မဲခေါင်၊ ဇွန် ၁၀
ညောင်ရွှေမြို့နယ်ရှိ ကျေးရွာ ၁၁ရှိ စစ်ဘေးရှောင် ဦးရေ၆၀၀၀ခန့် အရေးပေါ်နှင့် ရေရှည်အကူအညီများ လိုအပ်နေသည်ဟု လူမှူကူညီနေသည့်အဖွဲ့များထံက သိရသည်။
ညောင်ရွှေမြို့နယ်၊ အင်းလေးကန်တောင်ဘက်ပိုင်းရှိ ဘုရားတောင်၊ ရေပူ၊ ညောင်လေးပင်၊ နန်းတုပ်၊ အိမ်မူ၊ ကုန်းသာ၊ တောင်ပို့ကွဲ၊ ဟိုပန်၊ စန့်လိတ်၊ စန့်စွဲ၊ လွယ်လုံ ကျေးရွာ ၁၁ရွာမှ စစ်ဘေးရှောင် ၆၀၀၀ ကျော်မှာ စစ်ဒဏ်၊ ရာသီဥတုဒဏ်၊ ရောဂါဘယနှင့် ရုပ်ပိုင်း၊ စိတ်ပိုင်းဆိုင်များ ထိခိုက်နေသဖြင့် အရေးပေါ်နှင့်ရေရှည်အကူအညီများ လိုအပ်နေသည်ဟု ဒေသခံများက ပြောကြသည်။
“တောင်သူတွေဖြစ်တော့ စိုက်ပျိုးရာသီတွေမှာ မစိုက်နိုင်ကြဘူးလေ။ အလုပ်မရှိတော့ ဝင်ငွေမရှိ၊ နေ့စဥ်စားဖို့ကလည်း မလွယ်၊ အသက်ဘေးကလည်းပြေးနေရ၊ အိမ်တွေက ပျက်စီးနေ၊ လေဒဏ် မိုးဒဏ်လည်းခံရဖို့ အမိုးအကာကအစ အလုံအလောက်မရှိ၊ ရောဂါတွေကဝင်၊ စိတ်တွေကညစ်၊ ကလေးတွေလည်း စာမသင်နိုင်နဲ့လေ စိတ်ဓာတ် တွေကျတာ”ဟု ရေပူကျေးရွာသူကြီးတစ်ဦးက ပြောသည်။
တိုက်ပွဲများပြင်းထန်နေသည့် လွိုင်ကော်မြို့အရှေ့ခြမ်း ပါလောင်းကျေးရွာစစ်ရှောင်စခန်းတွင် ကျောင်းတက်ချင်သော်လည်း မတက်နိုင်သဖြင့်စာရေးခဲ့သည့် စစ်ရှောင်ကလေးငယ်မရှဲမယ်ဆိုသူ ငါးတန်းကျောင်းသူ တစ်ဦးမိမိကိုယ် ကြိုးဆွဲချသေဆုံးမှု ဖြစ်ပွားခဲ့သည့်သတင်းက စစ်ရှောင်များအတွင်း ပျံ့နှံ့နေခဲ့သည်။
ယခု ၁၁ရွာမှ စစ်ရှောင် ၆၀၀၀ ကျော်တွင် စာသင်အရွယ် ကျောင်းသားကျောင်းသူ ၂၀၀၀ကျော်ရှိနေသည်ဟု သိရသည်။
“နိုင်သမျှတော့ ကူညီနေပေမယ့် အများကြီးလိုအပ်နေတယ်။ စား၊ ဝတ်၊ နေရေးသာမက စိတ်ဒဏ်ရာတွေရနေတဲ့ အထူးသဖြင့် သိတတ်စကလေးငယ်တွေ စိတ်ပိုင်းဖြေသိမ့်ရေး ပါ စစ်ရှောင်တွေလိုအပ်နေပြီ”ဟု စစ်ဘေးရှောင်များကို ကူညီနေသည့် အင်းလေးအမျိုးသမီးသမဂ္ဂမှ ကီကီ က ဆိုသည်။
စစ်ရှောင်များကို ပြည်သူများနှင့် တော်လှန်ရေးတပ်များမှ တတ်နိုင်သမျှ ကူညီထောက်ပံ့နေကြသော်လည်း စစ်ပွဲကြာလာသည်နှင့်အမျှ အကူညြီများ လျော့နည်းလာနေသဖြင့် စစ်ရှောင်များ ပိုမိုခက်ခဲလာနေကြခြင်းဖြစ်သည်။
#MeKongNews
#ညောင်ရွှေမြို့နယ်
#စစ်ဘေးရှောင်
#အင်းလေးဒေသ
#အကူအညီလိုအပ်
#ဘုရားတောင်ကျေးရွာ
