မဲခေါင်၊ အောက်တိုဘာ ၁၀
တောင်ကြီးမြို့အခြေစိုက် အမှတ် (၁၈) ယာဥ်ထိန်းရဲဒုတပ်ဖွဲ့ခွဲမှူး ရဲမှူးမိုးကျော်ဟိန်းသည် ၎င်း၏ လက်အောက်တပ်ဖွဲ့ဝင်များနှင့်အတူ လိုင်စင်မဲ့ယာဥ်များအား ဖမ်းဆီးနေခြင်းမှာ လိုင်းကြေးရရန်အတွက်သာဖြစ်ပြီး လိုင်းကြေးရပါက သိမ်းဆည်းခြင်းမပြုဘဲ ပြန်လွှတ်ပေးနေသည်ဟု မြို့ခံများနှင့် သတင်းရင်းမြစ်များက ပြောသည်။
ရဲမှူးမိုးကျော်ဟိန်း၊ ရုံးဦးစီးဒုရဲမှူးစည်သူနှင့် ဒုရဲမှူးမျိုးသန့် တို့မှ ဦးစီးပြီး တောင်ကြီးမြို့တွင် ၁၀ ဘီး ၊၁၂ ဘီး၊ တွဲကား၊ ကန်တာကားများကို တစ်လ ကျပ်တစ်သိန်းနှုန်းဖြင့် နှစ်စဉ်ကြေးယူနေပြီ ယင်းသို့ လစဥ်ကြေးရယူနိုင်ရန် ၎င်း၏ နယ်မြေတာဝန်ကျ ယာဥ်ထိန်းရဲများက ချိတ်ဆက်ပေးနေရကြောင်း ဒေသခံ သတင်းရင်းမြစ် တစ်ဦးက မဲခေါင်သို့ ပြောသည်။
“W ကားဖမ်းတာက တမင်အဖမ်းပြတာ။ အဲဒီလိုဖမ်းပြမှ သူတို့နား နှစ်စဉ်ကြေးသွင်းပြီး ဝင်လာအောင် ဖမ်းပြတာ။ ဖမ်းလည်း ရဲမှူးမိုးကျော်ဟိန်းကို ချိတ်ပီးငွေပေးရင် ပြန်လွှတ်ပေးတယ်။ ဝန်ကြီးချုပ်နဲ့ စစ်တိုင်းမှူးက လိုင်စင်မဲ့ကားဖမ်းတယ်ပဲ ထင်တာ။ အမှန်က လိုင်စင်မဲ့ကားသမားတွေကြောက်ပြီး လိုင်းကြေးဝင်လာအောင် ဖမ်းပြတာ” ဟု ၎င်းကပြောသည်။
တောင်ကြီးမြို့နယ်အတွင်း လိုင်စင်မဲ့ကားများကို သိမ်းဆည်းရာတွင် ငွေကြေးမပေးနိုင်သူများ၏ ကားများကိုသာ အသိမ်းပြကြောင်း၊ ကားတစ်စီးလျှင် ကျပ်သိန်း ၂၀ ခန့် ယာဉ်ထိန်းရဲမှူးထံပေးပါက ဖမ်းသည့်နေရာမှ ရဲကို လှမ်းပြောပြီး ပြန်လွှတ်ပေးကြောင်း ယာဉ်ထိန်းနှင့် နီးစပ်သည့် သတင်းရင်းမြစ်က ပြောသည်။
ဆိုင်ကယ်များဖမ်းပါကလည်း အစီး ၅၀ ဖမ်းလျှင် ၁၅ စီးလောက်သာ တရားစွဲပြီး ကျန်သည်များကို ယာဉ်ထိန်းရုံး၌ပင် ယာဉ်မှုသေးစစ်ကိုင်သည့် ယာဥ်ထိန်းတပ်ဖွဲ့ဝင် (အမည်ဝှက် သီပေါ) က ငွေတောင်းပြီး ရဲမှူးမိုးကျော်ဟိန်းထံ အပ်ကာ ပြန်လွှတ်ပေးကြောင်း ၎င်းသတင်းရင်းမြစ်က ပြောသည်။
တောင်ကြီးမြို့နယ်အတွင်း ယာဉ်ထိန်းရဲမှူးထံ လစဉ်ကြေးပေးကာ လိုင်းဝင်ရန်အတွက် ယာဥ်ထိန်းရဲတပ်ဖွဲ့အတွင်း အမည်ဝှက်များဖြစ်သည့် အင်းသား၊ ကနီ၊ ညောင်ရွှေ၊ မှော်ဘီတို့ထံ ဆက်သွယ်ရကြောင်း၊ ဟိုပုံးဘက်အထွက် ၄ မိုင်ဂိတ်မှ ဗိုလ်နတ်မောက်၊ ထုံးဖိုဂိတ်မှ ဗိုလ်
တင်မောင်၊ ကလောယာဉ်ထိန်းနှင့် နန်းပန်တက်ဂိတ်မှ ယာဥ်ထိန်းတို့က တစ်ရက်လျှင် ယာဉ်ထိန်းရဲမှူး မိုးကျော်ဟိန်းအတွက် ကျပ် ၆ သိန်းစီ ရှာပေးရပြီး လကုန်ပါကလည်း ဂါရဝကြေး သပ်သပ် ထပ်ပေးရကြောင်း ယာဉ်ထိန်းနှင့် နီးစပ်သည့် သတင်းရင်းမြစ်က ပြောသည်။
“သူ့အောက်က ယာဉ်ထိန်းရဲတွေကိုလည်း ငွေရှာပေးနိုင်မှ ကောင်းတဲ့နေရာထားတာ။ မပေးနိုင်ရင် တောင်ကြီးမှာပဲ နေခိုင်းတယ်။ နေပြည်တော်တွဲဖက်ဆို ထည့်တယ်။ သူ့နားလိုင်းကြေးဝင်တဲ့ ကားစာရင်းတွေ အဓိကကိုင်တာ ဒုရဲမှူးစည်သူနဲ့ အင်းသား။ နှစ်စဉ်ကြေးပေးရင် တောင်ကြီးတခရိုင်လုံး အဖမ်းမခံရဖို့ တာဝန်ယူတယ်။ လိုင်းကြေးဝင်ချင်ရင် ဆက်သွယ်လို့ရတာက အင်းသား၊ ရွှေကျင်၊ သီပေါ၊ ညောင်ရွှေ၊ ကနီ။ အိမ်စီးကားက ၅ သောင်းဝန်းကျင် တစ်လကို” ၎င်းက ပြောသည်။
ယင်းရရှိသည့် လိုင်းကြေးများဖြင့် ရဲမှူးမိုးကျော်ဟိန်းသည် တောင်ကြီးရောက်သည့် ၂ နှစ်အတွင်း ဂနိုင်ရေး ဖြူစင်ဓါတ်ဆီဆိုင် အနောက်ရှိ တောင်ပေါ်တွင် အိမ်ဆောက်ပြီးစီးခဲ့သလို ၎င်း၏သား စစ်ဗိုလ်အတွက် ကားနှင့် ၎င်းမိန်းမအတွက် ကားဝယ်ပေးပြီးဖြစ်ကြောင်း၊ ပြောင်းလာစဥ်က စီးစရာကားမရှိသူ ဒုရဲမှူးစည်သူသည်လည်း ယခုအခါ လိုင်စင်ပါ AD Van ဝယ်ထားပြီး ဖြစ်ကြောင်း ယာဉ်ထိန်းသတင်းရင်းမြစ်က မဲခေါင်သို့ ပြောဆိုပြီး ဒေသခံသတင်းရင်းမြစ်များကလည်း အတည်ပြုသည်။
“ရှမ်းပြည်မှာ တောင်ကြီးပဲ အဖမ်းကြမ်းတာ၊ အခြားနေရာတွေ ဒီလောက်မဆိုးဘူး။ အဖမ်းခံရသူအချို့ဆို မရှိမဲ့ ရှိမဲ့၊ မဖြစ်မနေ ကျောင်းသွားဖို့ တောင်ယာအလုပ်သွားဖို့ ဝယ်ထားကြရတာ။ ခုလို လိုင်းကြေးပေးရပြီး တစ်စုတစ်ဖွဲ့ပဲ လုပ်စားခွင့်ရမယ့်အစား ဒေသအတွင်း လိုင်စင်လုပ်ပေးလိုက်ရင် ပြည်နယ်အတွက်လည်း ဝင်ငွေရမယ်၊ သတ်မှတ်နံပါတ်နဲ့ ရာဇဝတ်မှုတွေလည်း ထိန်းနိုင်လာမယ်” ဟု တောင်ကြီးမှ အငြိမ်းစားဝန်ထမ်းတစ်ဦးက အကြံပြုသည်။
စစ်ကောင်စီ ဒုဥက္ကဌမှ တရားမဝင်ကုန်စည်များ ဖမ်းဆီးရန် ညွှန်ကြားပြီးနောက်ပိုင်း တောင်ကြီးတွင် ဟိုပုံး၌ ကုန်တင်ကားကြီးများ စီးရေရာချီကို ဖမ်းဆီးခြင်းနှင့် တောင်ကြီးမြို့ပေါ်၌ ကား၊ ဆိုင်ကယ်များ စီးရေ ရာချီ၊ ထောင်ချီဖမ်းဆီးပြီး ယခုလို ယာဥ်ထိန်းများမှ ကိုယ်ကျိုးရှာ လုပ်စားနေကြခြင်း ဖြစ်သည်။
#MeKongNews
#တောင်ကြီးမြို့နယ်
#ယာဉ်ထိန်းရဲ
#လိုင်စင်မဲ့ယာဉ်
#ရဲမှူးမိုးကျော်ဟိန်း
