မဲခေါင်၊ မေ ၂၀
စစ်ကောင်စီတပ်သားများ အသေ၊ အပြေး ပြုန်းတီးမှုများနေသည့် ရှမ်းနှင့် ကရင်နီဒေသနယ်စပ်သို့ စစ်မှုထမ်းအပတ်စဥ် သင်တန်းဆင်းလူသစ် ၃၀၀ ကျော်ကို အင်အားဖြည့်ပို့ဆောင်နေကြောင်း အရှေ့ပိုင်းတိုင်းစစ်ဌာနချုပ်နှင့် နီးစပ်သည့် စစ်သတင်းအရင်းအမြစ်ထံမှ သိရသည်။
ယမန်နေ့ မေလ၁၉ရက် ညပိုင်းတွင် အောင်ပန်းအမြောက်တပ်၊ ဒရုန်းသင်တန်းဆင်းအဖွဲ့မှ တောင်ကြီးသို့ စစ်ယာဉ်တန်း ၂၀ ခန့် အင်အား အပြည့်ရောက်ရှိပြီး ရှမ်း-ကရင်နီနယ်စပ်သို့ ဆက်လက်ထွက်ခွာဖြစ်ကြောင်း၊ မေလ၁၇ရက်တွင်လည်း ပြီးခဲ့သည့် မေလ ၄ ရက်က သင်တန်းဆင်းထားသည့် စစ်မှုထမ်း အပတ်စဥ် ၁၀မှ လူသစ်များကို စစ်ယာဉ်တန်း ၉ စီး၊ မိုးကာအုပ် ၂ စီး၊ အင်အားအပြည့် ၅ စီး၊ အလွတ် ၂စီးဖြင့် ရေယားကို ဖြတ်ပြီး လွိုင်ကော်ဘက်သို့ အင်အားဖြည့်ပို့ဆောင်ခဲ့ကြောင်း သတင်းအရင်းအမြစ်တစ်ဦးက ပြောသည်။
“နောင်တရားဆေးရုံကို ရောက်တာအများကြီး။ ၂၀ ကျော် အဲဒီမှာဘဲ သင်္ဂြိုလ်တယ်။ အောင်ပန်းကိုလည်းပို့တာ အမတ ၃၅၇ နဲ့ ခမရ ၅၀၆ က သေတာတွေ ရှိတယ်။ အဲဆေးရုံကခေါင်းပေါင်း ဗိုလ်မှူးချုပ်စောရန်နိင် ကိုယ်တိုင်မသာချနေတယ်။ မေဂျာ တစ်ယောက်လည်း ကျောနဲ့ တင်ပါးထိလို့ အရေးကြီးခန်းမှာ” ဟု ၎င်းက ပြောသည်။
ရှမ်း-ကရင်နီ နယ်စပ် ညောင်ရွှေနှင့် မိုးဗြဲမြို့နယ် အနီးတဝိုက်တွင် စစ်ကောင်စီက PNO ပြည်သူ့စစ်နှင့်ပူးပေါင်းကာ မိုးဗြဲမြို့တွင်းစစ်ကြောင်း၊ မိုးဗြဲကုန်းသာစစ်ကြောင်း နှင့် ဖယ်ခုံမြို့နယ်နှင့် ညောင်ရွေမြို့နယ်စပ် စစ်ကြောင်းဟူ၍ စစ်ကြောင်း ၃ကြောင်းဖြင့် ထိုးစစ်ဆင်နေပြီး တော်လှန်ရေးတပ်ဖွဲ့များကလည်း ခုခံလျက်ရှိသည်။
စစ်ကောင်စီ၏ စစ်ကြောင်းများမှာ ယနေ့တွင်တပ်မ၂၂ လက်အောက်ခံ ၂ရင်းမှ ရှေ့တန်း ပူးပေါင်းစစ်ကြောင်းဖြင့် လည်းကောင်း၊ ဒိုးထီးရီ ရွာဘက်တွင် ရတစက ၁ နှင့် တပ်ခွဲတစ်ခွဲအပါအဝင် ဒရုန်းကင်းထောက်အဖွဲ့ဖြင့်လည်ကောင်း ကင်းထောက်နေကြောင်း ဒေသခံသတင်းရင်းမြစ်များထံမှ သိရသည်။
မေလ၆ ရက်မှ ၁၅ရက်အတွင်း PNO ပြည်သူ့စစ်ပူးပေါင်း အင်အား၆၀၀ဖြင့်ထိုးသည့် စစ်ကြောင်းများတွင် သေဆုံး ၂၃ ဦး၊ အလင်းဝင်သူ ၁၆ဦးနှင့် ဖမ်းဆီးမိသူ ၃ ဦးရှိခဲ့ကြောင်း ရှမ်းတောင်တော်လှန်ရေးတပ်များက ထုတ်ပြန်ထားသည်။
စစ်ကောင်စီသည် အကြောင်းအမျိုးမျိုးဖြင့် လျော့နည်းနေသည့်အင်အားကို ဖြည့်တင်းရန် လေ့ကျင့်ရေးတပ် ၂၅တပ်တွင် စစ်မှုထမ်းတစ်ပတ်စဥ်လျင် အင်အား ၅၀၀၀ နှုန်းဖြင့် သင်တန်းပေးကာလ ၁၀ပတ်မှ ၁၂ ပတ်အထိ သင်တန်းပေးလျက်ရှိရာ လက်ရှိ အပတ်စဥ် ၁၂ အထိ ရောက်ရှိနေသည်ဟု မြန်မာ့စစ်ဘက်ရေးရာနှင့်လုံခြုံရေးဆိုင်ရာ လေ့လာရေးအဖွဲ့ MDSI ၏ ယခုမေလအတွင်း ထုတ်ပြန်ချက်တွင် ပါရှိသည်။
စစ်ကောင်စီ၏ မေလ ၁၇ရက်က ပြုလုပ်သည့်စစ်ရုံးချုပ် အစည်းအဝေးအရ ကရင်နီနယ်မြေ၊ တောင်ပိုင်းတိုင်းစစ်ဌာနချုပ်နယ်မြေ၊ စစ်ကိုင်းတိုင်း၊မြစ်ဝကျွန်းပေါ်နှင့် မန္တလေးတိုင်းတို့တွင် ကြည်း၊ လေ နှစ်သွယ်ဖြင့် တပြိုင်နက်တည်း တိုက်စစ်အရှိန်မြှင့်မည့် အခြေအနေရှိကြောင်း MDSI က သုံးသပ်ထားသည်။
မဟာ
#MeKongNews
#စစ်ကောင်စီ
#စစ်မှုထမ်းလူသစ်
#ရှမ်းတောင်
#ကရင်နီ
#အင်အားဖြည့်
