မဲခေါင်၊ ဇွန် ၁၇
တာချီလိတ်မြို့နယ်၊ လွယ်တော်ခမ်းကျေးရွာအုပ်စု၏ အုပ်ချုပ်ရေးမှူးအဖြစ် တာဝန်ထမ်းဆောင်ခဲ့သူ ဦးချစ်ဂျေ့က တရားမဝင် ရွှေနှင့်သတ္တု လုပ်ကွက် ၂ကွက်ကို လွယ်တော်ခမ်းကျေးရွာအုပ်စုအနီးတဝိုက်တွင် လုပ်ကိုင်လျက်ရှိပြီး ယင်းလုပ်ကွက်များမှ ထွက်ရှိသည့် အာဆင်းနစ်နှင့် ဓာတုအဆိပ်သင့်ရေများမှာ တာချီလိတ်မြို့နယ်အတွင်းရှိ ချောင်းမြောင်းများကို ဖြတ်ကျော်ကာ မယ်ဆိုင်မြစ်အတွင်း စီးဝင်လျက်ရှိကြောင်း ဒေသခံများထံမှ သိရသည်။
ဦးချစ်ဂျေ့သည် ၎င်း၏ယောက်ဖတော်စပ်သူ စန်းလုပြည်သူ့စစ်ခေါင်းဆောင် ဦးလောတာ၏ ကျောထောက်နောက်ခံဖြင့် တာချီလိတ်မြို့ရှောင်လမ်းနှင့် စမ်းလုရွာသွားလမ်းအကြားရှိ ရာဘာခြံအတွင်း တရားမဝင် ရွှေနှင့် သတ္တုတူးဖော်နေခြင်း ဖြစ်ပြီး ရွှေချက်ကန်များလည်း ပါဝင်ကြောင်း၊ တရုတ်နိုင်ငံသား အင်ဂျင်နီယာနှင့် သတ္တုပညာရှင်များကိုလည်း ခေါ်ယူထားကြောင်း ဒေသခံ သတင်းရင်းမြစ်တစ်ဦးက ပြောသည်။
ယင်းရွှေနှင့်သတ္တုလုပ်ကွက် ၂ကွက်မှ ထွက်လာသည့် ဓာတုစွန့်ပစ်ရေများကို စန်းလုရွာဘေးမှ စီးဆင်းလာသည့် ချောင်းအတွင်း စွန့်ပစ်ကြောင်း၊ ယင်းစွန့်ပစ်ရေများသည် တာချီလိတ် – မိုင်းဆတ်သွားကားလမ်းဘေး ရွှေလက်ပံစားသောက်ဆိုင်နှင့် နတ်စင်ကုန်းကွေ့အကြားတွင် တာချီလိတ်စည်ပင်မှ ဆောက်လုပ်ထားသည့် ရေကာတာအတွင်း ဝင်ရောက်သွားကြောင်း ဒေသခံ သတင်းရင်းမြစ်ကပြောသည်။
“စန်းလုချောင်းရောက တာချီလိတ်ရေပေးဝေရေးက ပိုက်လုံးတွေမြုပ်ထားတာ၊ ရေကာတာကလည်း ရေပေးဝေရေးအတွက်သုံးနေတာ။ တာချီလိတ်ကလူတွေ အဆိပ်ရေတွေကိုသုံးရသလိုဖြစ်နေတယ်။ အဲဒီရေပေးဝေရေးကလည်း ဦးလောတာ ကုမ္ပဏီက ကန်ထရိုက်ယူထားတာပဲဆိုတော့ အသံတိတ်နေတာ”ဟု ၎င်းက ပြောသည်။
ထို့ပြင် စွန့်ပစ်ဓာတုရေများ စီးဝင်နေသည့် ရေချောင်းသည် စန်းလုရွာလမ်းဆုံနှင့် မြို့ရှောင်လမ်းဆုံကြားတွင် ကွန်ကရစ်လမ်းကို ရေကျော်လျက်ရှိကြောင်း၊ ယင်းရေများအပေါ်မှ လူများ၊ ယာဉ်များ၊ တိရိစ္ဆာန်များ ဖြတ်သန်းသွားလာနေရကြောင်း၊ စည်ပင်ရေကာတာကို ကျော်လာသည့် ရေများသည်လည်း သဘာဝတရားရိပ်သာအနီးမှ တဆင့် ပုန်းထွန်ချောင်း (မယ်ဆိုင်ချောင်း) အတွင်းသို့ စီးဝင်လျက်ရှိကြောင်း သိရသည်။
“အခုက ထိုင်းဘက်က သူတို့နဲ့ဆက်စပ်နေတဲ့ ရေချောင်းတွေထဲ စွန့်ပစ်ဓာတုအဆိပ်ရည်တွေ ဝင်နေလို့ တောက်လျောက်ပြောနတာ။ အာဏာပိုင်တွေအနေနဲ့လည်း မျက်ကွယ်မပြုထားသင့်ဘူး” ဟု ပုန်းထွန်ရပ်ကွက်နေထိုင်သူတစ်ဦးက ပြောသည်။
ရွှေနှင့် သတ္တုများ တရားမဝင်တူးဖော်လျက်ရှိသည့် ဦးချစ်ဂျေ့နှင့် ဦးလောတာတို့မှာ အာခါလူမျိုး လုပ်ငန်းရှင်များဖြစ်ကြပြီး တာချီလိတ်မြို့ပေါ်တွင်လည်း စီးပွားရေးလုပ်ငန်းများစွာ ပိုင်ဆိုင်ထားသူများဖြစ်သည်။
#MeKongNews
#တာချီလိတ်
#လွယ်တော်ခမ်းကျေးရွာအုပ်စု
#စန်းလုကျေးရွာ
#ပြည်သူ့စစ်
#တရားမဝင်ရွှေတူး
#မယ်ဆိုင်မြစ်
