မဲခေါင်၊ ဩဂုတ် ၁၃
တာချီလိတ် အိမ်ထောင်စုစာရင်းရှိသူများကို ပြုလုပ်ပေးသည့် တစ်နှစ်စာတံတားကူးလက်မှတ် စာအုပ်အပြာ အသစ်ပြုလုပ်ခြင်းနှင့် သက်တမ်းတိုးခြင်းများအတွက် ပြန်လည်ပြုလုပ်ပေးနေသော်လည်း လူရာဂဏန်းတန်းစီထားရာတွင် လူဆယ်ဂဏန်းခန့်သာ ပြုလုပ်ပေးကြောင်း ကိုယ်တိုင်ကြုံတွေ့လာသူများထံမှ သိရသည်။
ဩဂုတ်လ ပထမပတ်အတွင်း ရေကြီးနစ်မြုပ်မှုကြောင့် ဆာဗာများ၊ စက်များပျက်စီးသည့်အတွက်ဟုဆိုကာ တစ်နှစ်စာ တံတားကူးလက်မှတ် သက်တမ်းတိုးခြင်းနှင့် အသစ်ပြုလုပ်ခြင်းများကို ပိတ်ထားခဲ့ပြီး ဩဂုတ်လ ဒုတိယပတ်တွင် ပြန်လည်ပြုလုပ်ပေးသော်လည်း နေ့စဉ်လူဦးရေအနည်းငယ်သာ ပြုလုပ်ပေးသည့်အတွက် အခက်အခဲကြုံနေရကြောင်း ဒေသခံများက ပြောသည်။
ယနေ့ ဩဂုတ်လ ၁၃ ရက်နေ့များတွင် စာအုပ်အပြာ ပြုလုပ်ရန်နှင့် သက်တမ်းတိုးရန်အတွက် ည ၁၂ နာရီခန့်မှ စတင်ကာ တန်းစီသူများရှိခဲ့ပြီး နံနက် ၆ နာရီခွဲခန့်တွင် လူ ၁၀၀ ကျော် တန်းစီနေကြကြောင်း၊ တံတားလဝကများက နံနက် ၈ နာရီခွဲမှသာ တံခါးလာဖွင့်ပြီး လူ ၁၀ သာပြုလုပ်ပေးမည်ဟု ကြေညာခဲ့ကြောင်း ကိုယ်တွေ့ကြုံရသူများနှင့် နီးစပ်သူတစ်ဦးက ပြောသည်။
“မနေ့ (ဩဂုတ် ၁၂ ရက်) ကလည်း လူ ၂၀ ပဲလုပ်ပေးတယ်။ တချို့ဆို မနက် ၂ နာရီ၊ ၃ နာရီလောက်ကတည်းက လာစောင့်တာ မရသွားဘူး။ မနက် ၃ နာရီလောက်ဆို တံတားမှာစောင့်တဲ့လူ ၅၀ ကျော်နေပြီ။ အကြောင်းပြချက်ကတော့ စာအုပ်ကုန်နေလို့ပဲ ပြောတယ်” ဟု ၎င်းကပြောသည်။
တန်းစီစောင့်ဆိုင်းသူများကို စာအုပ်ကုန်နေသည်ဟု အကြောင်းပြကာ အနည်းငယ်သာလုပ်ပေးသော်လည်း ပွဲစားများမှ တဆင့်ပြုလုပ်ပါက အလွယ်တကူရနိုင်ကြောင်း ဒေသခံများကပြောသည်။
ပွဲစားနှင့် ပြုလုပ်ပါက ဘတ် ၁၀၀၀ ခန့် ပေးရကြောင်း၊ ပွဲစားက ဘတ် ၃၀၀ ယူပြီး တံတားလဝကကို ဘတ် ၇၀၀ ပေးရကြောင်း၊ အမှန်တကယ်ကုန်ကျစရိတ်မှာ ဘတ် ၁၀၀ သာဖြစ်သည့်အတွက် မတတ်နိုင်သူများလည်းရှိကြောင်း ဒေသခံများကပြောသည်။
“တချို့က တံတားကိုအားကိုးပြီး အလုပ်လုပ်စားနေရတဲ့သူတွေရှိတယ်။ တစ်ရက်ကို ၂ ခါလောက် တံတားကူးရတယ်။ ယာယီတစ်ပတ်စာ စာရွက်နဲ့က သူတို့အတွက် အဆင်မပြေဘူး။ သနားဖို့ကောင်းတယ်။ တချို့ဆို ၃၊ ၄ ရက် လာတန်းစီတာတောင် မရသေးတဲ့လူတွေရှိတယ်” ဟု ဒေသခံတစ်ဦးကပြောသည်။
တစ်နှစ်စာအုပ်ကို တာချီလိတ်တွင်နေထိုင်သူတစ်ဦးအနေဖြင့် အိမ်ထောင်စုစာရင်း၊ ရပ်ကွက်နှင့် ရဲထောက်ခံချက်များဖြင့် လဝကတွင် ဘတ်ငွေ ၁၀၀ ကျပ် ပေးသွင်းလုပ်နိုင်ပြီး တံတားဖြတ်ခ တစ်ခေါက်လျင် မြန်မာဘက်၌ မြန်မာကျပ် ၃၀၀ သာ ပေးသွင်းရသည်။
#MeKongNews
#တာချီလိတ်
#တံတား၁
#တစ်နှစ်စာအုပ်
#စာအုပ်အပြာ
#တံတားလဝက
