မဲခေါင်၊ နိုဝင်ဘာ ၁၁
ရှမ်းပြည်တောင်ပိုင်း၊ ဓနုဒေသ၊ ရွာငံမြို့နယ်တွင်း ကျေးရွာများတွင် ရွာခံရွာသားအချို့ကို စစ်ကောင်စီက ဖမ်းဆီးစစ်ဆေးနေသကဲ့သို့ နယ်မြေလုံခြုံရေးကို ပိုမိုတင်းကြပ်ထားပြီး ရွာအဝင်အထွက်များကို ပိတ်ဆို့ထားကြောင်း ဒေသခံများနှင့် တော်လှန်ရေးတပ်ဖွဲ့ဝင်များထံမှသိရသည်။
နိုဝင်ဘာလ ပထမပတ်ရက်ပိုင်းအတွင်း နွားဘန်းကြီးရွာနှင့် ငါးဆူကျေးရွာများမှ ကျေးရွာသားများကို စစ်ကောင်စီတပ်က ဖမ်းဆီးသွားပြီး ရွာအဝင်အထွက် ပိတ်ဆို့ထားသည့် ရွာများမှာ ချောင်းဦး၊ ကျောက်ပိဇပ်၊ ရနဲ၊ တောင်ဦးစသည့် ရွာငံအနောက်တောင်ဘက်မှ ရွာများဖြစ်ကြောင်း ဒေသခံများထံမှ သိရသည်။
“နွားဘန်းကြီးက ၂ယောက်၊ ငါးဆူကျေးရွာကတော့ ၃ယောက်လို့ကြားတယ်။ ဖမ်းသွားတာပဲ သိရသေးတယ်ဗျ၊ နောက်ဆက်တွဲသတင်းတော့မရသေးဘူးဗျ။ ရွာတွေတင်မကဘူး မြို့ဝင်မြို့ထွက်တွေလည်းအစစ်ဆေး ကြမ်းတယ်လို့သိရတယ်” ဟု ဓနုပြည်နယ်အမျိုးသားကာကွယ်ရေးတပ်တော် – DSNDA ပြန်ကြားရေးတာဝန်ခံက မဲခေါင်သို့ ပြောသည်။
ရွာများတွင် တောင်ယာသွားခွင့် ကန့်သတ်ထားသကဲ့သို့ ရွာဝင်ရွာထွက်ကိုပင် မှတ်ပုံတင်ပြ၍ သွားလာနေရကြောင်း ဒေသခံများထံမှသိရသည်။
“မြို့ထဲက ရွာတွေဘက်သွားရင်တောင် အတော်အစစ်ဆေးကြမ်းတယ်။ စစ်တာကလည်း အကုန်စစ်နေတာ” ဟု ရွာငံကျုံးနေသူတစ်ဦးက မဲခေါင်သို့ပြောသည်။
ရက်ပိုင်းအတွင်း ဓနုတော်လှန်ရေးတပ်ဖွဲ့များ ပေါင်းစည်းကာ ပြောက်ကျားစစ်အရှိန်တိုးမြှင့်နိုင်သည့် သတင်းကြောင့် စစ်တပ်ကလုံခြုံရေးအတွက် စစ်ဆေးရေးတိုးမြှင့်လာခြင်း ဖြစ်နိုင်ကြောင်း ဒေသခံများက ယူဆကြသည်။
ရွာငံ၊ ပင်းတယ၊ ရပ်စောက်နယ် အတွင်းလှုပ်ရှား နေသည့် ဓနုတော်လှန်ရေးတပ်များအနေဖြင့် တော်လှန်ရေးအရှိန်အဟုန်မြှင့်ရန်ပြောက်ကျားစစ်ကိုဆင်နွှဲနေသည်ဟု DPLA နှင့် ပူးပေါင်းသွားသည့် ချိုးဖြူတော် လှန်ရေးတပ်ဖွဲ့- JPRF က ထုတ်ပြန်ထားသည်။
စစ်ကောင်စီတပ်က ယခုကဲ့သို့ဖမ်းဆီးမှုများ လုံခြုံရေးပိုမိုတင်းကြပ်လာမှုများသည် ပြီးခဲ့သည့် အောက်တိုဘာ ၂၈ ရက်တွင်ရွာငံမြို့နယ်၊ ကျောက်ပိဇပ်ရွာ၌ ကျေးရွာအုပ်ချုပ်ရေးမှူးနှင့် ပြည်သူ့စစ်အမျိုးသားတစ်ဦး ပစ်သတ်ခံခဲ့ရသည့်ကိစ္စနှင့် ဆက်စပ်နေသည်ဟုလည်း ဒေသခံများက ပြောကြားနေကြောင်း သိရသည်။
#MeKongNews
#ရှမ်းတောင်
#ရွာငံ
#လုံခြုံရေးတင်းကြပ်
#စစ်ကောင်စီ
