မဲခေါင်၊ စက်တင်ဘာ ၂၆
စစ်ကောင်စီ စစ်ကြောင်းထိုးနေသည့်အတွက် တောတောင်အတွင်း စစ်ဘေးရှောင်နေရသည့် ရှမ်းပြည်တောင်ပိုင်း၊ ရွာငံမြို့နယ်၊ ကျောက်တောရွာတွင် စစ်ဘေးရှောင်များ နေထိုင်ရာ စခန်းအနီး တောင်ပြိုကျမှုကြောင့် လူ ၁၀ ဦး သေဆုံးသွားခဲ့ကြောင်း ဓနုပြည်နယ် အမျိုးသားကာကွယ်ရေးတပ်တော် – DSDNA မှ ထုတ်ပြန်ထားသည်။
၂၀၂၅ ခုနှစ် စက်တင်ဘာလ ၂၄ ရက်နေ့တွင် ရွာငံမြို့နယ်အတွင်း မိုးသည်းထန်စွာ ရွာသွန်းမှုကြောင့် တောင်ပြိုခဲ့ခြင်းဖြစ်ပြီး တောင်ပြိုကျမှုကြောင့် စစ်ဘေးရှောင်စခန်းတခုလည်း ပါဝင်သွားခဲ့ကာ ရွာသူ၊ ရွာသား ၁၀ ဦးခန့် နှစ်မြှုပ်သွားခဲ့ကာ သေဆုံးခဲ့ခြင်းဖြစ်ကြောင်း DSDNA က ထုတ်ပြန်ထားသည်။
သေဆုံးသူ ၁၀ ဦးတွင် အမျိုးသား ၅ ဦး၊ အမျိုးသမီး ၅ ဦး ပါဝင်ပြီး အသက် ၁၀ နှစ်နှင့် ၇ နှစ်အရွယ် ယောက်ျားလေး ၂ ဦး၊ အသက်တစ်နှစ်အရွယ် မိန်းကလေးတစ်ဦး ပါဝင်ကြောင်း DSDNA ပြန်ကြားရေးက ပြောသည်။
မိုးရွာ၍ မြေသားများ ပျော့အိနေပြီး တောင်ကြားချိုင့်ဝှမ်းထဲသို့ ကျောက်သားနှင့် မြေများပြိုကျခြင်းဖြစ်ပြီးး စခန်းတွင်း နေထိုင်နေသူများအပေါ် မြေသားနှင့် ကျောက်သား တန်ချိန်များစွာ ပိမိကြောင်း၊ လူအားဖြင့် အလောင်းများကို မဖော်နိုင်ဘဲ စက်ယန္တရားများဖြင့်သာ တူးဖော်နိုင်မည်ဖြစ်ကြောင်း၊ စစ်တပ် စစ်ကြောင်းထိုးနေသောကြောင့် တစ်လောင်းကိုသာ ဖော်နိုင်ခဲ့ကြောင်း ၎င်းက ဆိုသည်။
သေဆုံးသူ ၁၀ ဦးမှာ အမျိုးသား ၅ ဦး ဖြစ်ပြီး အသက် ၆၀ နှစ်၊ ၄၅ နှစ်၊ ၂၂ နှစ်၊ ၁၀ နှစ် နှင့် ၇ နှစ်အရွယ်တို့ဖြစ်ကြကာ အမျိုးသမီး ၅ ဦး၊ အသက် ၆၅ နှစ်၊ ၄၇ နှစ်၊ ၃၆ နှစ်၊ ၂၄ နှစ် နှင့် တစ်နှစ်ခွဲအရွယ်တို့ဖြစ်သည်ဟု ဖော်ပြထားသည်။
သေဆုံးသူ ၁၀ ဦးအနက် အသက် ၂၂ နှစ်အရွယ် အမျိုးသားတစ်ဦး၏ အလောင်းကိုသာ ပြန်လည်ရှာဖွေတွေ့ရှိခဲ့ကြောင်း DSNDA ၏ သတင်းနှင့် ပြန်ကြားရေး တာဝန်ခံက ပြောဆိုထားသည်။
ရှမ်းပြည်တောင်ပိုင်း၊ ရွာငံမြို့နယ်၊ ကျောက်တောရွာဖက်တွင် စစ်ကောင်စီဘက်မှ လက်နက်ကြီးဖြင့် ပစ်ခတ်ခြင်း၊ လေယာဉ်ဗုံးကြဲခြင်းနှင့် ခြေလျင်စစ်ကြာင်းထိုးမှုများကြောင့် ပြည်သူများ တောတောင်ထဲတွင် ခိုအောင်းနေကြရခြင်း ဖြစ်သည်။
ကျောက်တောကျေးရွာမှ ဒေသခံ ၄၀၀ ကျော်သည် စစ်တပ်က ရွာကိုမီးရှို့ပြီး စစ်ကြောင်းထိုးနေသည့်အတွက် တောတောင်များတွင် ပုန်းခိုနေရာမှ ၆ ဦးမှာ စက်တင်ဘာ ၁၄ ရက်က စစ်တပ်မှ လှိုဏ်ခေါင်းအတွင်း ရှာဖွေဖမ်းဆီးသွားခဲ့သည့် ဖြစ်စဉ်အပြီး ယခုကဲ့သို့ စစ်ရှောင်များ တောင်ပြိုမြေပိကာ သေဆုံးသည့်ဖြစ်စဉ် ထပ်မံဖြစ်ပွားခြင်း ဖြစ်သည်။
#MeKongNews
#ရှမ်းပြည်တောင်ပိုင်း
#ရွာငံမြို့နယ်
#စစ်ဘေးရှောင်
#တောင်ပြိုမှု
#လူသေဆုံး
#DSNDF
#DSNDA
