မဲခေါင်၊ ဩဂုတ် ၁၇

ငွေညှစ်တောင်းခံမှုများကြောင့် နာမည်ကြီးသည့် တောင်ကြီးမြို့၊ ရွှေတောင်ရပ်ကွက် အုပ်ချုပ်ရေးမှူး ဦးသန်းရွှေသည် ရပ်ကွက်တွင်းမှ မူးယစ်ဆေးသုံးစွဲသူများကို ဖမ်းဆီးပြီး မိသားစုထံမှ ငွေညှစ်တောင်းခံမှုများ ပြန်လည်ပြုလုပ်နေကြောင်း ဒေသခံသတင်းရင်းမြစ်များထံမှ သိရသည်။

ယခုနှစ် ဖေဖော်ဝါရီလ၊ မေလနှင့် ဇူလိုင်လတို့အတွင်း ဦးသန်းရွှေ၏ လက်နက်မှောင်ခိုရောင်းစားမှု၊ ဒုစခန်းမှုး ယာဉ်ထိန်းရဲတစ်ဦးနှင့်ပူပေါင်းကာ ဆေးသမားနှင့်ဆိုင်ကယ်၊ ကားများကိုဖမ်းဆီးပြီး ငွေတောင်းမှု၊ နိုင်ငံပိုင်မြေအား ရောင်းစားရန်ကြံစည်မှု၊ စစ်မှုထမ်းအကြောင်းပြကာ ငွေညှမှုများကြောင့် ဦးသန်းရွှေနှင့် ကြံရာပါ ရပ်ကွက်တာဝန်ရှိသူများကို စရဖမှခေါ်ယူစစ်ဆေးသည်ကို ဒေသတွင်းမီဒီယာများမှ ဖော်ထုတ်ရေးသားပြီးနောက် ခေတ္တငြိမ်သွားသော်လည်း ယခုအခါ ငွေညှစ်မှုများ ပြန်လည်လုပ်ကိုင်လာခြင်း ဖြစ်သည်။

ရွှေတောင်ရပ်ကွက်၊ နယ်မြေ(၆) နှင့် နယ်မြေ (၂) ကြားလမ်းတွင် မူးယစ်ဆေးရောင်းဝယ်သုံးစွဲနေကြ သူများထဲမှ ၅ယောက်မှ ၈ယောက်အထိ နေ့စဉ်ဖမ်းဆီးကာ ရပ်ကွက်ရုံးနှင့် ရပ်ကွက်ရုံးကပ်လျက်ရှိ ရပ်ကွက်ပိုင် သမဝါယမရုံးဟောင်းတွင် ထိပ်တုံးခတ်ထားပြီး မိသားစုများထံမှ ငွေညှစ်တောင်းခံကြောင်း၊ လိုချင်သောငွေပမာဏရလျှင် လွှတ်ပေးပြီး မရပါက ရဲစခန်းပို့ကြောင်း သတင်းရင်းမြစ်တစ်ဦးက ပြောသည်။

“ဌာနဆိုင်ရာကလူတွေပါရင် ချက်ချင်းလွှတ်ပေးပါတယ်။ အရပ်သား ဘာမှမသိနားမလည်သူဆိုရင် အခြေအနေကြည့်ပြီး ငွေတောင်းပါတယ်။ ဖမ်းပြီးသူတွေကို ၆ပေါက်၊ ထိပ်တုံးထဲမှာ ထည့်ထားပါတယ်။ သူ့ရုံးမှာ ၆ပေါက်က ၂ ခုရှိတယ်” ဟု ၎င်းကပြောသည်။

ထိုသို့ဖမ်းဆီးခံရသူများအားမိသားစုမှသိန်း၂၀မှ၁၀၀ကျော်အထိပြန်ပေးရွေးရကြောင်းသိရသည်။

ရပ်ကွက်အတွင်း မူးယစ်ဆေးဝါး ရောင်းချသူများရှိသော်လည်း ဦးသန်းရွှေကို လစဉ်ကြေးပေးထားသည့်အတွက် အဖမ်းမခံရကြောင်း၊ ဆေးဝယ်ယူသူများကိုလည်း လက်ထောက်ချဖမ်းဆီးခိုင်းမှုများ ရှိကြောင်း သိရသည်။ တောင်ကြီးမြို့တွင် ၂၀၂၁ နောက်ပိုင်း မူးယစ်ဆေးအလွယ်တကူ ဝယ်နိုင်သည့်နေရာမှာ ရွှေတောင်ရပ်ကွက်ဖြစ်လာသည်။

လွန်ခဲ့သည့် ၂ ပတ်ခန့်ကလည်း ကျူရှင်မှလမ်းလျှောက်ပြန်လာသော ၉ တန်းကျောင်းသားအား ရွှေတောင်ရပ်ကွက်ရုံးပတ်ဝန်းကျင်ပင် ဆေးပြားဝယ်ဦးမလား ဟူ၍ အတင်းလိုက်ရောင်းခံခဲ့ရကြောင်း ကျောင်းသားမိဘထံက သိရသည်။

ပြီးခဲ့သည့် ဇူလိုင်လအတွင်း ဦးသန်းရွှေနှင့် တူတော်စပ်သူ စိန်ပန်းရပ်ကွက်အုပ်ကြီး သောင်းရွှေတို့ကို စရဖနှင့် CID တို့မှ ခေါ်ယူစစ်ဆေးသော်လည်း ငွေဖြင့်ကျေအေးပေးခဲ့ကြောင်း သတင်းရင်းမြစ်များထံမှ သိရသည်။

ဦးသန်းရွှေ အားကိုးအားထားရသော လက်ရုံးတပည့် ၂ယောက်မှာ နယ်မြေ(၃)ရာအိမ်မှူး၏ သားမက်ဖြစ်သူ ဦးသိန်းငှက်(ခ)ဦးဝင်းဗိုလ်နှင့် ရွှေတောင်ရပ်ကွက်၊ နယ်မြေ(၇)ရာအိမ်မှူး ဦးတင်ဦးတို့ဖြစ်ပြီး ၎င်းတို့က ဖမ်းဆီးခံရသူများအား ပြန်ရွေးရန် မိသားစုအား ငွေကြေးညှိနှိုင်းရေးကို အဓိကတာဝန်ယူပေးနေသည်ဟု ရပ်ကွက်နေသူများထံက သိရသည်။

#MeKongNews

#တောင်ကြီး

#ရွှေတောင်

#အုပ်ကြီး

#သန်းရွှေ

#ငွေညစ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)