မဲခေါင်၊ နိုဝင်ဘာ ၁၀
တော်လှန်ရေး အရွေ့တစ်ခု လျင်မြန်စွာ ဖြစ်ပေါ်လာစေရေး ရည်ရွယ်ကာ ရှမ်းပြည်တောင်ပိုင်း၊ ဓနုဒေသအခြေစိုက် ရွာငံ PDF ချိုးဖြူတော်လှန်ရေးတပ်ဖွဲ့- JPRF က ဓနုပြည်သူ့လွတ် မြောက်ရေးတပ်ဦး-DPLF/DPLA တပ်ဖွဲ့ထံ ပူးပေါင်းလိုက်ပြီး DPLF/DPLA တပ်အဖြစ် ဆက်လက်လှုပ်ရှားသွားမည်ဟု အောက်တိုဘာ ၈ရက် ညတွင်ထုတ်ပြန်ကြေညာသည်။
တော်လှန်ရေးအကျိုးကို ရှေးရှုသောအားဖြင့် အရွေ့တစ်ခုလျင်မြန်စွာဖြစ်ပေါ်နိုင်ရန် တစ်ဖွဲ့တည်းရပ် တည်လှုပ်ရှားခြင်းမပြုတော့ဘဲ ဓနုပြည်သူ့လွတ်မြောက်ရေးတပ်ဦး – DPLF/DPLA တပ်ဖွဲ့နှင့် ပူးပေါင်းလိုက်ခြင်းဖြစ်သည်ဟု ရွာငံ JPRF ၏ ကြေညာချက်တွင်ဖော်ပြထား သည်။
ထို့ကြောင့် ရှေ့ဆက်လှုပ်ရှားမှုများကို DPLF/DPLA တပ်အဖြစ် စစ်သုံးစစ် အမြစ်ဖြတ်ချေမှုန်းရေးနှင့် အဖိနှိပ်ခံ ပြည်သူလူထုတရပ်လုံးလွတ်မြောက်ရေးအတွက် တော်လှန်သွားမည်ဟု ထုတ်ပြန်ချက်တွင် ဖော်ပြထားသည်။
JPRF က DPLF/DPLA နှင့်ပူးပေါင်းလာသည်မှာ မှန်ကန်ပြီးယခင်ကတည်းက လှုပ်ရှားမှုများအတူတကွ ဆောင်ရွက်ခဲ့သည်ဟု DPLF/DPLA ဥက္ကဌ ဦးထွန်းထွန်းနိုင်က ဆိုသည်။
“DPLA အဖြစ် မလုပ်ခင်ကတည်းက ကျွန်တော်တို့အားလုံးက အချင်းချင်းလူရင်းတွေပဲဗျ။ အလုပ်တွေ လည်းတွဲလုပ်ခဲ့ကြတယ်။ တောတွင်းမှာလည်း အမြဲတမ်းပုံမှန်လိုအပ်တဲ့ဟာတွေ အပြန်အလှန်အတူ လုပ်ခဲ့တာတွေ အမြဲတမ်းတောက်လျောက် ရှိခဲ့တယ်ဗျ။ ကျွန်တော်တို့အတွက်ရော သူတို့အတွက်ရော ခက်ခက်ခဲခဲ ရှင်းစရာလင်းစရာမရှိဘူးဗျ။ ဒီအတိုင်း ရှင်းရှင်းလင်းလင်းလေးပဲ၊ ရိုးရိုးလေးပဲ လုပ်သွားတာ ပါဗျ” ဟု ၎င်းကပြောသည်။
ဓနုတပ်ဖွဲ့များ ယခုကဲ့သို့တစ်ဖွဲ့တည်းအဖြစ် ပူးပေါင်းဆောင်ရွက်နိုင်ခြင်းသည် ကောင်းမွန်သည့်တိုးတက်မှုဖြစ်ပြီး အားရဝမ်းသာသည်ဟု ဓနုလူငယ်တစ်ဦးက ပြောသည်။
“ဒီလိုမျိုးသတင်းကြားချင်တာကြာပြီ။ အကုန်လုံးစုစည်းနိုင်မှပဲ အလုပ်ပိုဖြစ်မှာ။ အခုလည်းဝမ်းသာတယ်။ ဓနုတွေလွတ်မြောက်ဖို့ ဓနုတွေ စုစုစည်းစည်းနဲ့ ညီညွတ်ကြဖို့လိုတယ်ဗျ” ဟု ၎င်းကပြောသည်။
JPRF ကို ၂၀၂၂ ခုနှစ်တွင် စတင်ဖွဲ့စည်းခဲ့ပြီး ရှမ်းတောင်ဓနုဒေသတွင် အခြေစိုက်ကာစစ်အာဏာရှင် တပ်ဖွဲ့ကို သမားရိုးကျစစ်များ၊ ပြောက်ကျားစစ်များဖြင့် တော်လှန်တိုက်ခိုက်လျက်ရှိသည်။
DPLA မှာ ရှမ်းပြည်တောင်ပိုင်း၊ ဓနုဒေသဆက်စပ်ကျောက်ဂူနယ်အတွင်း TNLA နှင့်ပူးပေါင်းကာ ရှမ်းပြည်မြောက်ပိုင်းတွင်စစ်ကောင်စီကို ပြင်းထန်စွာတိုက်ပွဲဝင်နေသည့် တိုင်းရင်းသား တော်လှန်ရေးတပ်ဖွဲ့ဖြစ်သည်။
ထို့ကြောင့် ၎င်းတို့အနေဖြင့် DPLA ကဲ့သို့ TNLA နှင့် စစ်ရေးဆိုင်ရာ တွဲဖက်လုပ်ဆောင်ခြင်းများ ရှိ၊ မရှိ မဲခေါင်က မေးမြန်းမှုအပေါ် “ကျနော်တို့ DPLA ဖြစ်သွားပြီဗျ” ဟု JPRF ပြန်ကြားရေးတာဝန်ခံက ပြန်လည်ဖြေကြားသည်။
“TNLA က စစ်ရပ်ထားတော့ DPLA က သူ့ဒေသ ဓနုနယ်မြေအတွက် ခုလို JPRF နဲ့ ပူးပေါင်းမှုက အင်အားထု ပိုခိုင်မာလာပြီး တော်လှန်ရေးအရှိန်မြင့်လာမှာဖြစ်လို့ ရွာငံ၊ ပင်းတယတွေဘက် တိုက်ပွဲတွေ ပိုဖြစ်လာနိုင်တယ်” ဟု နိုင်ငံရေး၊ စစ်ရေး အကဲခတ် နိုင်ငံရေးအကျဥ်းသားဟောင်းတစ်ဦးက သုံးသပ်သည်။
ရှမ်းတောင်၊ ဓနုဒေသ ရွာငံ၊ ပင်းတယဘက်တွင်JPRF ကဲ့သို့ပင် ဓနုပြည်အမျိုးသားကာကွယ်ရေးတပ်တော် – DSNDA ၊ ပြည်သူ့သားများတပ်ဖွဲ့- PSF တို့ကလည်း စစ်ကောင်စီကို ပြောက်ကျားစစ်ဖြင့် ခုခံတော်လှန်လျက်ရှိကြောင်း သိရသည်။
#MeKongNews
#ရွာငံ
#ဓနု
#JPRF
#DPLA
