မဲခေါင်၊ စက်တင်ဘာ ၁၇
စစ်ကိုင်းငလျင်ဘေးဒဏ်သင့်ခဲ့သည့် ရှမ်းပြည်တောင်ပိုင်း၊ အင်းလေးဒေသမှ နေအိမ်များအတွက် စစ်ကောင်စီကပေးသည့် ထောက်ပံ့ကြေးများကို ကျေးရွာအုပ်ချုပ်ရေးပိုင်းမှ အလွဲသုံးစားပြုလုပ်နေကြောင်း ဒေသခံများက မဲခေါင်သို့ ပြောသည်။
ကျေးရွာအုပ်ချုပ်ရေးပိုင်းက မမှန်မကန် ပြုလုပ်မှုကြောင့် ပထမအကြိမ် အလှူရှင်များ လာရောက်လှူဒါန်းစဉ်ကလည်း အကူအညီမရခဲ့သလို ယခုတစ်ကြိမ် စစ်ကောင်စီက ပေးသည့် ထောက်ပံ့ကြေးတွင်ပါ မရသူများရှိကြောင်း အင်လေးဒေသ၊ နန်းပန်မြို့ အမှတ် ၂ အကွက်၊ ပေါက်ပါးရပ်နေသူတစ်ဦးကပြောသည်။
“မတ်လ ၂၈ ရက်က လှုပ်ခတ်ခဲ့တဲ့ ငလျင်ဒဏ်ကြောင့် ရွာက ၄၃ အိမ် ပြိုလဲ ပျက်စီးတယ်။ ဒါပေမယ့် ၉၂ အိမ် ဆိုပြီး စာရင်း တင်ထားခဲ့ပါတယ်။ တချို့အိမ်တွေ မပြိုပေမယ့် နေမရတဲ့အထိ ယိုယွင်းသွားတယ်။ ဒါပေမယ့် ၉၂ အိမ်စာရင်းမှာ မပါဘူး။ အခုတစ်ကြိမ်မှာလည်း ၇၂ အိမ် စာရင်းထပ်တင်တယ်။ ဒါပေမယ့် အဲဒီအိမ်တွေ ပါဘူး” ဟု ၎င်းက ပြောသည်။
ယခုတစ်ကြိမ် စစ်ကောင်စီက ပေးသည့် ထောက်ပံ့ကြေးတွင် နှစ်ထပ်သစ်သားအိမ်တစ်လုံးလျှင် ကျပ်သိန်း ၁၈၀၊ ခြေတံရှည် သစ်သားအိမ်တစ်လုံးလျှင် ကျပ်သိန်း ၁၀၀ နှင့် ဝါးအိမ်တစ်လုံးလျှင် ကျပ်သိန်း ၂၀ ပေးခြင်းဖြစ်သည်။
အချို့သော နေအိမ်များမှာ မူလက သစ်သားအိမ်ဖြစ်သော်လည်း ငလျင်ဒဏ်ကြောင့် ပျက်စီးပြီးနောက် ငွေကြေးမတတ်နိုင်သဖြင့် ဝါးအိမ်အဖြစ် ယာယီပြန်ဆောက်ထားသည်များရှိကြောင်း၊ ယင်းအိမ်များကို စာရင်းတင်ရာတွင် သစ်သားအိမ်အဖြစ် စာရင်းတင်ပြီး ပြည်သူလူထုထံ ပြန်ပေးသည့်အခါ ဝါးအိမ်အဖြစ်သာ ထောက်ပံ့ကြေးပေးကြောင်း အင်းလေးဒေသ၊ ပေါက်ပါးအရပ်နေသူများက ပြောသည်။
အလားတူ အိုင်ထောင့်ကြီးရွာတွင်လည်း ထောက်ပံငွေများကိုရွာအုပ်ချုပ်ရေးမှူး ဦးခင်မောင်၊ ဆယ်အိမ်မှူး ဦးစိုးမင်းနှင့် အတွင်းရေးမှူး မအေးအေးဝင်းတို့က လက်ဝါးကြီးအုပ်လုပ်စားနေသည် ဟု ဒေသခံတစ်ဦးက မဲခေါင်ကို ပြောသည်။
“သစ်အိမ်က နှစ်ထပ်ဆို သိန်း ၁၈၀၊ တစ်ထပ်ဆို သိန်း ၁၀၀၊ ဝါးအိမ်ဆို သိန်း ၂၀ ထောက်ပံတာကို ဝါးအိမ်အနေနဲ့ သိန်း ၂၀ ပဲပေးတယ်။ အမှန်တရားအတွက် ကူညီပေးစေချင်ပါတယ်” ဟု ၎င်းက ပြောသည်။
ယင်းအိုင်ထောင့်ကြီးကျေးရွာ၌ ငလျင်ဒဏ်ခံအိမ် ၂၆၈ အိမ်အတွက် ထောက်ပံ့ငွေ ကျပ် သန်း ၁၃၆၆ ဒသမ ၅၂သန်း ရရှိသော်လည်း ပြည်သူလူထုထံ အပြည့်အဝပေးခြင်းမရှိကြောင်း၊ အလှူငွေ ပေးသည့်နေ့တွင်လည်း ရွာသားများအပေါ် တစ်အိမ်ထောင်ကို စာရွက်စာတမ်းကြေးနှင့် Kpay ထုတ်ခဟုဆိုကာ ကျပ် ၅ ထောင်စီ ကောက်ခံကြောင်း အိုင်ကြီးထောင့် ဒေသခံများက ပြောသည်။
စစ်ကိုင်းငလျင်ကြီးအတွင်း အင်းလေးကန်ဒေသ ငလျင်ဒဏ်သင့် ရွာ ၂၃ ရွာမှ ထိခိုက်ပျက်စီးခဲ့ရသည့် အိမ်ခြေ ၃၈၅၀ အနက် နန်းပန်၊ ပေါက်ပါးရွာမှ အိမ်ခြေ ၂၂၀ အိမ်၊ အိုင်ထောင့်ကြီးရွာမှ အိမ်ခြေ ၂၅၀ အိမ်ရှိခဲ့ကြောင်း Hand to Hand Charity Myanmar အဖွဲ့မှပြုစုထားသည့် မှတ်တမ်းအရ သိရသည်။
ယခုလက်ရှိ ငလျင်ကြီးလှုပ်ခတ်အပြီး ၅ လကျော်အကြာတွင် စစ်ကောင်စီက ငလျင်ဒဏ်သင့်ပြည်သူများကို ထောက်ပံကြေးပေးသည့်အပေါ် ဒေသအုပ်ချုပ်ရေးပိုင်းမှ မသမာမှုများ ဖြစ်ပေါ်နေသည်ကို ပြည်သူများက ဝေဖန်ပြောဆိုနေကြခြင်း ဖြစ်သည်။
ပြီးခဲ့သည့် စက်တင်ဘာ ၁၁ ရက်ကလည်း အင်းလေးဟဲယားရွာမ၌ အလားတူကိစ္စရပ်မျိုးရှိခဲ့ရာ ငလျင်ဒဏ်ခံ ရွာပေါင်း ၂၃ ရွာအနက် ယခုလိုအုပ်ချုပ်ရေးပိုင်းက မသမာမှုရှိကြောင်း မဲခေါင်သို့ ပြောကြားသည့် ရွာပေါင်း ၃ ရွာ ရှိလာနေပြီ ဖြစ်သည်။
#MeKongNews
#အင်းလေးငလျင်ဘေးသင့်
#ပြည်သူ
#ထောက်ပံကြေး
#စစ်ကောင်စီ
#နန်းပန်ရွာ
