မဲခေါင်၊ ဩဂုတ် ၂၇
ဩဂုတ် ၂၆ ရက်က ထိုင်းအစိုးရအဖွဲ့အစည်းအဝေးကျင်းပပြီးနောက် မြန်မာ ဒုက္ခသည်များအား အလုပ်လုပ်ခွင့်ပါမစ်ပေးပြီး ဒုက္ခသည်စခန်းမှ ထွက်ခွာသွားလာခွင့်ပေးကာ အလုပ်လုပ်ခွင့်ပြုကြောင်း အတည်ပြုထုတ်ပြန်ခဲ့သည်။
နယ်စပ်အငြင်းပွားနယ်မြေကြောင့် ကမ္ဘောဒီးယားနှင့် ၅ ရက်တာ နယ်စစ်စစ်ပွဲဖြစ်ပွားအပြီး ကမ္ဘောဒီးယားလုပ်သားများစွာ ထိုင်းမှပြည်တော်ပြန်သွားသဖြင့် ပြည်ပလုပ်သားများကို အဓိက အားထားနေသည့် ထိုင်းစီးပွားရေးလုပ်ငန်းများ လည်ပတ်နိုင်ရန် အခက်တွေ့နေခဲ့ရသည်။
ထို့ကြောင့် နည်းလမ်းပေါင်းစုံဖြင့် အားချင်းဖြေရှင်းနိုင်ရန် ထိုင်းအစိုးရအဖွဲ့က အစည်းအဝေးကျင်းပခဲ့ရာ မြန်မာနိုင်ငံအတွင်း ပဋိပက္ခအမျိုးမျိုးကြောင့် ထိုင်း ဒုက္ခသည်စခန်းများတွင် လာရောက်နေထိုင်နေသူများကို အလုပ်လုပ်ခွင့်ပါမစ်ထုတ်ပေးပြီး လိုအပ်သည့် အလုပ်နေရာများ၌ လုပ်ပိုင်ခွင့်ပြုမည်ဖြစ်ကြောင်း အတည်ပြုထုတ်ပြန်ခဲ့ခြင်း ဖြစ်သည်။
အလုပ်သမားဝန်ကြီး ဖွန်ခွင်က မယ်ဟောင်ဆန်၊ တာ့ခ်၊ ကန်ချနာဘူရီနှင့် ရတ်ချာဘူရီခရိုင် ၄ ခုမှ ဒုက္ခသည်စခန်းပေါင်း ၉ ခုစလုံးမှ မြန်မာဒုက္ခသည်များကို ခရိုင်ထွေအုပ်ရုံးတွင် မှတ်ပုံတင်ပြီးပါက အထူးခွင့်ပြုချက်အဖြစ် ထိုင်းနိုင်ငံအတွင်း အလုပ်သမားအဖြစ် တစ်နှစ် နေထိုင်လုပ်ကိုင်ခွင့်ပေးမည် ဖြစ်ကြောင်းပြောသည်။
သို့သော် ဒုက္ခသည်စခန်းမှ ထွက်ခွာခွင့်လျှောက်လွှာခနှင့် အလုပ်လုပ်ခွင့်ပါမစ်များ အတွက်မူ သတ်မှတ်နှုန်းထားများအတိုင်း ပေးသွားရမည်ဖြစ်ကာ နိုင်ငံခြားသားများမလုပ်ရဟု တားမြစ်ထားသော အလုပ်များမှလွဲ၍ ကျန်အလုပ်များကို လုပ်ကိုင်နိုင်ကြောင်း၊ ကျန်းမာရေး အာမခံကို လည်း ကျန်းမာရေးဝန်ကြီးဌာနထံ လျှောက်ထားရမည်ဖြစ်ကာ ပထမဆုံး အလုပ်လုပ်ခွင့်ပါမစ် လျှောက်ထားသူများ ငွေကြေးမတတ်နိုင်မည်စိုးသဖြင့် ၎င်းတို့ကို အလုပ်လုပ်ခွင့်ပါမစ်ခ မပေးစေကြောင်း ထုတ်ပြန်ကြေညာခဲ့သည်။
မြန်မာဒုက္ခသည်စခန်းများတွင် မှတ်ပုံတင်ထားပြီး နေထိုင်သူပေါင်း ၄၂၀၀၀ ရှိရာ စစ်ဆေးခြင်းမရှိသော တရားမဝင်လုပ်သားများ ခေါ်ယူခန့်အပ်နေခြင်းများကိုမူ ပြည်သူများက သတင်းပေးတိုင်ကြားနိုင်သည် ဟုလည်း အလုပ်သမားဝန်ကြီးက ဆိုသည်။
ထိုင်းတည်ဆဲဥပဒေတွင် အလုပ်လုပ်ခွင့်ပါမစ်မရှိဘဲ နိုင်ငံအတွင်း အလုပ်လုပ်ကိုင်သည့် ပြည်ပသားအား ဒဏ်ငွေ ဘတ် ၅၀၀၀ မှ ၅၀၀၀၀ အထိ တပ်ရိုက်ခွင့် ရှိသလို ပြည်တော်ပြန်ပို့ခွင့်ပါ ရှိသည်။
တရားမဝင် ပြည်ပအလုပ်သမားများအား ခေါ်ယူအလုပ်ပေးသည့် လုပ်ငန်းရှင်များကိုလည်း ဥပဒေအရ တစ်ယောက်ခန့်ထားမိလျှင် ဒဏ်ငွေ ဘတ် ၁၀၀၀၀ မှ ၁၀၀၀၀၀ အထိ ချမှတ်နိုင်ပြီး ထပ်ကာ ချိုးဖောက်မိလျှင် ထောင်ဒဏ် ၁ နှစ် သို့မဟုတ် ဒဏ်ကြေး ဘတ် ၅၀၀၀၀ မှ ၂၀၀၀၀၀ ကြား တပ်ရိုက်နိုင်ကာ ပြည်ပအလုပ်သမား ခေါ်ယူခန့်အပ်ခွင့် ၃ နှစ်ပါ ပိတ်ပင်ကြောင်း သိရသည်။
လက်ရှိ ထိုင်းတွင် နေထိုင်ပြီး တရားဝင်အလုပ်လုပ်ခွင့်လျှောက်ထားသူပေါင်း ၂ သန်းကျော်ရှိကာ ကမ္ဘောဒီးယား၊ လာအို၊ ဗီယက်နမ် တို့မှ ၁၈၀၂၈၈ ဦးကို ခွင့်ပြုပေးခဲ့ပြီး ကမ္ဘောဒီးယား ၁၉၃၃၃ ဦးနှင့် မြန်မာ ၁၈၂၉၃၇၉ ဦး၏ လျှောက်လွှာများကို ဆိုင်းငံ့ထားဆဲဖြစ်ကြောင်း သိရသည်။
ကိုကလင်း
Ref: Khaosod
#MeKongNews
#ထိုင်းနိုင်ငံ
#အလုပ်သမား
#ဒုက္ခသည်စခန်း
#မြန်မာနိုင်ငံသား
