မဲခေါင်၊ ဇွန် ၁၃
ဘဏ်အကောင့်ပိတ်ခြင်း၊ ဖုန်းဆင်းကဒ်ပိတ်သိမ်းခြင်းတို့ အပါအဝင် အရေးယူမှုများဖြင့် နိုင်ငံခြားငွေ မတည်မငြိမ် ဖြစ်စေရန် လုပ်ဆောင်သူများကို အရေးယူမည်ဟု စစ်ကောင်စီလက်အောက်ခံ ဗဟိုဘဏ်က ဇွန်လ ၁၂ ရက်နေ့တွင် ထုတ်ပြန်ထားသည်။
ငွေကြေးလဲလှယ်မှုနှုန်း မြင့်တက်လာစဉ် ထိုသို့ ကြေညာခဲ့ခြင်းဖြစ်ပြိး ပြင်ပဈေးကွက်တွင် အမေရိကန်ငွေ တစ်ဒေါ်လာလျှင် မြန်မာငွေ ကျပ် ၄၅၀၀ ကျော် ရောက်ရှိနေပြီး ရွှေဈေးနှုန်းမှာလည်း တစ်ကျပ်သားလျှင် ကျပ်သိန်း ၈၀ နား သို့ ရောက်ရှိလာနေသည်။
ငွေကြေးမတည်မငြိမ် ဖြစ်စေရန် လှုံ့ဆော်မှု ဆောင်ရွက်နေခြင်းများအား ဗဟိုဘဏ်မှ စောင့်ကြည့်လျက်ရှိပြီး လှုံ့ဆော်မှုဆောင်ရွက်နေသော လူပုဂ္ဂိုလ်များနှင့် ဆက်စပ်နေသည့် လူပုဂ္ဂိုလ်များ၏ Pay Account နှင့် Banking Account များအား ပိတ်သိမ်းခြင်း၊ ဖုန်း SIM Card များအား ပိတ်သိမ်း ခြင်း၊ တည်ဆဲဥပဒေများနှင့်အညီ တရားစွဲဆိုအရေးယူခြင်းများ ပြုလုပ်မည် ဟု ချိန်းခြောက်ပြောဆိုထားသည်။
USDT အပါအဝင် နိုင်ငံခြားငွေ ကမောက်ကမဖြစ်စေရန် ရည်ရွယ်၍ Online ပေါ်တွင် ဈေးကစားခြင်း၊ မမှန်ကန်သော သတင်းများ ဖြန့်ဝေခြင်းများ ဆောင်ရွက်နေသည့် လူပုဂ္ဂိုလ်များအား အရေးယူမှု ဖြစ်စဉ်များ ရှိပြီးဖြစ်သည် ဟု ဗဟိုဘဏ်က ဆိုသည်။
ဗဟိုဘဏ်၏ ငွေလဲလှယ်မှုနှုန်းထားသည် တစ်ဒေါ်လာလျှင် ကျပ် ၂၁၀၀ ဟု သတ်မှတ်ထားပြီး ဘဏ်များ၏ ငွေလဲနှုန်းမှာ တစ်ဒေါ်လာလျှင် ကျပ် ၃၆၀၀ ဝန်းကျင်တွင် ရှိနေသည်။
ပြင်ပဈေးကွက်တွင် ၂၀၂၅ ခုနှစ် ဇွန်လဆန်းပိုင်းအထိ အမေရိကန်ငွေ တစ်ဒေါ်လာလျှင် ကျပ် ၄၄၀၀ ဝန်းကျင်တွင် ရှိနေရာမှ ဇွန်လ ၁၂ ရက်နေ့တွင် တစ်ဒေါ်လာလျှင် ၄၅၀၀ အထက်သို့ ရောက်ရှိလာနေသည် ဟု ငွေကြေးလဲလှယ်သူများက ဆိုသည်။
ပြည်တွင်းရွှေဈေးမှာလည်း တစ်ကျပ်သားလျှင် ကျပ် ၇၉ သိန်းကျော် အထိ ရောက်ရှိလာနေပြီး ကျပ်သိန်း ၈၀ အထက်သို့ ရောက်ရှိလာဖွယ် ရှိကြောင်း လုပ်ကိုင်နေသူတို့က ပြောကြားသည်။
ထိုသို့ ပြည်တွင်း ရွှေဈေးနှင့် ငွေဈေးနှုန်းများ မြင့်တက်လာချိန်တွင် ဗဟိုဘဏ်က ငွေကြေးမတည်ငြိမ်စေရန် လုပ်ဆောင်လျှင် ဘဏ်အကောင့်များ၊ဖုန်းဆင်းကဒ်များကို ပိတ်သိမ်း အရေးယူမည်ဟု ထုတ်ပြန်လာခြင်း ဖြစ်သည်။
ရွှေဈေးနှုန်းများ မြင့်တက်လာနေ၍ အကယ်ဒမီ ရွှေသန့်စင်လုပ်ငန်းကလည်း ဇွန်လ ၁၃ ရက်နေ့မှစတင်ကာ ယာယီခေတ္တ ပိတ်ထားမည် ဟု ထုတ်ပြန်ထားသည်။
ဖေသန်း
#MeKongNews
#ဗဟိုဘဏ်
#ငွေလဲလှယ်နှုန်း
#ဒေါ်လာဈေး
#ရွှေဈေး
