မဲခေါင်၊ ဇူလိုင် ၇
MNDAA ထိန်းချုပ်လောက်ကိုင်တွင် မိုးသည်းထန်စွာရွာသွန်ခြင်းကြောင့် ရေဘေးသင့်ပြီး ကျင်းရှန်ချိန်မြို့နယ်ရှိ အိမ်ထောင်စုများကို ဘေးကင်းရာသို့ရွှေ့ပြောင်းပေးခဲ့ရသည် ဟုကိုးကန့်သတင်းကွန်ရက်က ယနေ့ ဇူလိုင်၇ ရက်တွင် ဖော်ပြလာသည်။
လောက်ကိုင်တွင် ဆက်တိုက်ရွာသွန်းနေသော မိုးကြောင့် မြို့နယ်အတွင်းရှိ နေရာများစွာတွင် ရေကြီးမှုများ ဖြစ်ပေါ်နေပြီး အထူးသဖြင့် မြေနိမ့်ပိုင်းဒေသဖြစ်သည့် ကျင်းရှမ်းချိန်(Jin Xiang Cheng) မြို့နယ်တွင် ရေဘေးအခြေအနေ ပြင်းထန်စွာ ကြုံတွေ့နေရခြင်းဖြစ်သည်။
ကျင်းရှမ်းချိန်(Jin Xiang Cheng)မြို့နယ်၊ ရပ်ကွက် ၃၊ အုပ်စု ၅သည် မြေနိမ့်ပိုင်းဒေသဖြစ်သောကြောင့် မိုးရေများ လျှင်မြန်စွာပြည့်လျှံလာကာ အိမ်ထောင်စုများစွာ ရေဝင်ခဲ့ပြီး အရေးပေါ်အခြေအနေဖြစ်ပွားခဲ့ရကြောင်း၊ အလားတူ (125)နယ်စပ်၊ဟိုင်းဟို၊ ဆီအော၊ ရန်လုံကျိုင်း၊ ဟိုဖျင်မြို့နယ်အပါအဝင် နေရာအနှံ့အပြားတွင် ရေဘေးသင့်မှုများ ဖြစ်ပွားကာ ဒေသခံ ပြည်သူများကို များစွာထိခိုက်စေခဲ့ကြောင်း ကိုးကန့်သတင်းကွန်ယက်က ထုတ်ပြန်သည်။
“ဆီအောမှာတော့ ရေလှောင်ကန်ပြိုလို့ ၃ယောက်သေတယ်။ ကျန်နေရာတွေတော့ လူသေတာမကြားဘူး။ အိမ်တွေတော့ ရေဝင်တာ တော်တော်များတယ်။ ၂ထိပ်ဆို အောက်ထပ်အကုန့်မြုပ်တယ်။ ရေစီးကြမ်းတယ်”ဟု လားရှိူးရောက် လောက်ကိုင်ဒေသခံတစ်ဦးက မဲခေါင်သို့ ပြောသည်။
မိုးသည်းထန်စွာရွာသွန်းမှုကြောင့် ပြီးခဲ့သည့် ဇူလိုင်လ ၃ ရက်နေ့ နံနက်ပိုင်းက မုံးကိုးခရိုင် မုံးပေါ်မြို့နယ်၊ ပန်ဆိုင်းမြို့နယ် လိုင်းယင်းကျေးရွာ၌ ပြင်းထန်သည့် ရေကြီးမှုဘေးနှင့် ရင်ဆိုင်ခဲ့ရသည်ဟု သိရသည်။
ယခုရေကြီးမှုဘေးကြောင့် လိုင်းယင်းကျေးရွာတွင် အိမ်ထောင်စု၄၆ စု ရေဘေးသင့်ခဲ့ပြီး မြေစိုက်အိမ်တစ်လုံး ပြိုကျခဲ့ကာ ဒေသခံစပါးကုန်သည်တစ်ဦး၏ စပါး ၈၃၀ အိတ်၊ ခန့်မှန်းတန်ချိန် ၄၁ တန် သိုလှောင်ထားသော ဂိုဒေါင်မှာ ရေများနစ်မြုပ်ခဲ့သော်လည်း ကယ်ဆယ်ရေးအဖွဲ့၏ ကြိုးပမ်းမှုဖြင့် စပါးအိတ်၄၁၅ အိတ်ကို ထုတ်ယူပေးနိုင်ခဲ့သည့်အပြင် ပြည်သူများအား အမြန်ဆုံးရွှေ့ပြောင်းနိုင်ခဲ့သည့်အတွက် ဤဘေးအန္တရာယ်တွင် လူအသက်ဆုံးရှုံးမှု မရှိခဲ့ဟုဆိုသည်။
မဟာ
#MeKongNews
#လောက်ကိုင်
#ရေကြီး
#မိုးသည်းထန်
#ကျင်းရှန်ချိန်မြို့နယ်
