မဲခေါင်၊ နိုဝင်ဘာ ၁၄
စစ်ကောင်စီထိန်းချုပ်ထားသည့် ရှမ်းပြည်မြောက်ပိုင်း၊ သီပေါမြို့ရှိ သီပေါတံတားကို စစ်ကောင်စီတပ် စကခ–၁၂ က ယနေ့ နံနက် ၆ နာရီမှ စ၍ ယာဉ်အသွားအလာများ ပိတ်လိုက်ကြောင်း ဒေသခံများထံမှ သိရသည်။
နိုဝင်ဘာ ၁၁ ရက် ညနေပိုင်းကတည်းက လားရှိုးဘက်အထွက် သီပေါတံတားထိပ်ရှိ MNDAA တပ်က ပြည်မဘက်မှ လာသည့် ကုန်တင်ယာဉ်များကို စတင်ပိတ်ပင်ခဲ့ပြီးနောက် ယနေ့ နိုဝင်ဘာ ၁၄ ရက် နံနက် ၆ နာရီမှ စကာ သီပေါကို ထိန်းချုပ်ထားသည့် စစ်ကောင်စီတပ် စကခ–၁၂ မှ သီပေါတံတား ယာဉ်ဖြတ်သန်းခွင့်ကို ပိတ်ပင်လိုက်ခြင်းဖြစ်ကြောင်း သိရသည်။
“ဒီမနက်က စစ်တပ်က ပိတ်တာ။ လွန်ခဲ့တဲ့ ၅ ရက်လောက်ကတည်းက ကျောက်မီးသွေးကားတွေ သွားခွင့်မရတော့တာ။ နောက်ရက်တွေကျတော့ ကိုးကန့်ဘက်က ကုန်ကားတွေ လာခွင့်မပေးတော့ဘူး။ ခုက စစ်တပ်က ဆိုင်ကယ်တောင် မပေးမသွားဘူး၊ လမ်းလျှောက်သွားရင်တော့ ရသေးတယ်” ဟု သီပေါ ပန်းတိမ်တောင်ရပ်နေသူ တစ်ဦးက မဲခေါင်ကို ပြောသည်။
ယင်းကဲ့သို့ တံတားဖြတ်သန်းမှုများကို နှစ်ဘက်အပြန်အလှန် ပိတ်ပင်လာခြင်းမှာ လားရှိုး “ဆင်နှစ်ကောင်” ဆွေးနွေးပွဲ၏ နောက်ဆက်တွဲ တင်းမာမှုများ ဖြစ်ကြောင်း သတင်းရင်းမြစ်များထံမှ သိရသည်။
“မနေ့က လားရှိုးက ပြန်လာတာ သီပေါတံတားကို မဖြတ်ဘူး။ ၉ မိုင်လမ်းခွဲ – နမ့်လန် – ကျောက်ဂူ လမ်းက လာတာ။ စစ်တပ်ဘက်ကတော့ မသိဘူး။ ကိုးကန့်တွေကတော့ အင်အားများလာတာ သတိထားမိတယ်” ဟု မန္တလေး–လားရှိုး ဆွဲယာဉ်မောင်း တစ်ဦးက ပြောသည်။
အလားတူ မိုင်းရယ်နှင့် ဟိုယကြားရှိ ကောင်းလန်းတံတားကိုလည်း စစ်တပ်က ယမန်နေ့က ပိတ်လိုက်ကြောင်း လဲချားဒေသခံ ပြောင်းကုန်သည် တစ်ဦးက ပြောသည်။
“ပြောင်းကားတွေက ဒီလမ်းသွားနေတာ။ အခု မရတော့ဘူး။ စစ်များ ပြန်ဖြစ်မလားလို့ စိုးရိမ်နေကြတယ်” ဟု ၎င်းကပြောသည်။
ဆင်နှစ်ကောင် ဆွေးနွေးပွဲတွင် လားရှိုးအရှေ့ဘက် နယ်မြေ နမ့်ပေါင်၊ ဟိုယဘက်တွင် တပ်စွဲထားသည့် MNDAA တပ်များကို စစ်ကောင်စီက ဆုတ်ခွာခိုင်းရာမှ ယခုကဲ့သို့ နှစ်ဖက် တင်းမာလာနေခြင်း ဖြစ်ကြောင်း သိရသည်။
#MeKongNews
#သီပေါတံတား
#ကုန်တင်ယာဉ်
#စစ်ကောင်စီ
#လားရှိုး
ပုံအညွှန်း – ယနေ့နံနက် သီပေါတံတားအခြေအနေ
