မဲခေါင်၊ မေ၂၉
စစ်ကောင်စီပြန်လည်ဝင်ရောက်လာပြီးနောက် ဒုစရိုက်မှုများ ပေါများလာသည့် လားရှိုးမြို့တွင် ယခုရက်ပိုင်းအတွင်း သေနတ်ပြလုယက်မှုများ ဆက်တိုက်ဖြစ်ပွားနေကြောင်း ဒေသခံများထံမှ သိသည်။
ယန့်မေလ ၂၉ ရက် နံနက်အစောပိုင်းတွင် လားရှိုးမြို့၊ ရပ်ကွက် ၅၊ အောင်မင်္ဂလာဈေးမှ ပြန်လာသည့်အမျိုးသမီးတစ်ဦးကို အနက်ရောင်ဝတ်စုံ ဝတ်ထားသည့် အမျိုးသား ၂ ဦးက ရှေ့မှပိတ်ရပ်ပြီး ဆွဲကြိုး၊ လက်စွပ် ၂ကွင်းနှင့်ဖုန်းကို လုယက်သွားကြောင်း သိရသည်။
“၂ ယောက်လုံးက အနက်ရောင်ဝတ်စုံဝတ်ထားတယ်။ တစ်ယောက်ကတော့ သေနတ်အတို ခါးမှာညှပ်ထားတယ်။ နောက်တစ်ယောက်တော့ သေနတ်မပါဘူး၊ ဓားတစ်လက်ပါတယ်။ ကျမ ဆွဲထားတဲ့ ဆွဲကြိုးဖြုတ်ပေးလိုက်ရတယ်။ လက်စွပ်နဲ့ ဖုန်းလဲပါသွားတယ်။ ပိုက်ဆံတော့ ၅ သောင်းလောက်ပဲ ပါသွားတယ်”ဟု လုယက်ခံရသူနှင့် နီးစပ်သူက ပြောသည်။
မေလ၂၈ရက်၊ နေ့လယ် ၁နာရီခွဲဝန်းကျင်ကလည်း ရပ်ကွက် ၁၂၊ ခိုလောင်း တရုတ်ကျောင်းလမ်းရှိ ကားဘော်ဒီရုံတွင် ပြုပြင်နေသည့် Landcruiser အနက်ရောင် တစ်စီးနှင့် Crown အဖြူရောင် တစ်စီးကို ကားတစ်စီးဖြင့် ရောက်လာသည့် လူ ၃ဦးက သေနတ်ကိုင်ခြိမ်းခြောက်ကာ လုယက်သွားသည်။
လုယက်ယူဆောင်သွားသည့် ကားများကို လေယာဥ်ကွင်းလမ်းမှ နမ္မတူဘက်အထွက် သို့ မောင်းပြေးသွားကြသည်ဟု ဖြစ်စဥ်ကို သေချာသိသူ တစ်ဦးက မဲခေါင်သို့ မေ၂၈ရက် ညနေပိုင်း တွင်ပြောသည်။
“မိတ်ဆွေတွေကားဗျ။ ဘော်ဒီရုံ မှာ ခဏလုပ်နေတုန်း ကားနဲ့ လာတာ၊ သေနတ်အတိုတွေနဲ့ အသက် ၃၀ ဝန်းကျင်တွေ၊ တရုတ်နဲ့တူတယ်။ အသားဖြူတယ်၊ ဗမာစကားပဲပြောတယ်။ သေနတ်နဲ့ချိန် သော့တောင်းပြီး တစ် ယောက်တစ်စီးမောင်းပြေးတာပဲ” ဟု ၎င်းက ပြောသည်။
ရဲစခန်းသို့ အကြောင်းကြားထားသော်လည်း ရဲများကိုယ်တိုင် အပြင်မထွက်ရဲသလို စစ်တပ်တွင်လည်း တိုင်းမှူးကအစ လားရှိူးတက္ကသိုလ်တွင်သာ ရှိနေပြီး မြို့လုံခြုံရေးအတွက် မည်သည့် အစီအမံမျှ လုပ်ဆောင်ပေးခြင်းကြောင်း၊ ယင်းကြောင့် ဓား ပြတိုက် လုယက်သူများက ရဲစခန်းရှေ့ဖုန်းဆိုင်ကို ဓားပြတိုက်သည်အထိ အတင့်ရဲနေ ကြောင်း မြို့နေလူထုက ဝေဖန်လျက်ရှိသည်။
“မနက်ပိုင်းကလည်း ရဲဝတ်စုံနဲ့ ဆိုင်ကယ်လုတာရှိတယ်။ ဟိုတလောကလည်း ရဲဝတ်စုံဝတ်တွေနဲ့ လုသွားတာရှိသေးတယ်။ အခုက အပြင်မှာ ရဲတွေ့ရင်တောင် ရဲအစစ်မဖြစ်နိုင်ဘူး။ ကျနော်တို့ကိုဘယ်သူကမှ အကာအကွယ်မပေးနိုင်လို့ အထူးသတိထား သွားလာနေထိုင်ကြရမှာပဲ” ဟု မြို့ခံတစ်ဦးက ပြောသည်။
ယင်းသို့ လုယက်မှုများ တောက်လျှောက်ဖြစ်ပွားနေသော်လည်း တစ်မှုမျှ ဖမ်းဆီးရမိမရှိသေးဘဲ ရဲများက ယာဥ်စည်းကမ်း၊ လမ်းစည်းကမ်းကို သာစပီကာဖြင့် လှည့်လည်သတိပေးလျက်ရှိကြောင်း ဒေသခံများက ပြောသည်။
စစ်ကောင်စီ လားရှိုးကို ပြန်လည်တာဝန်ယူသည့် ဧပြီလ၂၂ရက်မှ ယခုအထိ လုယက်သူများက ဓား၊ သေနတ်တို့ဖြင့်လမ်းပေါ်တွင် နေ့ခင်းကြောင် တောင်လုယက်နေသည်သာမက အိမ်အတွင်းထိ ဝင်ရောက် အကြမ်းဖက် လုယက်မှုများလည်း ရှိခဲ့ပြီး အမှုပေါင်း ၂၀ ကျော်ရှိခဲ့ပြီးဖြစ်သည်ဟု ဒေသခံများထံက သိရသည်။
မဟာ
#MeKongNews
#လားရှိုး
#လုယက်မှု
#စစ်ကောင်စီ
#အောင်မင်္ဂလာဈေး
