မဲခေါင်၊ သြဂုတ် ၂၆
စစ်ကောင်စီ စစ်ကြောင်းထိုးနေသည့် ရှမ်းပြည်မြောက်ပိုင်း၊ ကျောက်မဲမြို့နယ်၊ နောင်ပိန်ကြီး ၄ ရပ်ကွက်တွင် တိုက်ပွဲအတွင်း ပိတ်မိနေဆဲ ဒဏ်ရာရပြည်သူများ ဆေးကုသမှု မရသဖြင့် စိုးရိမ်နေရသည်ဟု ပရဟိတအဖွဲ့များထံမှ သိရသည်။
ပိတ်မိနေသူ ၉ ဦးမှာ ကလေး ၃ ဦးနှင့် သက်ကြီးရွယ်အိုများဖြစ်ပြီး ၎င်းတို့အနက် ကလေး ၂ ဦးနှင့် သက်ကြီး ၁ ဦးသာ လွတ်ပြီး ကျန်သူ ၆ ဦး ထိထားကြောင်း သိရသည်။
“ပေါင်ထိထားတဲ့ အမျိုးသမီးနဲ့ လက်ထိထားတဲ့ကလေးက စိုးရိမ်ရတယ်။ သေသူကိုလည်း ကျန်ရှိနေတဲ့ မိတ်ဆွေတွေက ကောင်းမွန်စွာ သဂြိုလ်ပေးခဲ့တယ်လို့ သိရတယ်။ ဒဏ်ရာရကလေးမလေး အထပ်ထပ်အခါခါ မှာတဲ့ စကားသံလေးကတော့ ဦးလေးရယ် ဝင်လို့ရရင် သမီးတို့ကို အရင်လာခေါ်ပေးပါ ဆိုတဲ့ စကားပဲ” ဟု ပရဟိတအဖွဲ့ဝင်တစ်ဦးက ပြောသည်။
စစ်ကောင်စီ စစ်ကြောင်း၏ ပစ်ခတ်နေမှုများကြောင့် ပရဟိတကားများ ဝင်မရသော်လည်း လူဖြင့် ကယ်ထုတ်နိုင်ရေး ဆက်သွယ်ကြိုးပမ်းနေကြောင်း ၎င်းက ဩဂုတ်လ ၂၅ ရက် ညနေပိုင်းတွင် ဆိုသည်။
“Drone တွေ ဆက်တိုက်ဝဲပြီး လက်နက်ကြီးတွေ ဆက်တိုက်ထု၊ လေကြောင်းက ဆက်တိုက်ဗုံးကြဲနေတာ ပရဟိတအဖွဲ့တွေက ဒီဖြစ်စဥ်ကို မသိလို့ မဟုတ်ဖူး။ ကယ်ထုတ်လို့ မရကြတာပါ” ဟု ပရဟိတအဖွဲ့ဝင်က ဆိုသည်။
စစ်ကောင်စီတပ်သည် နောင်ပိန်တွင် စစ်ရင်ဆိုင်ထားပြီး ကျောက်မဲကို လေယာဥ်ဖြင့် ဗုံးကြဲတိုက်ခိုက်ရာ သြဂုတ်လ ၂၅ ရက် နံနက် ၁၁ နာရီ ၁၅ ခန့်တွင် အမှတ် ၇ ရပ်ကွက်နှင့် ဆက်စပ်နေသည့် ပိန္နဲကုန်း ဝါဆိုကျောင်းကို ပေါင် ၂၅၀ ဗုံး ၂ လုံး ကြဲချ တိုက်ခိုက်ခဲ့သည်။
ယင်းတိုက်ခိုက်မှုကြောင့် သာမဏေ ၃ ပါးနှင့် အမျိုးသား ၁ ဦး ထိမှန် ဒဏ်ရာရရှိခဲ့ပြီး နေအိမ် ၂၂ အိမ်၊ ကျောင်းဆောင် ၄ ဆောင်၊ ကား ၂ စီး ထိခိုက်ပျက်စီးသွားခဲ့သည်ဟု TNLA ပြန်ကြားရေးက ထုတ်ပြန်သည်။
၎င်းပြင် ဩဂုတ်လ ၂၄ ရက်၊ နေ့လယ်ပိုင်းကလည်း ကျောက်မဲမြို့နယ်၊ လုံကြိမ်(ကျောင်းကုန်း) ကျေးရွာကို အကြမ်းဖက်စစ်တပ်က လေယာဉ်ဖြင့် ပေါင် ၅၀၀ ဗုံးကျဲချသဖြင့် ပြည်သူ ၂ ဦး သေဆုံးခဲ့ကြောင်း သိရှိရသည်။
လုံကြိမ်ရွာမှာ ဂုတ်ထိပ်တံတား အလွန်တွင်ရှိပြီး ယင်းမှ ဇီးပင်၊ နောင်ပိန်၊ ပင်တိန်ရွာများသို့ ရောက်ရှိသည်ဟု ဒေသခံတစ်ဦးကပြောသည်။
ဩဂုတ်လ ၂၀ ရက်နေ့ ကလည်း ကျောက်မဲမြို့နယ် ပင်တီးကျေးရွာ၊ ပင်တီးဘုန်းတော်ကြီးကျောင်းကို လေကြောင်းတိုက်ခိုက်ခံရမှုကြောင့် စစ်ရှောင်ပြည်သူ ၁၀ ဦး သေဆုံးကာ ၁၂ ဦး ပြင်းထန်စွာ ဒဏ်ရာရရှိခဲ့သေးသည်။
ယင်းကျောင်းကြီးသည် ဆေးသုတ်ထားပြီးသော်လည်း ရေစက်မချရသေးသည့် ကျောင်းအသစ်ကြီးဖြစ်ကြောင်း သိရပြီး ဝါတွင်းကာလ ဝါကပ်သည့် အခါတွင်းဖြစ်သဖြင့် ရဟန်းသမဏေအများစု ဝါဆိုနေကြကြောင်း သိရသည်။
မဟာ
Photo – ဒေသခံများနှင့် ပရဟိတအဖွဲ့များ
#MeKongNews
#နောင်ပိန်ရွာ
#စစ်ကောင်စီ
#ကျောက်မဲမြို့နယ်
#လေကြောင်းတိုက်ခိုက်မှု
