာအုပ်စု၊ ဟွေရုပ်ပလောင်ရွာတွင် ယာယီတဲများ ထိုးထားပြီး ကျားဖြန့် တရုတ်လူမျိုး ၇၀၀ ခန့်ကို ထိန်းကွပ်ခိုင်းစေသဖြင့် ဒေသခံများကလည်း ပြောကြသည်။
“အဲဒီအဖွဲ့ လက်နက်ကိုင်အစောင့် ပြောတာကတော့ ရက်သတ္တပတ်လောက် ငွေမရှာနိုင်တဲ့ တရုတ်ဆို စိုင်းဆေးစင်က ရက်ရက်စက်စက် လုပ်တာ။ သေတဲ့သူတွေတောင် ရှိတယ်တဲ့။ အွန်လိုင်းက ရှာမရရင် အိမ်က ငွေပြန်တောင်းခိုင်းနေတာတဲ့” ဟု မိုင်းကိုင်ဒေသခံ တစ်ဦးက မဲခေါင်သို့ ပြောသည်။
မဲခေါင်သတင်းဌာနအနေဖြင့် ကျားဖြန့်နှင့် ပတ်သက်သည့် သတင်းအချက်အလက်များကို အခြား သတင်းအရင်းအမြစ်များထံမှ စုံစမ်းနေဆဲ ဖြစ်သည်။
လက်ရှိတွင် ဦးရွှေဆိုင်း၊ ဒေါ်နန်းခမ်းလူတို့ ပိုင်ဆိုင်သည့် ပြောင်းစိုက်ခင်းအတွင်း၌ စိုင်းဆေးစင်၏ တပည့် ၇၅၈ ပြည်သူ့စစ်များက အခိုင်အမာ ခြံစည်းရိုးတိုင်များ လာရောက်ကာရံနေကြောင်း သိရသည်။
#MeKongNews
#လဲချား
#ကျားဖြူ
#ပြည်သူ့စစ်
#ဝမ်ပန်တပ်မဟာ၇၅၈
