မဲခေါင်၊ မေ ၂၄

မိုင်းဆတ်မြို့အခြေစိုက် စကခ ၁၄ မှ ထုတ်ပေးထားသည့် ပြည်သူ့စစ်ကတ်ပြား ကိုင်ဆောင်ထားသူတစ်ဦး အပါအဝင် ရှမ်းပြည်မြောက်ပိုင်း၊ မူဆယ်မြို့ရှိ ရွှေဆိုင်တစ်ဆိုင်ကို ဓါးပြတိုက်ခဲ့သည့် အမျိုးသား ၂ ဦးကို ဖမ်းဆီးရမိကြောင်း ဒေသခံများထံက စုံစမ်းသိရသည်။

ပြီးခဲ့သည့် မေလ ၂၁ ရက်က မူဆယ်မြို့ စျေးရပ်ကွက်ရှိ ရွှေဆိုင်တစ်ဆိုင်ကို လက်နက်ကိုင်ကာ ဓါးပြတိုက်ခဲ့ခြင်းဖြစ်ပြီး ယင်းဓားပြမှုကို ပြည်သူ့စစ်အဖွဲ့ဝင်များ ဦးဆောင်ကျူးလွန်ခြင်းဖြစ်ကြောင်း၊ ကျူးလွန်သူ ၅ ဦးအနက် ၂ ဦးကို မေလ ၂၂ ရက်နေ့တွင် ဖမ်းဆီးရမိထားကြောင်း မူဆယ်ဒေသခံတစ်ဦးက မဲခေါင်သို့ ပြောသည်။

“ရွှေဆိုင် ဓါးပြတိုက်တာက ပြည်သူ့စစ် ၃ ဦးက ကင်းထောက်နဲ့ လုံခြုံရေးလုပ်ပေးပီး ပသစ(ပြည်သူ့စစ်) တယောက်ရဲ့ ညီနဲ့ အခြားအရပ်သားတစ်ယောက် ပေါင်းတိုက်ရာကနေ ဖမ်းမိတော့ အကုန်ပေါ်တဲ့ သဘောပါ။ ပုံပါ ချာတိတ်က ပသစတစ်ယောက်ရဲ့ ညီလို့ သိရပါတယ်။ ပသစ ကဒ်ကို ကိုင်ပြီးဝင်တဲ့ သဘောပါ” ဟု ယနေ့ မေလ ၂၄ ရက်မှာ မဲခေါင်သို့ ပြောသည်။

ပြည်သူ့စစ်ကတ်ကို ရှမ်းအရှေ့၊ မိုင်းဆတ်အခြေစိုက် စကခ ၁၄ က ထုတ်ပေးထားသော်လည်း မူဆယ်တွင် ရှေ့တန်းအဖြစ် အခြေပြုထားသည့် ပြည်သူ့စစ်ဖြစ်ကြောင်း၊ ဖမ်းဆီးရမိသူ၏ ပြည်သူ့စစ်ကတ်တွင် ရန်ကျားမူ ၂၀ နှစ်ဟု ဖော်ပြထားသလို သေနတ်မှာလည်း စစ်တပ်က ထုတ်ပေးထားသည့် သေနတ်ဖြစ်ကြောင်း သိရသည်။

ဖမ်းဆီးရသူနှင့်အတူ ပြည်သူ့စစ်သက်သေခံကတ်ပြား၊ ကျည်ဖြည့်ထားသည့် ပစ္စတိုသေနတ် တစ်လက်နှင့် ရွှေထည်အချို့ကို သိမ်းဆည်းရမိကြောင်း သိရသည်။

မူဆယ်မြို့ထဲတွင် တြိဂံဒေသတိုင်းစစ်ဌာနချုပ် လက်အောက် အမည်ခံပြည်သူ့စစ်အဖွဲ့များက အွန်လိုင်းဂိမ်းရုံ၊ ကာစီနိုလောင်းကစားဝိုင်း၊ KTV တို့ကို လုံခြုံရေးယူထားပေးနေသလို မြို့မပြည်သူ့စစ်ကဲ့သို့ ပြည်သူ့စစ်အဖွဲ့ပေါင်းများစွာမှလည်း ပြည့်တန်ဆာရုံမှအစ ဒုစရိုက်လုပ်ငန်းပေါင်းစုံ လုပ်ကိုင်နေကြောင်း စုံစမ်းသိရသည်။

မဟာ
#MeKongNews
#မူဆယ်မြို့
#ပြည်သူ့စစ်
#စကခ၁၄
#ရွှေဆိုင်ဓားပြတိုက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)