မဲခေါင်၊ စက်တင်ဘာ ၂၆
MNDAA ထိန်းချုပ်ထားသည့် ရှမ်းပြည်မြောက်ပိုင်း၊ သိန္နီမြို့တွင် အဓမ္မပြုကျင့်မှုနှင့် ရာဇဝတ်မှုကျူးလွန်ထားတဲ့ တရုတ်လူမျိုး ၃ ဦးနှင့် ဗမာလူမျိုး ၄ ဦးတို့ကို လူမြင်ကွင်းရှေ့တွင် တရားစီရင်ရာ ၂ ဦးကို သေဒဏ်ချမှတ်ပြီး ယင်းနေရာတွင်ပင် သေဒဏ်စီရင်လိုက်ကြောင်း ဒေသခံများထံမှ သိရသည်။
ယနေ့ စက်တင်ဘာ ၂၆ ရက် နံနက်ပိုင်းက သိန္နီမြို့ ပန်လော့မြို့မဈေးအနီးတွင် ယင်းပြစ်ဒဏ်ချမှတ်ခြင်းနှင့် စီရင်ခြင်းကို အများပြည်သူရှေ့တွင် ပြုလုပ်ခဲ့ပြီး အဓမ္မပြုကျင့်မှု ကျူးလွန်ထားသည့် တရုတ်လူမျိုး ၃ ဦးနှင့် ခိုးမှု၊ လုယက်မှုများ ကျူးလွန်ထားသည့် ဗမာလူမျိုး ၄ ဦးတို့ကို ပြစ်ဒဏ်ချမှတ်ခြင်းဖြစ်ကြောင်း ဒေသခံများက ပြောသည်။
“ပြီးခဲ့တဲ့လက တရုတ်စာသင်တဲ့ဆရာမကို မုဒိန်းကျင့်ပြီးသတ်သွားတဲ့ တရုတ်လည်းပါတယ်။ ၂ ယောက်ကို သေဒဏ်ပေးတယ်။ ၅ ယောက်ကို နှစ်ရှည်ထောင်ဒဏ်တွေချတယ်။ အခမ်းအနားမှာ ဥပဒေကို ဖောက်ပြန်ကျူးလွန်သူ ဘယ်သူမဆို ပြင်းထန်စွာ အပြစ်ပေးခံရမှာဖြစ်ကြောင်း ပြောသွားတယ်” ဟု သိန္နီဒေသခံတစ်ဦးက မဲခေါင်သို့ ပြောသည်။
ယင်းသေဒဏ်စီရင်သည့် အခမ်းအနားကို ဒေသခံလူထုအများအပြား တက်ရောက်ခဲ့ပြီး သေဒဏ်ချမှတ်ခံရသူများကို ယင်းအခမ်းအနား မလှမ်းမကမ်းရှိ သင်္ချိုင်းတွင် သေဒဏ်စီရင်ခဲ့သည်ဟု ဒေသခံက ပြောသည်။
သိန္နီကို စစ်တပ်ကပြန်ပေးရန် တောင်းဆိုနေသော်လည်း MNDAA ကမူ သိန္နီတွင် တရုတ်နိုင်ငံသားစီးပွားရေးသမားများကို လုပ်ပိုင်ခွင့်များချပေးနေသလို ယခုကဲ့သို့ တရားစီရင်မှုများလည်း ပြုလုပ်နေဆဲဖြစ်သည်။
#MeKongNews
#သိန္နီ
#MNDAA
#ကိုးကန့်တပ်ဖွဲ့
#သေဒဏ်
