မဲခေါင်၊ မေ ၃၁
စစ်ကိုင်းငလျင်ကြောင့် ထိခိုက်မှုများအတွက် ငလျင်ဒဏ်ပြန်လည်ထူထောင်ရေးချေးငွေအဖြစ် ကျပ်ဘီလီယံ ၇၀၀ကို ထုတ်ချေးပေးရန် ပြင်ဆင်နေပြီး ငလျင်ဘေးဒါဏ်သင့်ဒေသနှင့် ငလျင်ဘေးဒါဏ်မခံရသည့်ဒေသဟူ၍ ခွဲကာ အတိုးနှုန်း သက်မှတ်ပြီး ထုတ်ချေးရန် စီစဉ်နေကြောင်း စစ်ကောင်စီ ခေါင်းဆောင် မင်းအောင်လှိုင် က မေလ ၃၀ ရက်တွင် ပြောသည်။
Myanmar Narrative ဟု ခေါ်သည့် စစ်ကောင်စီလက်အောက်ခံ Think Tank အဖွဲ့က ဦးဆောင်ကျင်းပသည့် ငလျင်ဘေးအလွန် မြန်မာ့စီးပွားရေး ပြန်လည် ကုစားခြင်း နှင့် ပြန်လည်ထူထောင်ခြင်း သုံးသပ်ဆွေးနွေးပွဲတွင် ပြောဆိုခဲ့ခြင်း ဖြစ်သည်။
“ဘဏ္ဍာရေးနဲ့ ပက်သက်ပြီး ပုဂ္ဂလိက-အစိုးရ (မူရင်းအသုံးအနှုန်း) ပေါင်းပြီး ငွေချေးဖို့ ရှိပါတယ်။ ငလျင်ဒါဏ် သင့်တဲ့ ဒေသမှာ အတိုးနှုန်း တခု နဲ့ ငလျင်ဒါဏ် မသင့်တဲ့ ဒေသမှာ အတိုးနှုန်းဆိုပြီး လုပ်မလား စဉ်းစားနေတယ်” ဟု စစ်ကောင်စီခေါင်းဆောင် မင်းအောင်လှိုင်က ပြောသည်။
စစ်ကောင်စီ-ပုဂ္ဂလိ ပူးပေါင်းကာ ချေးငွေ ထုတ်ချေးပေးရာတွင် ပြန်လည်ထူထောင်ရေးအတွက် အတိုးနှုန်း (၁-၂) ရာခိုင်နှုန်း၊ Commerical အတွက် အတိုးနှုန်းကို တစ်မျိုး စဉ်းစားထားပြီး ငလျင်ဒါဏ် ဘေးသင့်သည့် ဒေသများတွင် သက်သာသည့်အတိုးနှုန်းဖြင့် ချေးပေးရန် စဉ်းစားထားကြောင်း၊ ငလျင်ဒါဏ် ဘေးသင့်တဲ့ ဒေသများ ပြန်လည်ကုစားရန်အတွက် ကနဦး ငွေကျပ်ဘီလီယံ ၃၀၀ သက်မှတ်ထားရာမှ ကျပ် ဘီလီယံ ၇၀၀ အထိ ချေးငွေ ပေးရန် ပြင်ဆင်ထားပြီး ဖြစ်ကြောင်း၊ ထို့အပြင် ကိုဗစ်ကြောင့် ထိခိုက်ရသည့် စီးပွားရေးပြန်လည်ကုစားရေး ရံပုံငွေ ကျပ် ၂၂၆ ဘီလီယံကျန်ရှိနေသေး၍ ထုတ်ချေးပေးမည်ဟုလည်း စစ်ခေါင်းဆောင်က ဆိုသည်။
ငလျင်ဒါဏ်သင့်သည့် ဒေသများအတွက် ပြန်လည်ကုစားရန်အတွက် ငွေကျပ် ဘီလီယံ ၇၀၀ ရှိပြီး စစ်ကောင်စီအနေနှင့် ထုတ်ပေးသွားမည် ဟု ပြောဆိုထားသော်လည်း မည်သည့်အချိန်တွင် ပေးမည်၊အတိုးနှုန်း နှင့် ချေးငွေ သက်တမ်းတို့ကို ပြောဆိုခြင်း မပြုခဲ့ပေ။
ချေးငွေပေးရန်အတွက် လိုအပ်သည့်ငွေကြေးများကို ငွေစက္ကူရိုက်ထုတ်ပါက ငွေကြေးဖောင်းပွမှုဖြစ်လာနိုင်သည့်အပေါ် စိုးရိမ်မှုများလည်းရှိသည်။
၂၀၂၅ ခုနှစ် မတ်လ ၂၈ ရက်နေ့က လှုပ်ခတ်ခဲ့သော ငလျင်ကြောင့် မန္တလေး၊စစ်ကိုင်း၊နေပြည်တော် နှင့် ရှမ်းတောင်ဒေသအပါအဝင် တိုင်းဒေသ ၊ပြည်နယ် ၁၀ ခုတွင် ထိခိုက်ခဲ့ပြီး ရပ်ကွက် စုစုပေါင်း ၃၇၄ ခု၊ကျေးရွာအုပ်စု ၉၄၄ ခု၊ကျေးရွာ ၂၀၈၁ ခု၊အိမ်ထောင်စု ၁၆၂၁၆၇ ခု နှင့် လူဦးရေ ငါးသိန်းကျော် ထိခိုက်ခဲ့ကြောင်း ထုတ်ပြန်ချက်များ အရ သိရသည်။
ငလျင်ကြောင့် ပျက်စီးဆုံးရှုံးရသည့် တန်ဖိုးမှာ ငွေကျပ် ၃၈၀၄ .၅၄၉ ဘီလီယံအထိ ရှိပြီး နိုင်ငံ စီးပွားရေးအတွက် အချက်အခြာကျသည့် မန္တလေးမှာ အကြီးအကျယ် ထိခိုက်ခဲ့ရသည် ဟု ဆိုထားသည်။
လက်ရှိအချိန်ထိ မန္တလေးမြို့တို့တွင် ပြန်လည်ထူထောင်ရေးလုပ်ငန်းစဉ်များ လုပ်ဆောင်နေသည်မှာ နှောင့်နှေးနေဆဲ ဖြစ်နေကာ လုပ်ငန်းများ လည်ပတ်နိုင်စွမ်း နည်းနေဆဲ ဟု ဒေသခံ တစ်ဦး က ပြောဆိုထားသည်။
ဖေသန်း
#MeKongNews
#စစ်ကိုင်းငလျင်
#ချေးငွေ
#စစ်ကောင်စီ
#မန္တလေး
