မဲခေါင်၊ နိုဝင်ဘာ ၈
ရှမ်းပြည်တောင်ပိုင်း၊ ဆီဆိုင်မြို့နယ်တွင် စစ်ကောင်စီလက်အောက်ခံ PNO ပြည်သူ့စစ်က တပ်ဖွဲ့စရိတ်ဟုဆိုကာ တစ်အိမ်ထောင်လျှင် ၇ သိန်းကျပ် ဆက်ကြေးကောက်ခံကြောင်း ဒေသခံများထံမှ စုံစမ်းသိရှိရ သည်။
ဆီဆိုင်မြို့ပေါ်ရပ်ကွက်များနှင့် ကပ်လျက် တဆက်စပ်တည်း တည်ရှိနေသည့် ဘုရားဖြူ၊ ဟော်တောင်၊ ဟော်မြောက်၊ ဝါးတော၊ ခြုံပွတ်စသည့်ကျေးရွာတို့တွင် အောက်တိုဘာ ၂၈ ရက်၌ ကောက်ခံခဲ့ခြင်းဖြစ်ပြီး မထည့်ဝင်နိုင်သည့် အိမ်များကို ခြိမ်းခြောက်နေကြောင်း ဒေသခံများက ပြောသည်။
PNO ပြည်သူ့စစ်အတွက် စစ်စရိတ်ဟုဆိုကာ မိသားစုရှိသည့် တစ်အိမ်လျှင် ၇ သိန်းကျပ်၊ တစ်ဦးတည်းနေထိုင်သူများအား ၂ သိန်းကျပ်၊ နိုင်ငံခြားတွင်ရှိသည့်သူများအား တစ်ဦးလျှင် ၂ သိန်းကျပ် ဖြင့် ဆက်ကြေးကောက်ခံခဲ့ခြင်း ဖြစ်သည်။
“အခုထိမထည့်နိုင်သေးတဲ့ အိမ်လည်းရှိတော့ ရွာထဲကနေ နှင်ထုတ်မယ်၊ တခုခုဖြစ်ရင် အဆိုးမဆိုနဲ့ဆိုပြီး ခြိမ်းခြောက်တယ်။ တခြားလူမျိုးတွေများတဲ့ မြို့ပေါ်ရပ်ကွက်တွေကျတော့ သူတို့မကောက်ရဲဘူး။ ပအိုဝ်းတွေပဲများတဲ့ ရွာတွေပဲ သူတို့ကောက်ရဲ၊ အနိုင်ကျင့်ရဲတယ်။ ၆ လ တကြိမ်ကောက်တဲ့ ၂ သိန်းလည်း ထည့်ပြီးပြီ။ အခုကတစ်ခါ တစ်အိမ် ၇ သိန်းတဲ့၊ စိုက်ပျိုးတဲ့ဟာတွေက စျေးမရှိ၊ အကြွေးမကျေသေးဘူး။ သူတို့ တောင်းတာလည်း အကြွေးနဲ့ယူပြီးထပ်ထည့်ရတယ်” ဟု ကိုယ်တိုင်ဆက်ကြေးထည့်ခဲ့ရသည့် ဒေသခံတစ်ဦးက ပြောသည်။
ယင်းဆက်ကြေးများကို မော်ချောက်၊ ထွက်မြင့်၊ အေးဗုတ် စသည့် PNO အဖွဲ့ဝင်များက အထက်အမိန့်ဟုဆိုကာ ဦးဆောင်ကောက်နေခြင်းဖြစ်ကြောင်း စုံစမ်းသိရှိရသည်။
စစ်ကောင်စီလက်အောက်ခံ PNO ပြည်သူ့စစ်သည် စစ်ကောင်စီနှင့်ပေါင်းပြီး ရှမ်းပြည်၊ ကရင်နီ ပြည်နယ်အတွင်းရှိ တော်လှန်ရေးတပ်ဖွဲ့များကို တိုက်ခိုက်နေပြီး ကျေးရွာများကိုလည်း မီးရှို့ခြင်း၊ လုယက်ခြင်းများ ကျူးလွန်နေသည်။
#MeKongNews
#ရှမ်းတောင်
#ဆီဆိုင်
#ဆက်ကြေးကောက်
#PNO
