မဲခေါင်၊ အောက်တိုဘာ ၇
စစ်ကောင်စီသည် TNLA ထိန်းချုပ်ထားသည့် နမ္မတူမြို့ကို ဆက်တိုက်အပြင်းအထန်ဗုံးကြဲနေသဖြင့် အဆောက်အဦများ ဆိုးရွားစွာပျက်စီးရကြောင်း ဒေသခံများထံမှ သိရသည်။
ယနေ့အောက်တိုဘာ ၇ ရက်၊ နံနက်ပိုင်း ၆ နာရီခွဲခန့်က စစ်ကောင်စီက နမ္မတူမြို့ကိုဗုံးကြဲသဖြင့် ပုဗ္ဗာရုံဘုန်းတော်ကြီးကျောင်းအဆောင်များ အားလုံးပျက်စီးရကြောင်းသိရသည်။
“ရဟန်းသာမဏေတွေက လားရှိူးဘက် ရှောင်ထားကြလို့ အထိအခိုက်မရှိဘူး။ ကျောင်းဆောင်တွေကတော့ အကုန်ပျက်စီးပြီ” ဟု ဒေသခံတစ်ဦးက မဲခေါင်သို့ ပြောသည်။
စစ်ကောင်စီသည် နမ္မတူမြို့ကို အောက်တိုဘာ ၂ ရက်နေ့မှစပြီး ၃ ကြိမ်ဆက်တိုက် ဗုံးကြဲတိုက်ခိုက်နေခဲ့ပြီး မြို့လူထုသည် လားရှိူးမြို့ကဲ့သို့ စစ်ကောင်စီထိန်းချုပ်ပြီး ဗုံးမကြဲနိုင်သည့် ဘေးလွတ်ရာနေရာများသို့ ထွက်ပြေးတိမ်းရှောင်လျက်ရှိကြသည်။
“လားရှိုး၊ ရပ်ကွက် (၁၁)၊ နယ်မြေ၈က လီဆူးနှစ်ခြင်းကျောင်းမှာရော အခြားနေရာတွေမှာရော ရာချီရောက်လာနေပြီ။ သူတို့အတွက် ရိက္ခာအထောက်အပံ့တွေ လိုအပ်နေတယ်” ဟု လားရှိုး FYO လူငယ်အသင်းအဖွဲ့ဝင်တစ်ဦးက မဲခေါင်သို့ပြောသည်။
ပြီးခဲ့သည့် အောက်တိုဘာ ၂ ရက်၊ နံနက်ပိုင်းမှာ စစ်ကောင်စီက နမ္မတူမြို့ ရပ်ကွက် ၈ ထဲကို ဗုံးကြဲတိုက်ခိုက်ခဲ့သဖြင့် သေဆုံးသူ ၄ ဦးနှင့် ဒဏ်ရာရသူ ၆ ဦး ရှိခဲ့ပြီး မနေ့ အောက်ဆိုဘာ ၆ ရက်ကလည်း နမ္မတူမြို့လယ်ကို ဗုံးကြဲတိုက်ခိုက်လို့ နေအိမ် ၁၀ လုံးထက်မနည်း ထိခိုက်ပျက်စီးခဲ့သည်။
စစ်ကောင်စီသည် အောက်တိုဘာ ၁ ရက်က ကျောက်မဲမြို့ကို ပြန်လည်ထိန်းချုပ်နိုင်ခဲ့ပြီးနောက် TNLA ထိန်းချုပ်သည့် သီပေါနှင့် နမ္မတူမြို့များကို လေကြောင်းမှ အပြင်းအထန် ဗုံးကြဲတိုက်ခိုက်နေခြင်း ဖြစ်သည်။
#MeKongNews
#နမ္မတူ
#ပုဗ္ဗာရုံဘုန်းကြီးကျောင်း
#စစ်ကောင်စီ
#ဗုံးကြဲ
