မဲခေါင်၊ စက်တင်ဘာ ၂
သတင်းစာကြေးယူပြီး သတင်းစာမရခြင်းအပါအဝင် ရှမ်းပြည်အရှေ့ပိုင်း၊ မိုင်းဆတ်မြို့ရှိ စစ်လက်နက်ပစ္စည်းတပ် ၃၄၆ တွင် ရုံးအုပ် ဒုအရာခံဗိုလ် နေဝင်းအောင်နှင့် ရိက္ခာစတိုကိုင် တပ်ကြပ်ကြီး နန်းဝင်းတို့ ပူးပေါင်းကာ မတရားခေါင်းပုံဖြတ်နေကြောင်း ယင်းတပ်နှင့် နီးစပ်သည့် အသိုင်းအဝိုင်းက ရင်ဖွင့်သည်။
၎င်းတို့ ၂ ဦးမှာ စစ်သားနှင့် စစ်သားမိသားစုဝင်များ၏ လစာ၊ ရိက္ခာ၊ ဘဏ်စုငွေ၊ ဦးပိုင် များအပေါ် မတရား ခေါင်းပုံဖြတ်နေခြင်းဖြစ်ပြီး တိုင်ကြားသူကို အရေးယူမည်ဟု ခြိမ်းခြောက်ထားကြောင်း စစ်သားမိသားစုဝင်နှင့် နီးစပ်သူတစ်ဦးက ပြောသည်။
“သတင်းပို့ရင်လည်း အထက်က လူကြီးကိုယ်တိုင် ချမှတ်ထားတာလို့ ပြောပါတယ်။ အုတ်နံရံကို ခေါင်းနဲ့ ဝင်မတိုက်ချင်ကြနဲ့လို့ လည်းပြောပါတယ်။ ရဲဘော်ရဲမေတွေကို တန်းစီပြီး သတင်းပေါက်ကြားရင် အရေးယူမယ် ဆိုပြီး ခြိမ်းခြောက်တာတွေပါ လုပ်ထားတာရှိတယ်။ အများကြီး” ဟု ၎င်းက မဲခေါင်သို့ ပြောသည်။
လစာနှင့် ပတ်သက်၍ လစာမှ အစွန်းထွက်ငွေများကို ထုတ်မပေးဘဲ ဖြတ်တောက်ထားကြောင်း၊ စစ်ပြေး လစာများလည်း အပြေးမပြဘဲ ထုတ်စားနေကြောင်း သိရသည်။
ဦးပိုင်ဖြတ်ငွေလည်း ဖြတ်သလောက် မဝင်သလို လစဉ်သတင်းစာကြေးဖြတ်ပြီး သတင်းစာမဖတ်ရကြောင်း၊ ကြက်သား၊ ငါးများ မယူမနေရပေးပြီး လစာထုတ်လျင် အကုန်ဖြတ်ချကြောင်း၊ ရိက္ခာလည်း ၂၈ရက်စာ အပြည့်ဝမရကြသလို မီး၊ ရေ၊ အိမ်သာ ပျက်စီးပါကလည်း ကိုယ့်ဘာသာပြင်ခိုင်းကြောင်း မိုင်းဆတ် စစ်လက်နက်တပ်အသိုင်းအဝိုင်းမှ သိရသည်။
“အမျိုးသမီးထောက်ပံ့ငွေ တစ်သိန်းကိုလည်း လတိုင်းဟိုကြေးဒီကြေးဆိုပြီး ဖြတ်ချတယ်။ အလုပ်သမား ရဲမေ စာရင်းလည်း ၁၀ ယောက်တင်ပြီး တကယ်လုပ်တာ ၄ ယောက်တည်းပဲရှိတယ်။ လူကြီးနဲ့ သူ့လူတွေ ပေါင်းပြီး လုပ်နေကြတာပါ။ အကျင့်ပျက်ခြစားနေပါတယ်။ တပ်မှူးက အေးဆေးသမား ဘာဘဲပြောပြော ထိထိရောက်ရောက်အရေးမယူပေးဘူး၊ သူတို့က သူ့ဌာနနဲ့သူ အကုန် လက်ဝါး ကြီးအုပ်ထားတာ” ဟု သတင်းရင်းမြစ်တစ်ဦးက ပြောသည်။
ရိက္ခာ ကိုင်သည့် နန်းဝင်းကလည်း ရိက္ခာ အပြည့်မပေးဘဲ နေသည်မှာ နှစ်ချီနေပြီဖြစ်ကြောင်း၊ တပ်လည်း လုံးဝမပြောင်းကြောင်းနှင့် ရာထူးတိုးလည်း လုံးဝမတင်ကာ ရဲဘော်ရဲဘက် အချင်းချင်း မတရား လုပ်စားနေကြောင်း စွပ်စွဲသည်။
စစ်လက်နက်ပစ္စည်းတပ်ခွဲသည် စစ်တပ် ၏ လက်ရုံးတပ် တစ်ခုဖြစ်ပြီး တြိဂံဒေသစစ်တိုင်းအုပ်ချုပ်ရေး လက်အောက်ခံ ဖြစ်ကာ မိုင်းဆတ် စကခ ၁၄ တပ်နယ်ရှိ တပ်များသို့ စစ်လက်နက်ခဲယမ်းများ ဖြန့်ဖြူးပေးရသည့် တပ်ဖြစ်ကြောင်း သိရသည်။
#MeKongNews
#မိုင်းဆတ်
#ရှမ်းအရှေ့
#စစ်လက်နက်တပ်
#မတရားမှု
