မဲခေါင်၊ ဩဂုတ် ၃
တာချီလိတ်မြို့တွင် ဆောက်လုပ်ရေးလုပ်ငန်းများ လုပ်ကိုင်နေသည့် ရှင်းယုံကျန့်ကုမ္ပဏီမှာ အလုပ်သမားများအပေါ် အနိုင်ကျင့် ခေါင်းပုံဖြတ်မှုများ ပြုလုပ်လျက်ရှိကြောင်း အလုပ်သမားများနှင့် နီးစပ်သူများက ပြောသည်။
ရှင်းယုံကျန့် ကုမ္ပဏီသည် ဆောက်လုပ်ရေး လုပ်ငန်းများမှ အလုပ်သမားများကို အလုပ်ချိန် နံနက် ၇နာရီခွဲမှ ညနေ ၅နာရီအထိ သတ်မှတ်ခိုင်းစေသည့်အပြင် နောက်ပိုင်းတွင် ညနေ ၅နာရီကျော်သော်လည်း ဆက်လက်ခိုင်းစေကြောင်း၊ လစာထုတ်ရာတွင်လည်း ရက်နောက်ကျပြီးမှထုတ်ပေးကြောင်း အလုပ်သမားများတစ်ဦးက ပြောသည်။
“လစာက နောက်ကျမှ ထုတ်ပေးတဲ့ရက်ကများတယ်။ တစ်လမှာ ရက်ပေါင်ကြေး ၅ရက်ယူတယ်ဆိုတာ လက်ခံပါတယ်။ ဒါပေမယ့် ၅ရက်နေ့ နောက်ပိုင်းမှာ ထုတ်ပေးတာများတယ်။ မေလတုန်းကဆို ဆိုဒ်ကရတဲ့ ပိုက်ဆံကို သူဌေးက ကားဝယ်စီးပြီး အလုပ်သမားတွေကိုကျတော့ လုပ်အားခ မရှင်းပေးဘူး” ဟု ၎င်းကပြောသည်။
အလုပ်ချိန်ပိုမိုခိုင်းစေခြင်း၊ လုပ်အားခ နောက်ကျမှ ထုတ်ပေးခြင်းအပြင် လုပ်ငန်းခွင်တွင်လည်း သူဌေးဖြစ်သူက စိတ်ထင်သလို ငေါက်ငမ်းခြင်း၊ လစာမပေးဘဲ အလုပ်ထုတ်ပယ်ခြင်းများလည်း ပြုလုပ်ကြောင်း အလုပ်သမားများနှင့်နီးစပ်သူတစ်ဦးက ပြောသည်။
“အလုပ်သမားတွေက တစ်နေကုန်ပင်ပန်းလို့ ညနေနားနေရင် သူဌေးက ညနေမှလာပြီး လစာမပေးဘဲအလုပ်ထုတ်တာမျိုး လုပ်ပစ်တယ်။ အလုပ်သမားတွေအနေနဲ့ မတရားဘူးလို့ ခံစားနေကြရတယ်” ဟု ၎င်းကပြောသည်။
ရှင်းယုံကျန့်ကုမ္ပဏီသည် တာချီလိတ်မြို့တွင် လူနေအိမ်နှင့် စက်မှုဇုန်အဆောက်အဦများကို ဆောက်လုပ်နေသည့် ကုမ္ပဏီဖြစ်ပြီး လယ်မြေများကို မြေဖို့ဆောက်လုပ်ခြင်း၊ တောင်ဖြိုပြီး ဆောက်လုပ်ခြင်းများလည်း လုပ်ဆောင်လျက်ရှိကြောင်း ဒေသခံများထံမှ သိရသည်။
ယင်းကုမ္ပဏီသည် ပုန်းထွန်တွင် တစ်ဆိုဒ်၊ ဆန်ဆိုင်း (က)တွင် တစ်ဆိုဒ်၊ တော်ကော့တွင်းတွင် တစ်ဆိုဒ်၊ ဟယ်ရီပေါ်တာအနီးတွင် တစ်ဆိုဒ်၊ ဆန်ဆိုင်း (ခ) တွင်တစ်ဆိုဒ်၊ နယ်ခေါင်တွင် တစ်ဆိုဒ်၊ တံတား ၂ အနီးပန်းခြံတွင် တစ်ဆိုဒ်၊ ပါဆပ်တွင် တစ်ဆိုဒ် ဆောက်လုပ်လျက်ရှိကြောင်း စုံစမ်းသိရသည်။
#MeKongNews
#တာချီလိတ်
#ဆောက်လုပ်ရေး
#ရှင်းယုံကျန့်
#အလုပ်သမားအခွင့်အရေး
ပုံအညွှန်း – ရှင်းယုံကျန့်ကုမ္ပဏီ တောင်ဖြိုပြီးဆောက်လုပ်လျက်ရှိသည့် မြေကွက်များ
