မဲခေါင်၊ သြဂုတ် ၂၈
TNLA နှင့် MNDAA ပူးတွဲထိန်းချုပ်နယ်မြေဖြစ်သည့် ရှမ်းပြည်မြောက်ပိုင်း၊ ကွတ်ခိုင်မြို့နယ်ရှိ စာသင်ကျောင်း အားလုံး ဩဂုတ်လ ၂၇ ရက်နေ့ကစပြီး ၅ ရက်ကြာ ပိတ်ခိုင်းထားကြောင်း ဒေသခံများထံမှ သိရသည်။
စာသင်ကျောင်းများ ပိတ်ရန် TNLA က ညွှန်ကြားထားခြင်းဖြစ်ပြီး TNLA လက်အောက်ခံ စာသင်ကျောင်း မဟုတ်သည့် အခြားစာသင်ကျောင်းများ အားလုံးကိုလည်း အလားတူ ပိတ်ထားကြောင်း ဒေသခံတစ်ဦးကပြောသည်။
“ဘာကြောင့်ပိတ်တယ် မသိရဘူး။ တရုတ်မှာ ဆွေးနွေးနေတယ်လည်း ကြားရတယ်” ဟု ၎င်းက မဲခေါင်သို့ပြောသည်။
လက်ရှိ ကူမင်းသို့ TNLA ခေါင်းဆောင်ပိုင်းများ သွားရောက်နေကြောင်း ကွတ်ခိုင် TNLA အုပ်ချုပ်ရေးပိုင်းက ကြားသိရသည် ဟု ဒေသခံများကပြောသည်။
၎င်းအပြင် ယမန်နေ့ ဩဂုတ်လ ၂၇ ရက်နေ့ မနက် ၈ နာရီခန့်ကစပြီး ကွတ်ခိုင်ရှိ MNDAA လက်အောက်ခံ ရဲတပ်ဖွဲ့ရုံးတွင် မြန်မာအလံ လွှင့်ထူထားတာကို တွေ့ရကြောင်း ဒေသခံများက ပြောသည်။
“လိုင်းပေါ်ကအတိုင်းပဲ ကြားတယ်။ TNLA က ကျောက်မဲ၊ သီပေါ၊ မိုးကုတ်၊ ကွတ်ခိုင်တွေက ဆုတ်ပေးမယ်။ နမ့်ဆန်၊ နမ္မတူ၊ မန်တုံ၊ မိုင်းငေါ့၊ မိုးမိတ်၊ မိုင်းလုံ၊ နမ့်ခမ်းတို့ကို ပလောင်ပြည်နယ် သတ်မှတ်ပေးဖို့နဲ့ အကြမ်းဖက်စာရင်းက ပယ်ဖျက်ဖို့ တောင်းတယ် ကြားတယ်။ အလားတူပဲ ကိုးကန့်က သိန္နီ၊ သီပေါတွေကို ပူးတွဲအုပ်ချုပ်ခွင့်တောင်းတာ စစ်တပ်က အလျော့မပေးဘူး။ လောက်ကိုင်၊ ကုန်းကြမ်း၊ ချင်းရွှေဟော် ၃ မြို့ပဲ ရမယ် ကြားတယ်” ဟု MNDAA နှင့် နီးစပ်သူတစ်ဦးက မဲခေါင်သို့ ပြောသည်။
လက်ရှိ ကျောက်မဲတွင် TNLA နှင့် စစ်ကောင်စီတပ် အတက်အဆုတ်မရှိပဲ နောင်ပိန်တွင်ပင် စစ်ဆိုင်နေကြကြောင်း ဒေသခံများထံက သိရသည်။
စစ်ရေးအကဲခတ် တစ်ဦးကမူ “မိုးကုတ်-နောင်ချိုကြား စစ်တပ်က တော်တော် ခရီးပေါက်နေတယ်။ ကျောက်မဲလဲ ဒီအတိုင်းဆို တောင့်မခံနိုင်ဘူး။ ၂၆ ရက်နေ့က လားရှိုးဖက်ကနေ စစ်ရေးပြင်ဖို့ တန့်ယန်းဖက်က စစ်တပ်ယာဉ်တန်း တက်သွားတာ ရှိတယ်။ တန့်ယန်း-လားရှိုးကြားက ကိုးကန့် အထိုင်ယူထားတဲ့ ရွာတွေအကုန် တိတ်နေတယ်။ ကိုးကန့်လဲ ပလောင် အရေးမှာ ဝင်မပါရဲဘူး” ဟု ပြောသည်။
အခြားစစ်ရေးသတင်းအရင်းအမြစ်အရ MNDAA က သိန္နီကို ပြန်ပေးရလျှင် သို့မဟုတ် သီပေါဘက်မှ နယ်မြေများ ပြန်ပေးရလျှင် စစ်ကောင်စီ၏ စကခ ၁၄ သည် လတ်တလော လက်နက်အင်အားအပြည့်ဖြင့် ထိုးစစ်ဆင်လာနိုင်သည်ဟု ခန့်မှန်းသည်။
အလားတူ နမ့်လန်မှလည်း သီပေါသို့ စစ်ကြောင်းတက်လာနိုင်ပြီး သီပေါမှတဆင့် ကျောက်မဲကို ဝိုင်းပတ်နိုင်သည်ဟု ဆိုသည်။
စစ်ကောင်စီအနေဖြင့် ကူမင်းဆွေးနွေးပွဲတွင် တရုတ်၏ဖိအားဖြင့် MNDAA နှင့် TNLA ကို လိုက်လျောမှုမပေးဘဲ နိုင်ငံရေးအရ မရပါက စစ်ရေးနည်းဖြင့် ရယူရန် ကြိုးပမ်းနေပြီး MNDAA နှင့် TNLA ဘက်ကမူ တရုတ်ဖိအားကြောင့် အကြပ်အတည်း အပြင်းအထန် ကြုံတွေ့ နိုင်ဖွယ်ရှိနေကြောင်း နိုင်ငံရေးအကဲခတ်များက သုံးသပ်နေကြသည်။
#MeKongNews
#TNLA #MNDAA
#ရှမ်းမြောက်
#ကျောက်မဲ
#သီပေါ
#နိုင်ငံရေး
