မဲခေါင်၊ အောက်တိုဘာ ၂၉
တိုင်းပြည်၏အကြပ်အတည်း (Constitutional Crisis) ဖြစ်နေသည်ကို ဖြေရှင်နိုင်ရန် “ဖက်ဒရယ်ဒီမိုကရေစီစနစ်အတွက် အခြေခံသဘောတူညီချက်စာချုပ်” လက်မှတ်ရေးထိုးပွဲကျင်းပရန်၊ ကြိုတင်ဆွေးနွေး ညှိနှိုင်းဆုံးဖြတ်ချက် ချမှတ်မည့်အစည်းအဝေး ကျင်းပရန် တိုင်းရင်းသာတော်လှန်ရေးအဖွဲ့များသို့ ဖိတ်ခေါ်ထားကြောင်း ဖိတ်ကြားခံရသည့် ဓနုပြည်သူ့ လွတ်မြောက်ရေးတပ်ဦး DPLA ထံက သိရသည်။
ယင်းအစည်းအဝေးကို ဖက်ဒရယ်အခြေခံမူများ သဘောတူညီမှုရရှိရေးနှင့် တည်ဆောက်ရေးအကြံပေးကော်မတီက ဦးဆောင်ကျင်းပခြင်းဖြစ်ကြောင်း သိရသည်။
ဖိတ်ကြားရာတွင် ကိုယ်ပိုင်ဆုံးဖြတ်ခွင့် (Self – Determination) အတွက် တိုက်ပွဲဝင်နေကြသည့် တိုင်းရင်းသားခေါင်းဆောင်များ၊ ပြည်နယ်ရရှိရေးအတွက် တိုက်ပွဲဝင်နေကြသော ခေါင်းဆောင်များအနေဖြင့် မိမိတို့တည်ဆောက်မည့် အနာဂါတ်ဖယ်ဒရယ်နိုင်ငံအတွက် ကိုယ်တိုင်အင်ဂျင်နီယာအဖြစ် ပါဝင်တည်ဆောက်ယူရမည်ပြီးဖြစ်ကြောင်း ရည်ညွှန်းထားသည်။
“ဖက်ဒရယ်တော်လှန်ရေးအစိုးရတစ်ရပ် တော်လှန်ရေးဘက်မှာ တစုတစည်းတည်းဖြင့် တည်ဆောက်ထားရှိနိုင်ဖို့ကို ကြိုတင်ပုံဖော်ထားပြီး သဘောတူညီချက်စာချုပ်နဲ့ လမ်းပြမြေပုံရှိဖို့ လိုအပ်တာဖြစ်လို့ ဒီအစည်းအဝေး အောင်မြင်ထမြောက်ဖို့ လိုအပ်ပါတယ်”ဟု DPLA ခေါင်း ဆောင် ဦးထွန်းထွန်းနိုင်က မဲခေါင်သို့ပြောသည်။
စာချုပ်နှင့် လမ်းပြမြေပုံသည် မိမိတို့၏ ညီညွတ်ခိုင်မြဲမှုနှင့် ဦးတည်ရာလမ်းရှင်းလင်းနေမှုကို ပြသနိုင်ယုံသာမက နိုင်ငံတကာ၏ ယုံကြည်မှုကိုပါ ရရှိမည်ဖြစ်ကြောင်းလည်း ၎င်းကပြောသည်။
ကြိုတင်ဆွေးနွေး ညှိနှိုင်းဆုံးဖြတ်ချက်ချမှတ်မည့် (ပထမအကြိမ်) အစည်းအဝေးကို၊လာမည့် ၂၀၂၅ခုနှစ် နိုဝင်ဘာလ ၊ဒုတိယအပတ်တွင်၊ စတင်ကျင်းပရန်၊ လျှာထားသတ်မှတ်ထားသည်ဟု ဦးထွန်းထွန်းနိုင်ထံမှ သိရသည်။
#MeKongNews
#DPLA
#ဖက်ဒရယ်
#တော်လှန်ရေး
#ဦးထွန်းထွန်းနိုင်
