မဲခေါင်၊ ဇူလိုင် ၁၆
ဟိုတယ်တွင် စကားပြန်အဖြစ် လုပ်ကိုင်ရမည်ဟု လိမ်လည်ကာ အလုပ်ခေါ်ယူပြီး ကမ္ဘောဒီယားနိုင်ငံရှိ ကျားဖြန့်လုပ်ငန်းခွင်တစ်ခုတွင် ရောင်းစားခံရသူ တာချီလိတ်မြို့မှ အမျိုးသမီးတစ်ဦးကို မိသားစုမှ ဒေါ်လာ ၄၀၀၀ ဖြင့် ရွေးထုတ်ကယ်တင်ခဲ့ရကြောင်း မိသားစုနှင့် နီးစပ်သူထံမှ သိရသည်။
ယင်းအမျိုးသမီးမှာ လွန်ခဲ့သည့် ၆လခန့်က ကမ္ဘောဒီယားနိုင်ငံရှိ ဟိုတယ်တစ်ခုတွင် စကားပြန်အလုပ်ကို တစ်လ ဒေါ်လာ ၅၀၀ လစာဖြင့် လုပ်ကိုင်ရမည်ဟုဆိုကာ ပွဲစားများက ခေါ်ဆောင်သွားခြင်းဖြစ်ကြောင်း၊ ကမ္ဘောဒီယားသို့ ရောက်သည့်အခါ ကျားဖြန့်လုပ်ငန်းတွင် ရောင်းစားခံရခြင်းဖြစ်ကြောင်း၊ နောက်ဆုံးလတွင် အလုပ်မလုပ်နိုင်သည့်အတွက် အခန်းကျဉ်းတစ်ခုအတွင်း ပိတ်လှောင်ထားခြင်းဖြစ်ကြောင်း မိသားစုနှင့် နီးစပ်သူက ပြောသည်။
“အလုပ်ကောင်းကောင်းမလုပ်နိုင်ရင် နောက်ကျားဖြန့်တစ်ခုဆီရောင်းစားမယ်ဆိုပြီး ခြိမ်းခြောက်တယ်။ အခန်းကျဉ်းလေးထဲမှာ အပေါ့သွားရတောင်မလွယ်ဘူး။ ပြန်ချင်ရင် ဒေါ်လာ ၄၀၀၀ ပေးရမယ်ဆိုလို့ မိသားစုက လွှဲပြီး ပြန်ခေါ်ရတယ်” ဟု ၎င်းက ပြောသည်။
ကမ္ဘောဒီးယားကျားဖြန့်လုပ်ငန်းတွင် ရောင်းစားခံရသည့် အမျိုးသမီမှာ ဇူလိုင်လ ပထမပတ်အတွင်းက မြန်မာနိုင်ငံသို့ ပြန်လည်ရောက်ရှိခဲ့ပြီး ၎င်းနှင့်အတူ အခြားမြန်မာအမျိုးသမီးအချို့လည်း ရောင်းစားခံထားရကြောင်း၊ အမျိုးသမီးတစ်ဦးမှာ ပိတ်လှောင်ထားသည့်အခန်းတွင် သေဆုံးသွားသော်လည်း တစ်လခန့်အထိ မသင်္ဂြိုလ်ဘဲ ထားထားကြောင်း ပြန်လည်လွတ်မြောက်လာသည့် အမျိုးသမီးနှင့် နီးစပ်သူထံမှ သိရသည်။
ပြန်လွတ်လာသည့် အမျိုးသမီးကို ချုပ်နှောင်ထားသည့်နေရာမှာ ထိုင်း-ကမ္ဘောဒီးယားနယ်စပ်ရှိ မွန်ဒေါ်လ်ဆီမာဆိုသည့်မြို့ရှိ အဆောက်အဦတစ်ခုတွင်ဖြစ်ကြောင်း မဲခေါင်သတင်းဌာနမှ စုံစမ်းချက်အရသိရသည်။
ထိုင်း-မြန်မာနယ်စပ်ရှိ ကျားဖြန့်လုပ်ငန်းအများအပြားကို တရုတ်အစိုးရဖိအားဖြင့် ၂၀၂၅ ခုနှစ်အစပိုင်း၌ နှစ်နိုင်ငံရှင်းလင်းကြရာတွင် ကျားဖြန့်လုပ်ငန်းအများစုမှာ ကမ္ဘောဒီယားသို့ ပြောင်းရွှေ့သွားခြင်းဖြစ်ပြီး ကျားဖြန့်အလုပ်သမားများလည်း ပါဝင်သွားကြောင်း သိရသည်။
#MeKongNews
#တာချီလိတ်
#ကျားဖြန့်
#ကမ္ဘောဒီးယား
#ထိုင်းနယ်စပ်
