မဲခေါင်၊ ဇွန် ၈
တာချီလိတ်မြို့တွင် နေ့ခင်းဘက်အချိန် မကာဟိုခမ်းရပ်ကွက်ရှိ နေအိမ်တစ်အိမ်ရှေ့တွင် ရပ်ထားသည့် ဆိုင်ကယ်၂စီး ခိုးခံရကြောင်း ဒေသခံများထံကသိရသည်။
ဇွန်လ၇ရက်၊ နေ့ လယ်၃နာရီခန့်တွင် အိမ်ရှေ့တွင်ရပ်ထားသည့် ဆိုင်ကယ်၂စီးကို လူ၃ဦးမှ ခိုးယူသွားခြင်းဖြစ်ပြီး တစ်စီးမှာ ဇက်သော့ခတ်ထားပြီး တစ်စီးမှာ ဇက်သော့မခတ်ထားမိကြောင်း၊ ဆိုင်ကယ်ရပ်ထားပြီး ခဏလေးအတွင်း ခိုးယူခံရခြင်းဖြစ်ကြောင်း ခိုးယူခံရသူများနှင့် နီးစပ်သူတစ်ဦးက မဲခေါင်ကို ပြောသည်။
ခိုးယူခံရသည့် ဆိုက်ကယ်များ၏ ဖရိန်များကို မှတ်သားထားသဖြင့် ရောင်းမှား ဝယ်မှားမဖြစ်ရအောင် သတိပေးဖော်ပြထားသည်ဟု ဆိုသည်။
ဇွန်လ ၂ရက် မနက်၅နာရီခွဲခန့်ကလည်း ဝိန်းကျောက်ရပ်ကွက်၊ အာခါစျေးလမ်း နေအိမ်ရှေ့ သော့ခတ်ရပ်ထားသည့် ဆိုင်ကယ် အလစ်သုတ် ခိုးယူခံထားရသေးကြောင်း သိရသည်။ ခိုးယူခံရသည့်ဆိုင်ကယ်မှာ လိုင်စင်ရှိကြောင်း သိရသည်။
ခိုးယူခံရသည့် ဆိုင်ကယ်မှာ Honda Wave 110 ဖြူနီရောင် 24 W/55106 ဆိုင်ကယ်ဖြစ်ပြီး လိုင်စင်စာအုပ်လည်း ပါသွားကြောင်းသိရသည်။
ဇွန်၁ရက်နေ့ ညနေ ၅နာရီ ၂၀ မိနစ်ခန့်ကလည်း တာချီလိတ်မြို့၊ ဆန်ဆိုင်း(ခ)၊ ဟံသာဝတီ(၆)လမ်းရှိ နေအိမ်ဆိုင်ခန်းအတွင်း လူများရှိနေစဉ် ဆိုင်ကယ်ကို လူတစ်ဦးက ဝင်ရောက်ခိုးယူသွားခဲ့ကြောင်း သိရသည်။
မေလ ၃၁ရက်ကလည်း ပါလျံရပ်ကွက်၊ ဘုံကျောင်း အနီး အိမ်ခန်းတွင် ရပ်ထားသည့် ဆိုင်ကယ်ကို မီးမလာ၍ မီးမှောင်နေသည့် ည၈နာရီခွဲအချိန်ခန့်တွင် လူ၂ဦးမှ လာရောက်ခိုးယူသွားသည်ကို ပိုင်ရှင်မှ CCTV ရုပ်သံဖြင့် လူမှုကွန်ရက်တွင်
ဖော်ပြထားသည်။
#MeKongNews
#တာချီလိတ်
#ရှမ်းအရှေ့
#ဆိုင်ကယ်သူခိုး
#မကာဟိုခမ်းရပ်ကွက်
