ရှမ်းပြည်အတွက် ဇူလိုင်လ ၂၆ ရက် မှ ဩဂုတ်လ ၁ ရက်အထိ မိုးလေဝသအခြေအနေသုံးသပ်ချက်

– ဦးဝင်းနိုင် (မိုးလေဝသပညာရှင်)

လာမည့် ရက်သတ္တပတ်အတွင်း ရှမ်းပြည်အရှေ့ပိုင်းနှင့် မြောက်ပိုင်းရှိ မြို့နယ်/ခရိုင်များတွင် မိုးရွာသွန်းမှုမှာ ရှမ်းပြည်တောင်ပိုင်းထက်ပိုများနိုင်သော်လည်း ရှမ်းပြည်တစ်ပြည်လုံး အနေအထားဖြင့် မိုးအနည်းငယ်နှင့် မိုးအသင့်အတင့်သာ ရွာသွန်းမည်ဖြစ်သည်။ နေရာအချို့တွင် လေပြင်းတိုက်ခတ်နိုင်သည်။

ယခုလာမည့်ရက် သတ္တပါတ် တစ်ပါတ်အတွင်း တောင်တရုတ်ပင်လယ်နှင့် ဘင်္ဂလားပင်လယ်အော်၊ ကပ္ပလီပင်လယ်များတွင် လေဖိအားနည်းရပ်ဝန်း/မုန်တိုင်း စသည့် ထူးခြားမိုးလေဝသအခြေအနေဖြစ်နိုင်ရန် မရှိပါ။

မိုးလယ်ကာလအတွင်း ရှိနေကျ မုတ်သုံမိုးရွာသွန်းပြီး မိုးအလွန်များခြင်း နှင့် ရေကြီးခြင်းမျိုး မရှိနိုင်သည့် ပုံမှန်ရာသီဥတုအခြေအနေ ဖြစ်နိုင်ပါသည်။

ရှမ်းပြည် အရှေ့ပိုင်းနှင့် မြောက်ပိုင်းရှိ မြို့နယ်/ခရိုင်များတွင် မိုးရေချိန် ပိုများနိုင်ပြီး ရှမ်းပြည် တောင်ပိုင်းတွင် မိုးရေချိန်ရရှိနိုင်မှု အနည်းငယ်လျော့နိုင်ပါသည်။

ရှမ်းပြည်အရှေ့ပိုင်းတွင် ၇ ရက်အတွင်း ရရှိနိုင်သည့် အများဆုံး မိုးရေချိန်မှာ ၉ လက်မခန့်အထိရှိနိုင်ပြီး၊ ရှမ်းပြည်မြောက်ပိုင်းတွင် အများဆုံးမိုးရေချိန် ၈ လက်မခန့်၊ ရှမ်းပြည်တောင်ပိုင်းတွင် ၇ ရက်အတွင်းရရှိနိုင်သည့် အများဆုံး မိုးရေချိန် ၄.၄ လက်မခန့်ရှိနိုင်သည်။

ယခုရက်သတ္တပါတ် တစ်ပါတ်အတွင်း –

· ရှမ်းပြည် အရှေ့ပိုင်း – နေ့စဉ် ၂၄ နာရီအတွင်းမိုးရေချိန် ၁ လက်မ အထက်အထိ ရွာသွန်းရရှိနိုင်ပြီး၊ ဇူလိုင်လ ၂၆/၂၇/၂၈ နှင့် ၂၉ ရက်များတွင် မိုးရွာသွန်းမှု အများဆုံးဖြစ်နိုင်သည်။

ဇူလိုင် ၃၁ ရက် နှင့် ဩဂုတ် ၁ ရက်နေ့များတွင် မိုးရွာသွန်းမှု ယာယီရပ်ပြီး နေသာချိန် ပိုများနိုင်သည်။

· ရှမ်းပြည်မြောက်ပိုင်း – နေ့စဉ် ၂၄ နာရီအတွင်း မိုးရေချိန် ၁ လက်မ အများဆုံး ရွာသွန်းနိုင်ပြီး၊ ဇူလိုင် ၂၇/၂၈ ၂ ရက်များတွင် မိုးရွာသွန်းမှုအများဆုံးဖြစ်နိုင်သည်။
ဇူလိုင် ၂၉/၃၀/၃၁ နှင့် ဩဂုတ် ၁ ရက်နေ့များတွင် မိုးအားလျော့နည်းသွားနိုင်ပါသည်။

· ရှမ်းပြည် တောင်ပိုင်း – နေ့စဉ် ၂၄ နာရီအတွင်း ပျမ်းမျှမိုးရေချိန် ၀.၄ လက်မခန့် အများဆုံးရွာသွန်းနိုင်ပြီး၊ ဇူလိုင် ၂၈ ရက်တွင် မိုးရွာသွန်းမှုအများဆုံး မိုးရေချိန် ၁.၅ လက်မခန့်အထိ ရွာသွန်းရရှိနိုင်သည်။

ဇူလိုင် ၂၉ ရက်နောက်ပိုင်း ဩဂုတ်လ ပထမပတ်ကုန်ဆုံးသည်အထိ မိုးအားလျော့နည်းနေနိုင်ပါသည်။

အနောက်/အနောက်တောင်ဘက်မှ လေတိုက်နှုန်း တနာရီ ၂၀ မိုင်ဝန်းကျင်ခန့်ရှိနိုင်ပြီး ဇူလိုင် ၃၁ ရက်တွင် ရှမ်းပြည်နယ် တောင်ပိုင်းဒေသအချို့၏ လေတိုက်နှုန်း တနာရီ ၂၅ မိုင်နှင့်အထက်(တနာရီ မိုင် ၃၀ အောက်) တိုက်ခတ်နိုင်/လေပြင်းနိုင်သည်။

ရှမ်းပြည်နယ်တခွင်လုံးတွင် လေထုအတွင်း ရေငွေ့ပါဝင်မှုနှုန်းမှာ လေထုစိုထိုင်းဆ ၉၀% နှင့် ၁၀၀% ရှိနေနိုင်ပြီး အမြင့်ဆုံးနေ့အပူချိန် ၃၀°C နှင့် အနိမ့်ဆုံးညအပူချိန် ၂၀°C ရှိနိုင်သည်။

လေထုစိုထိုင်းဆမြင့်မားသည့်အချိန်တွင် လေတိုက်နှုန်းလည်း လျော့နည်းနေချိန်မှာ ခံစားရသည့်အပူချိန် ၃၆°C ခန့်အထိရှိနိုင်ပါသည်။

ယခုတစ်ပါတ်အတွင်း ရှမ်းပြည်၏ လေထုညစ်ညမ်းမှုအခြေအနေ AQI Value အများဆုံး ၂၀ – ၂၅ ခန့်သာရှိနိုင်ပြီး၊ လေထုညစ်ညမ်းမှုအတွက် စိုးရိမ်ရန်မရှိပါ။

#MeKongNews
#မိုးလေဝသခန့်မှန်းချက်
#ဦးဝင်းနိုင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)