မဲခေါင်၊ အောက်တိုဘာ ၂၈
စစ်ကြောင်းထိုးနေသည့် စစ်ကောင်စီတပ်၏ ဖမ်းဆီး သတ်ဖြတ်ခံထားရသည့် ပြည်သူ ၁ ဦး၏ ရုပ်အလောင်းကို ရှမ်းပြည်တောင်ပိုင်း၊ ဓနုဒေသ၊ ရွာငံမြို့နယ်တွင် ရှာတွေ့ရှိခဲ့ကြောင်း ဒေသခံများထံမှ သိရသည်။
ယင်းအလောင်းကို ရွာငံမြို့နယ်၊ ရနဲကျေးရွာ အုပ်စု၊ ကျောက်တောကျေးရွာတွင် အောက်တိုဘာလ နောက်ဆုံးပတ်အတွင်း၌ တွေ့ရှိရခြင်းဖြစ်ပြီး ယင်းရုပ်အလောင်းတစ်ဝိုက်တွင် စစ်တပ်က တပ်စွဲထားသဖြင့် သေဆုံးသူ မည်သူမည်ဝါမှန်းမသိရဟု ဓနုဒေသ တော်လှန်ရေးတပ်ဖွဲ့များက မဲခေါင်သို့ ပြောသည်။
“လက်ရှိအဲနေရာပတ်လည်မှာ စကစတွေဝိုင်းပြီး ပိတ်ဆို့ထားပါတယ်ဗျ။ အဲ့ကိုကပ်မရဘူး” ဟု ဓနုပြည်နယ် အမျိုးသားကာကွယ်ရေးတပ်တော် – DSNDA မှတာဝန်ရှိသူက ပြောသည်။
ယင်းအလောင်းမှာ ရုပ်ပျက်ဆင်းပျက်ဖြစ်နေပြီး မည်သူမည်ဝါဖြစ်သည်ကို အတည်ပြုနိုင်ခြင်း မရှိသေးကြောင်း နှင့် စစ်တပ် စစ်ကြောင်းထိုးခဲ့သော ကျေးရွာများမှ ပျောက်ဆုံးနေသော ပြည်သူများလည်းရှိနေကြောင်း ၎င်းကပြောသည်။
စစ်တပ်သည် ရွာငံမြို့နယ်အတွင်း ဩဂုတ်လ နောက်ဆုံးပတ်မှ စက်တင်ဘာလကုန်အထိ ၂ လ ကြာ စစ်ကြောင်းထိုးခဲ့ရာတွင် ဩဂုတ်လ ၂၅ ရက်နေ့၌ ကျောက်တောကျေးရွာမှ ပြည်သူပိုင် နေအိမ် ၃၇ လုံး၊ စက်တင်ဘာ ၁၄ ရက်နှင့် ၁၅ ရက်နေ့တို့တွင် ကျောက်တောရွာမှ နေအိမ် ၂၃ လုံးနှင့် စပါးကျီ အားလုံးကို ထပ်မံမီးရှို့ဖျက်ဆီးခဲ့ခြင်းဖြစ်ကြောင်း ရှမ်းလူ့အခွင့်အရေးမဏ္ဍိုင် SHRF က အောက်တိုဘာ ၁၆ရက်က ထုတ်ပြန်ထားသည်။
၎င်းအပြင် အိမ်ခြေ ၆၀ လုံး၊ စပါးကျီ ၉၀ ခု ၊ စစ်ဘေးရှောင် (IDP) စခန်းတစ်ခုနှင့် တောင်ယာတဲ အများအပြားကို မီးရှို့ ဖျက်ဆီးခဲ့သည်ကြောင်း SHRF က ဖော်ပြထားသည်။
ထို့အပြင် စစ်တပ်က စက်တင်ဘာလ ၁၅ ရက်နေ့ ကျောက်တောကျေးရွာအနီး ပြည်သူ ၆ ဦးကို ဖမ်းဆီးခဲ့ကြောင်း၊ ထိုဖမ်းဆီးခံရသူများမှာ သာစည်မြို့နယ်၊ ဖိုးသနိုင်ကျေးရွာမှ အသက် ၅၄ နှစ် အရွယ် ဦးမောင်မြင့်၊ အသက် ၃၅ နှစ် အရွယ် ဒေါ်တင်မိုးလှိုင်၊ အသက် ၈ နှစ်အရွယ် မပွင့်ပွင့်နှင့် ကျောက်တော ကျေးရွာမှ အသက် ၅၃ နှစ်အရွယ် ဦးသန်းလှိုင်၊ အသက် ၅၁ နှစ်အရွယ် ဒေါ်ခင်ညိုမြင့် တို့ဖြစ်ပြီး မိတ္ထီလာတပ်ရင်းသို့ ခေါ်ဆောင်သွားကြောင်း သိရသည်။
အလားတူစက်တင်ဘာလ ၂၄ ရက်နေ့တွင် ညောင်ပင်သာနှင့် ကျောက်တောကျေးရွာမှ ရွာသားများ ခိုလှုံနေသည့် တောထဲရှိ စစ်ဘေးရှောင်စခန်းတစ်ခုတွင် မိုးသည်းထန်စွာရွာသွန်းမှုကြောင့် မြေပြိုမှုဖြစ်ပွားခဲ့ပြီး ကလေးသုံးဦးအပါအဝင် လူ ၁၀ ဦး သေဆုံးခဲ့သည်။
စက်တင်ဘာလ နောက်ဆုံးအပတ်တွင် စစ်ကောင်စီတပ်များသည် တောထဲရှိ နေရပ် စွန့် ခွာနေရသော ကျောက်တောရွာသားများ၏ ယာယီတဲ ၅ လုံးကို ထပ်မံဖျက်ဆီးခဲ့သည်။
ကျူးလွန်သူများမှာ ကလောအခြေစိုက် ခြေမြန်တပ်မ (၅၅) နှင့် မိတ္ထီလာအခြေစိုက် ခြေမြန်တပ်မ (၉၉)တို့ဖြစ်ပြီး ၎င်းတို့၏တပ်ဖွဲ့ဝင်စစ်ကောင်စီတပ်သား ၅၀၀ ခန့်က ရွာငံမြို့နယ်အနောက်ပိုင်း၊ ရွာငံ-မိတ္ထီလာ နယ်စပ်ရှိ ကျေးရွာများတွင် ပြည်သူ့ကာကွယ်ရေးတပ်ဖွဲ့ (PDF) ကို “နယ်မြေရှင်းလင်းရေး” စစ်ဆင်ရေးများ ပြုလုပ်ခဲ့ခြင်းဟု သိရသည်။
လက်ရှိတွင်လည်း ယင်းတပ်များသည် သာစည်နယ်ဖက်ကရွာများနှင့် ရွာငံနယ်၊ ကျောက်တောရွာ နှင့် ညောင်ပင်သာရွာတို့တွင် တပ်စွဲထားဆဲဖြစ်ပြီး ဒေသခံ ပြည်သူ ၅၀၀ ခန့်မှာလည်း ဆက်လက်၍ တောထဲတွင် ထွက်ပြေး တိမ်းရှောင် နေထိုင်နေရဆဲဖြစ်ကြောင်း၊ ယင်းအတွက် စစ်ဘေးရှောင်ပြည်သူများမှာ အစားအသောက်နှင့် အမိုးအကာအပါအဝင် အရေးပေါ်အကူအညီများ လိုအပ်လျက်ရှိကြောင်း သိရှိရသည်။
#MeKongNews
#ရွာငံ
#စစ်ကောင်စီ
#သတ်ဖြတ်
#ကျောက်တောကျေးရွာ
