မဲခေါင်၊ ဇွန် ၁၄
စစ်ကောင်စီက အကျိုးသက်ရောက်မှု မရှိဟု ထုတ်ပြန်ထားသော်လည်း အပြည်ပြည်ဆိုင်ရာအလုပ်သမားအဖွဲ့အစည်း – ILO ၏ Article 33 ဖြင့် မြန်မာနိုင်ငံအပေါ်အရေးယူမှုမှာ သက်မွေးဝမ်းကြောင်းကဏ္ဍများကို ထိခိုက်စေနိုင်ပြီး စိတ်မကောင်းဖြစ်ရကြောင်း UMFCCI နှင့် မြန်မာနိုင်ငံအထည်ချုပ်လုပ်ငန်းရှင်များအသင်းက ဇွန်လ ၁၃ရက်နေ့တွင် အသီးသီး ကြေညာချက်ထုတ်ပြန်ထားသည်။
မြန်မာနိုင်ငံအပေါ်တွင် Article 33 ချမှတ်ရန် ဆုံးဖြတ်ချက်နှင့် ပတ်သက်၍ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) က စိတ်မကောင်းဖြစ်ရပြီး တာဝန်ယူမှု၊ တာဝန်ခံမှု ရှိသည့် လုပ်ငန်းများနှင့် ဆက်လက်ပူးပေါင်းကာ ပြည်သူများအတွက် အလုပ်အကိုင်ဖန်တီးရေး နှင့် အသက်မွေးဝမ်းကြောင်းကောင်းမွန်ရေးအတွက် ထောက်ပံ့ပေးရန် တောင်းဆိုထားသည်။
အလားတူ မြန်မာနိုင်ငံအထည်ချုပ်လုပ်ငန်းရှင်များအသင်းကလည်း ယင်းဆုံးဖြတ်ချက်ကြောင့် မြန်မာ CMP လုပ်ငန်းကဏ္ဍအတွက် စိတ်မကောင်း ဖြစ်ရကြောင်း ကြေညာချက် ထုတ်ပြန်ထားသည်။
ယင်းအဖွဲ့အစည်း ၂ခုလုံးသည် စစ်ကောင်စီ အာဏာသိမ်းပြီးနောက်ပိုင်း အလုပ်သမားအကျိုးစီးပွားတွက် လုပ်ဆောင်ပေးမှု မရှိသလောက် ဖြစ်ပြီး အခြေခံ လုပ်အားခ နှုန်းထားကိုပင် ၇ နှစ်ကျော်လာသည့်တိုင် ပြင်ဆင်ပေးခဲ့ခြင်း မရှိသေးပေ။
၂၀၂၃ ခုနှစ်တွင် အခြေခံလစာ တိုးပေးခြင်း မဟုက်ဘဲ အပိုကြေးအနေဖြင့် ကျပ် ၁၀၀၀ သာ တိုးမြင့်ပေးခဲ့ပြီး အလုပ်သမားအခွင့်အရေးနှင့် ပါက်သက်၍ UMFCCI နှင့် မြန်မာနိုင်ငံ အထည်ချုပ်လုပ်ငန်းအသင်းတို့က လက်ရှိအချိန်ထိ လုပ်ဆောင်ပေးခြင်းမရှိသေးကြောင်း အလုပ်သမားများနှင့် အလုပ်သမားအဖွဲ့အစည်းများက ဆိုထားသည်။
မြန်မာ CMP ကဏ္ဍတွင် နိုင်ငံတကာဈေးကွက်များမှ လုပ်ငန်းအပ်နှံသူများသည် ၎င်းတို့ သတ်မှတ်ပြဌာန်းသည့် လုပ်ငန်းကျင့်ဝတ်ဆိုင်ရာ စည်းကမ်းများကို CMP စက်ရုံများက တိကျသေချာစွာ လိုက်နာနိုင်မှသာ အလုပ်အပ်နှံသည်ဟု ဆိုသော်လည်း လက်တွေ့တွင် အလုပ်သမားတို့ တောင်းဆိုနေသော အခြေခံလုပ်အားခ တိုးမြင့်ပေးရေးအတွက် ပါဝင်ကူညီပေးနေခြင်းမျိုးကို မတွေ့ရှိရသေးပေ။
၂၀၂၅ ခုနှစ်အတွင်း CMP အလုပ်ရုံတစ်ချို့တွင် လုပ်အားခ လစာတိုးမြင့်ပေးရေးနှင့် ပါက်သက်၍ အလုပ်သမားများ ဆန္ဒပြတောင်းဆိုမှုတို့ ရှိနေပြီး အချို့မှာ အဖမ်းခံထားရကြောင်း အလုပ်သမားသတင်းများတွင် ဖော်ပြထားသည်။
အလုပ်သမားသမဂ္ဂအဖွဲ့အစည်းများကလည်း လက်ရှိ မြန်မာနိုင်ငံ ကုန်ဈေးနှုန်း မြင့်တက်လာမှု၊ ငွေကြေးဖောင်းပွလာမှုတို့ကြောင့် အခြေခံလုပ်အားခနှုန်းထားကို ကျပ် ၁၃၀၀၀ အထိ တိုးမြင့်ပေးရန် တောင်းဆိုထားကြသည်။
မြန်မာ CMP အထည်ချုပ် ထုတ်ကုန်အများစုကို တင်ပို့နေသည့် ဥရောပမှ မြန်မာနိုင်ငံဆိုင်ရာ ဥရောပကုန်သည်ကြီးများ အသင်းကလည်း အလုပ်သမားလုပ်အားခများကို တိုးမြင့်ပေးသင့်ကြောင်း တိုက်တွန်းထားသည်။
စစ်ကောင်စီ၏ အလုပ်သမားဝန်ကြီးဌာနက ILO ၏ Article 33 သည် နိုင်ငံရေးကို ဖိအားပေးလို၍ ဆုံးဖြတ်ထားသည့်အချက်အလက်ဖြစ်ရာ မြန်မာနိုင်ငံ အလုပ်ရှင်များ၊အလုပ်သမားများ နှင့် စီးပွားရေးလုပ်ငန်းအပေါ် အကျိုးသက်ရောက်မှု မရှိနိုင်သောကြောင့် စိုးရိမ်မှု မရှိပဲ လုပ်ငန်းခွင်များတွင် အေးချမ်းစွာ လုပ်ကိုင်နိုင်မည်ဟု ထုတ်ပြန်ထားသည်။
ILO က Article 33 နှင့် အရေးယူခဲ့သည့် နိုင်ငံမှာ ကမ္ဘာပေါ်တွင် မြန်မာနိုင်ငံ နှင့် ဘီလာရုစ် နိုင်ငံတို့သာ ရှိသေးပြီး မြန်မာကမူ စစ်ကောင်စီကြောင့် ၂ကြိမ် အရေးယူခံရသည့် နိုင်ငံ ဖြစ်လာနေကာ စက်ရုံ၊ အလုပ်ရုံများ ပိတ်လာနိုင်သည့် အခြေအနေတွင် ရှိနေကြောင်း အထည်ချုပ် လုပ်ငန်းရှင်တစ်ဦးက ဆိုသည်။
မြန်မာနိုင်ငံCMP အထည်ချုပ်ကဏ္ဍတွင် မြန်မာနိုင်ငံ အထည်ချုပ်လုပ်ငန်းရှင်များအသင်း၏ အသင်းဝင် အဖွဲ့ပေါင်း ၅၂၃ ရုံ ရှိပြီး ၆၀ ရာခိုင်နှုန်းမှာ ဥရောပဈေးကွက်ကိုလည်းကောင်း၊ ၂၀ ရာခိုင်နှုန်းမှာ ဂျပန်ဈေးကွက် နှင့် ကျန် ၂၀ ရာခိုင်နှုန်းမှာ တခြားဈေးကွက်ကို တင်ပို့ကာ အလုပ်သမား ၇ သိန်းကျော် လုပ်ကိုင်နေသည် ဟု သိရှိရသည်။
“ILO article 33 ကြောင့် စက်ရုံအလုပ်ရုံ အလုပ်သမားတွေ သန်းချီ ထိခိုက်ကြဦးမှာပါ။ ကျောင်းသားဘဝက တခါကြုံဖူးတယ်ဆိုပေမယ့် ခုတစ်ခေါက်ကတော့ အများကြီးပိုဆိုးမယ်ထင်ပါတယ်” ဟု ကိုယ်တိုင်ကြုံတွေ့ခဲ့ဖူးသူတစ်ဦးက ပြောသည်။
စစ်ကောင်စီနှင့် ပနံသင့်နေသည့် စီးပွားရေးလုပ်ငန်းရှင်များကမူ ILO ၏ Article 33 သည် အခြေခံ အလုပ်သမားတို့ကိုသာ ထိခိုက်စေမည်ဟု ပြောဆိုနေကြသော်လည်း ၎င်းတို့ ကြုံဆုံလာရမည့် စီးပွားရေး အကျိုးဆက်အတွက် စိုးရိမ်ပူပန်နေကြသည်။
၁၁၃ ကြိမ်မြောက် အပြည်ပြည်ဆိုင်ရာအလုပ်သမားညီ လာခံ (ILC) တွင် လူငယ်များနှင့် အလုပ်သမားများကို စစ်မှုထမ်းဥပဒေဖြင့် အတင်းအဓမ္မ စစ်ထဲသွပ်သွင်းပြီး အလုပ် သမားအခွင့်အရေး၊ လူ့အခွင့်အရေး ချိုးဖောက်နေသည့် စစ်ကောင်စီကို ILO Article 33 အရ ပြင်းထန်သော ဒဏ်ခတ်ပိတ်ဆို့အရေးယူရန် ဆုံးဖြတ်လိုက်ခြင်း ဖြစ်သည်။
ယင်းအစည်းအဝေးကို စစ်ကောင်စီဘက်မှ UMFCCI နှင့် မြန်မာနိုင်ငံအထည်ချုပ်လုပ်ငန်းရှင်များအသင်းကိုယ်စား အထည်ချုပ်လုပ်ငန်းရှင်နှင့် အထွေထွေအတွင်းရေးမှူးဖြစ်သူ ဒေါ်ခိုင်ခိုင်နွယ်တက်ရောက်ခဲ့ပြီး အမျိုးသားညီညွတ်ရေးအစိုးရ – NUG ဘက်မှလည်း ကိုယ်စားလှယ်များတက်ရောက်ခဲ့သည်။
မြန်မာနိုင်ငံ ကုန်သည်စက်မှုအသင်းချုပ် (UMFCCI) နှင့် မြန်မာနိုင်ငံအထည်ချုပ်လုပ်ငန်းရှင်များအသင်းတို့သည် ကြေညာချက် ထုတ်ပြန်ထားသော်လည်း အရေးယူခံရသည့် အဓိက တရားခံဖြစ်သည့် အာဏာသိမ်း စစ်ကောင်စီကိုမှု တိုက်တွန်းခြင်း၊ ပြောဆိုခြင်း မရှိသည်ကို တွေ့ရသည်။
ဖေသန်း
#MeKongNews
#UMFCCI
#အထည်ချုပ်လုပ်ငန်းရှင်များအသင်း
#Article33
#စစ်ကောင်စီ
#အထည်ချုပ်စက်ရုံ
#လုပ်ခလစာ
