မဲခေါင်၊ စက်တင်ဘာ၂၉
UWSA ထိန်းချုပ်ထားသည့် နမ့်တစ်မြို့တွင် မြေအောက်မှတဆင့် ဥမင်လှိုဏ်ခေါင်းတူးပြီး ရွှေဆိုင်နှင့် မိုဘိုင်းဖုန်းဆိုင်ကို ဖောက်ထွင်းခိုးယူမှု ဖြစ်ပွားခဲ့ကြောင်း မဲခေါင်သို့ ပေးပို့လာသည့် သတင်းအရင်းအမြစ်ထံမှ သိရသည်။
ယမန်နေ့ စက်တင်ဘာလ ၂၈ရက်၊ နံနက်၅ နာရီကျော်က ဖြစ်ပွားခဲ့ခြင်းဖြစ်ပြီး ယင်းဖောက်ထွင်း ခိုးယူခံရမှုကြောင့်ပစ္စည်း တန်ဖိုး ယွမ်ငွေ ၅ သန်းခန့် ဆုံးရှုံးရကြောင်း ဒေသခံများက ပြောသည်။
“တော်တော် အချိန်ယူပြီးတူးထားတာ။ ဆိုင်အောက်ခြေကဖောက်ဝင်တာ၊ CCTV အရတော့ တစ်ယောက်ထဲပဲ။ အေးအေးဆေးဆေးကို ယူနေတာ” ဟု ဒေသခံတစ်ဦးက မှတ်ချက်ပြုသည်။
ယခု မြေအောက်မှ ဖောက်ထွင်းခိုးယူသည့်အမှုမျိုးမှာ “ဝ” ဒေသ အတွင်း ပထမဆုံး ဖြစ်ပွားမှုဖြစ်ပြီး မြေအောက်လှိုဏ်ခေါင်းအတိုင်း အုပ်ချုပ်ရေးရဲများ ရှာဖွေကာ တရားခံအမြန်ဖမ်းဆီးရမိရေး လိုက်လံ စုံစမ်းနေကြောင်း သိရသည်။
နမ့်တစ့်မြို့မှာ MNDAA ထိန်းချုပ် ချင်းရွှေဟော်နှင့် စီးပွားဆက်ဆံမှု များပြားသလို ဟိုပန်၊ တရုတ်နယ်စပ်နှင့်လည်း နီးစပ်သဖြင့် စီးပွားရေးအားကောင်းသည့် မြို့တစ်မြို့ဖြစ်ကြောင်း သိရသည်။
#MeKongNews
#ဝထိန်းချုပ်နယ်မြေ
#နမ့်တစ်မြို့
#ဥမင်လှိုဏ်ခေါင်း
#ဖောက်ထွင်းခိုးယူမှု
#UWSA
