မဲခေါင်၊ သြဂုတ်၂၈
ရှမ်းပြည်တောင်ပိုင်း၊ မိုင်းရယ်မြို့တွင် လူသတ်ပြီးထွက်ပြေးနေသည့် သံသယရှိသူ ၂ဦးကို တာချီလိတ်မြို့တွင် ဖမ်းဆီးရမိကြောင်း ဟောင်လိတ်ရဲစခန်းနှင့် နီးစပ်သူထံမှ သိရသည်။
မိုင်းရယ်မြို့တွင် ဇွန်လအတွင်း သတ်ဖြတ်ခံရသူ စိုင်းနောင့်ဦးကို သတ်သူဟု သံသယရှိသူ ၃ဦးထဲမှ စိုင်းဆိုင်လောင်အား သြဂုတ်လ၂၄ရက်တွင် မိုင်းရယ်မြို့၌ ဖမ်းမိခဲ့ပြီး ၎င်း၏ ထွက်ဆိုချက်အရ ကျန် ၂ဦးဖြစ်သည့် ငြိမ်းချမ်းဦး(ခ)သန်းစိန်နှင့် စိုင်းဆိုင်လောင်တို့အား တာချီလိတ်မြို့၊ ပါဆပ်ရပ်ကွက်ရှိ လိုင်းခန်းငှားတွင် ဖမ်းဆီးရမိခြင်းဖြစ်သည်။
၎င်းတို့အား ဖမ်းဆီးစဥ် စိုင်းဆိုင်လောင်အိပ်သည့် ခေါင်းအုံးအောက်မှ CZENCH နိုင်ငံထုတ် CZ 75P-019 luger အမျိုးအစား အနက်ရောင်ပစ္စတို သေနတ်တစ်လက်၊ ကျည်(၈)တောင့်ကို ကျည်အိမ်အတွင်းထည့်လျှက် တွေ့ရှိသိမ်းဆည်းရမိ ကြောင်းသိရသည်။
ဖြစ်စဥ်မှာ မိုင်းရယ်မြို့တွင် ပြီးခဲ့သည့် ဇွန်လ ၂၀ရက်နေ့က ပျောက်ဆုံးသွားသည့် စိုင်းနောင်ဦးကို ဇွန်လ ၂၅ရက်နေ့၌ မိုင်းရယ်မြို့နယ်၊ ဝမ်ပုံကျေးရွာအနီး ကားလမ်းဘေးလက်ဖက်ခြံအတွင်း၌ သေဆုံးနေပြီး မြေတပိုင်းတစ မြုပ်နှံထားသည်ကို တွေ့ရှိခဲ့ရခြင်းဖြစ်သည်။
၎င်းလူသေအလောင်းကို ဆေးရုံသို့ ပို့ဆောင်စစ်ဆေးရာ ဘယ်ဘက်နားထင်အထက် ဦးခေါင်းခွံ ကွဲချိုင့်ဒါဏ်ရာ၊ ဘယ်ဘက်တံတောင် ဖူးရောင်ဒါဏ်ရာများဖြင့် သေဆုံးကြောင်းတွေ့ရှိရသဖြင့် မိုင်းရယ်မြို့မရဲစခန်းတွင် အမှု့ဖွင့်ဆောင်ရွက်ခဲ့ထားရာမှ လူသတ်တရားခံအဖြစ် သံသယရှိသူများကို ၂လအကြာတွင် ဖမ်းဆီးရမိခဲ့ခြင်းဖြစ်သည်။
လက်ရှိတွင် ဟောင်လိတ်နယ်မြေရဲစခန်း၌ ဖမ်းဆီးစစ်ဆေးနေပြီး အမှုမှ သံသယတရားခံ ငြိမ်းချမ်းဦး(ခ) သန်းစိန်နှင့် စိုင်ဆိုင်လောင် တို့ ၂ဦးအား မိုင်ရယ်မြို့မစခန်းသို့ လွှဲပြောင်းပေးနိုင်ရေး စီစဥ်ဆောင်ရွက်လျှက်ရှိကြောင်း သိရှိရသည်။
#MeKongNews
#တာချီလိတ်
#မိုင်းရယ်
#လူသတ်မှု
#ဟောင်လိတ်နယ်မြေရဲစခန်း
