မဲခေါင်၊ ဩဂုတ် ၇
တော်လှန်ရေးအဖွဲ့များ ရောက်ရှိနေ၍ဟု ဆိုကာ ရှမ်းပြည်တောင်ပိုင်း၊ တောင်ကြီးမြို့နယ်အတွင်း PSMS နည်းပညာအသုံးပြုကာ ဟိုတယ်၊ တည်းခိုခန်းများ၊ မြို့အဝင်အထွက် စစ်ဆေးရေးဂိတ်များ၊ မော်တော်ယာဉ်လိုင်းများတွင် စစ်ဆေးမှု ပြုလုပ်နိုင်ရန် ဒေသန္တရအမိန့် တောင်ကြီးမြို့နယ် အထွေထွေအုပ်ချုပ်ရေးဦးစီးဌာနက ထုတ်ပြန်ထားသည်။
တောင်ကြီးမြို့နယ်အတွင်း တော်လှန်ရေးတပ်ဖွဲ့ဝင်များသည် စိမ့်ဝင်ရောက်နေကြသဖြင့် ယင်းဒေသန္တရအမိန့် ကို ၂၀၂၅ခုနှစ် ဩဂုတ်လ ၄ ရက်နေ့က ထုတ်ပြန်ရခြင်း ဟု ဖော်ပြထားသည်။
စစ်ကော်မရှင်အနေနှင့် တောင်ကြီးမြို့နယ်အတွင်း People Surveillance and Management System (PSMS) စနစ်အသုံးပြု၍ လူထုကို ပို၍ စစ်ဆေးလာမှုသည် လူ့အခွင့်အရေးချိုးဖောက်ဖြစ်ကာ ဖိနှိပ်မှု နှင့် ၎င်းတို့၏ ယန္တရားစနစ်အတွင်း ကျရောက်လာနေခြင်း ဖြစ်ပြီး အမြန်ရုန်းထွက်နိုင်ရန် လိုအပ်ကြောင်း ရှမ်းတောင်ဒေသရှိ တော်လှန်ရေးလူငယ်တစ်ဦးက ပြောဆိုသည်။
“စစ်ကောင်စီဘက်က အခုလိုမျိုး ခပ်စိပ်စိပ် စစ်ဆေးလာမှုမျိုးတွေ ရှိလာတာကို ကြည့်ခြင်းအားဖြင့် မြို့ပေါ်မှာနေတဲ့ ပြည်သူလူထုတွေဟာ တနည်းမဟုတ်တနည်းနဲ့ စစ်ကောင်စီရဲ့ ဖိနှိပ်မှု၊ ပြီးတော့ စစ်ကောင်စီရဲ့ ယန္တရားစနစ်ထဲကို ရောက်မှန်းမသိ ရောက်နေတာကိုလည်း လူထုအနေနဲ့ သိရှိပြီး အမြန်ရုန်းထွက်နိုင်ဖို့ လိုပါတယ်။ အခုလိုမျိုး ရုန်းထွက်ဖို့ဆိုတာ တစ်ခုတည်းသောနည်းလမ်းက တော်လှန်ရေးထဲကို ပါဝင်ဖို့ပါပဲ လို့ပြောချင်ပါတယ်” ဟု ရှမ်းတောင်တော်လှန်ရေးအဖွဲ့မှ လူငယ်တစ်ဦးက ပြောဆိုထားသည်။
စစ်ကော်မရှင်သည် ရဲတပ်ဖွဲ့ကို အသုံးပြုလျှက် PSMS နည်းပညာနှင့် တည်းခိုသူ အချက်အလက် တိုက်ဆိုင် စစ်ဆေးသည့်စနစ်၊ ယာဉ်လိုင်းစစ်ဆေးသည့် စနစ်၊ ရဲထောက်ခံစာစစ်ဆေးသည့်စနစ်၊ မှတ်ပုံတင် အမှတ်အသား မရှိသည့် သူများ၏ ဓါတ်ပုံ၊ ဗီဒီယိုင်ဖိုင်များကို တိုက်ဆိုင်စစ်ဆေးသည့် စနစ်ကို အသုံးပြု၍ တော်လှန်ရေး လုပ်ဆောင်နေသူများကို ရှာဖွေနေသည် ဟု ဖော်ပြထားသည်။
တောင်ကြီးမြို့နယ်အတွင်း တော်လှန်ရေးလုပ်ဆောင်နေသူများ စိမ့်ဝင်လာသည့် အခြေအနေကြောင့် ဒေသန္တရအမိန့်ဖြင့် ကိုယ်ရေးအချက်အလက်များကိုစစ်ဆေးခြင်း၊ ဟိုတယ်၊ တည်းခိုခန်းများ နှင့် မော်တော်ယာဉ်လိုင်းများထံမှ တောင်းခံခြင်း၊ စစ်ဆေးရေးဂိတ်များတွင် စစ်ဆေးခြင်းတို့ကို ၂၀၂၅ ခုနှစ်အတွင်း လုပ်ဆောင်နေသည်။
“ရှမ်းတောင်သား တစ်ယောက်အနေနဲ့ဆိုရင်တော့ အခုလိုလုပ်တာက လူ့အခွင့်အရေး ချိုးဖောက်ခံရတာ ဖြစ်တယ်။ စစ်အာဏာရှင်တွေရဲ့ လူထုအပေါ် တစ်ရစ်ခြင်း ကြပ်ပြီး ပိုပို ဖိနိပ်လာတာ လို့ မြင်တယ်။ ဒီအတွက်မြို့က လူထုတွေက ပိုပြီးသတိရှိသင့်တယ်” ဟု တော်လှန်ရေးအဖွဲ့တခုမှ ရှမ်းတောင်ဒေသခံ လူငယ်တစ်ဦး ကလည်း ၎င်းအမြင်ကို ပြောဆိုသည်။
တောင်ကြီးမြို့နယ်အတွင်း လူငယ်များ၊ တော်လှန်ရေးတွင် ပါဝင်လုပ်ဆောင်နေသူများကို စစ်ဆေးစောင့်ကြည့်နိုင်ရန်အတွက် တောင်ကြီးအထွေထွေအုပ်ချုပ်ရေးမှူး ရန်နိုင်ထွန်းက ၂၀၂၅ ခုနှစ် ဩဂုတ်လ ၄ ရက်နေ့က ဒေသန္တရအမိန့် ထုတ်ပြန်ခဲ့ခြင်း ဖြစ်သည်။
တောင်ကြီးမြို့ပေါ်ရှိ ဟိုတယ်၊ တည်းခိုခန်းများတွင် လာရောက်တည်းခိုသူများကို တကိုယ်လုံးပုံ နှင့်အတူ ကိုယ်ရေးအချက်အလက်အပြည့်အစုံကို စစ်ကော်မရှင်အုပ်စုက တောင်းယူလျှက် ရှိပြီး မြို့နယ်အတွင်းရှိ စစ်ဆေးရေးဂိတ်များတွင်လည်း PSMS Tablet များကို အသုံးပြုကာ ရှာဖွေစစ်ဆေးနေသည်။
ဖေသန်း
#MeKongNews
#PSMS
#စစ်ဆေးရေး
#တောင်ကြီးမြို့နယ်
#ဒေသန္တရအမိန့်
