မဲခေါင်၊ နိုဝင်ဘာ ၁၃
ရှမ်းပြည်မြောက်ပိုင်းမှ စစ်ကောင်စီ ပြန်လည်ထိန်းချုပ်လိုက်သည့် ကျောက်မဲနှင့် သီပေါမြို့နယ်များအတွင်း PSLF/TNLA တံဆိပ် အသုံးပြုသူများကို စတင် စစ်ဆေးအရေးယူနေကြောင်း ခရီးသွားကားများနှင့် ဒေသခံများထံမှ သိရသည်။
TNLA အမှတ်အသားဖြစ်သည့် တံဆိပ်၊ အလံ၊ စတစ်ကာ၊ ကားကပ်၊ ဆိုင်ကယ်ကပ်၊ အင်္ကျီ၊ လွယ်အိတ်၊ ဦးထုပ်၊ ဓာတ်ပုံ၊ ပြက္ခဒိန် စသည်တို့ကို တွေ့ရှိပါက စစ်ကောင်စီတပ်က စတင် ဖမ်းဆီးအရေးယူနေကြောင်း ရှမ်းမြောက်သွား ခရီးသည်တင်ယာဥ်မောင်းတစ်ဦးက မဲခေါင်သို့ ပြောသည်။
“တစ်နေ့ကစတယ်၊ သီပေါ၊ ကျောက်မဲမြို့နယ်မှာ စတင်စစ်ဆေးနေတာပါ။ အဖမ်းခံရတာတွေရှိနေတယ် ကြားရ ပေမယ့် ကျနော်တော့မကြုံသေးဘူး။ စစ်တာတော့အရမ်းကိုစစ်တာ၊ ပလောင်လူမျိုးအလံတော့ မဖမ်းဘူးလို့ သိရတယ်။ ပလောင်ကိုဆောင်ရတဲ့ အခွန်တစ်နှစ်တစ်သိန်းစာရွက်တောင် လားရှိုးဂိတ်မှာ ထားထားရတယ်၊ တပ်ကတွေ့ရင်မလွယ်ဘူး။ ပလောင်ဆိုလည်း လားရှိုးပလောင်ဆိုရပေမယ့် ကျန်နေရာကတော့ အရမ်းရှာ အရမ်းစစ်တာ”ဟု ၎င်းက ပြောသည်။
ထို့ပြင် မြို့ပေါ်ချိပ်ပိတ်ခံရသည့် အိမ်အများစုမှာ ပလောင်လူမျိုးအိမ်များဖြစ်ပြီး ဖမ်းဆီးစစ်ဆေးခံရသူများတွင် TNLA မှတ်ပုံတင် အစရှိသည့် စာရွက်စာတမ်းအသုံးပြုမှု ရှိ၊မရှိ အဓိကစစ်ဆေးကြောင်း ကျောက်မဲ ၂ ရပ်ကွက် နေသူတစ်ဦးကလည်း ပြောသည်။
TNLA က ၎င်းတို့ ထိန်းချုပ်နယ်မြေများအတွင်း နေထိုင်သူများကို TNLA တံဆိပ်ပါ မှတ်ပုံတင်ပြုလုပ်စေခြင်း၊ နယ်မြေအတွင်း ဖြတ်သန်းသည့်ယာဥ်များကို အခွန်ဆောင်လက်မှတ်ထုတ်ပေးခြင်း၊ စီးပွားရေးလုပ်ငန်းများ ခွင့်ပြုလက်မှတ်ထုတ်ပေးခြင်းနှင့် အလံများသုံးစွဲစေခြင်းများ လုပ်ဆောင်လျက်ရှိသည်။
TNLA သည် ၁၀၂၇ စစ်ဆင်ရေးများအတွင်း ရှမ်းပြည်မြောက်ပိုင်းမှ ၁၂ မြို့ကို စစ်ကောင်စီလက်ဝယ်မှ တိုက်ခိုက်ထိန်းချုပ်ခဲ့သော်လည်း ယခုနှစ် ဇူလိုင်နောက်ပိုင်းမှစပြီး နောင်ချို၊ ကျောက်မဲနှင့် သီပေါမြို့များကို စစ်ရေးအရ ဆုံးရှုံးခဲ့ရသည်။
ထို့ပြင် လာမည့်နိုဝင်ဘာ ၂၀ ရက် နောက်ပိုင်းတွင်လည်း မိုးမိတ်နှင့် မိုးကုတ်မြို့များမှ ၎င်းတို့တပ်များဆုတ်ပေးရန် တရုတ်ကြားဝင်သည့် ကူမင်းဆွေးနွေးမှုအရ သဘောတူညီထားကြောင်း သိရသည်။
#MeKongNews
#ကျောက်မဲ
#သီပေါ
#TNLA
#စစ်ကောင်စီ
