မဲခေါင်၊ မေ ၂၀
TNLA ဦးဆောင်သည့် တော်လှန်ရေးတပ်များနှင့် စစ်ကောင်စီတပ်တို့ ၂ဖက် တိုက်ပွဲရပ်တန့်ထားသည့် နောင်ချိုမြို့နယ်၊ တောင်ခမ်းဒေသတွင် အမြောက်စခန်းမှ စစ်ကောင်စီတပ်ဖွဲ့ဝင်များမှ ထိုးစစ်ပြန်လည်စတင်ရန် ပြင်ဆင်မှုများပြုလုပ်နေကြောင်း တော်လှန်ရေးတပ်များက ပြောသည်။
တောင်ခမ်းဒေသတွင် စစ်ရေးတင်းမာနေသော်လည်း ၂ဖက်တိုက်ပွဲရပ်တန့်ထားသည်မှာ အတော်ကြာပြီဖြစ်ပြီး စစ်ကောင်စီမှလက်နက်ကြီး ပစ်ခတ်ခြင်းသာရှိကြောင်း၊ ယခုအခါထိုးစစ်ပြန်စရန် စစ်ကောင်စီဘက်မှ ပြင်ဆင်နေပြီး တော်လှန်ရေးတပ်ဖွဲ့များဘက်မှလည်း စစ်ကောင်စီအား ရင်ဆိုင်ရန်ပြင်ဆင်ထားကြောင်း တောင်ခမ်းရှိ PDF သတင်းအရင်းမြစ်ကမဲခေါင်ကိုပြောသည်။
“စစ်တပ်က ထိုးစစ်ပြင်ဆင်နေတာ ဟုတ်တယ်။ အခြေအနေကတော့ ပိတ်ကားပေါ်မှာ စောင့်ကြည့်ရမှာပဲ။ ကျနော်တို့ဘက်ကလည်း ပြင်ဆင်ထားပါတယ်” ဟု ၎င်းကဆိုသည်။
စစ်ကောင်စီမှ စစ်ရေးပြင်ဆင်မှုများတွင် ရိက္ခာပို့ဆောင်ခြင်းနှင့် ခဲယမ်းဖြည့်တင်းခြင်းများ ပါဝင်ကြောင်း သိရသည်။
စစ်ကောင်စီမှ လက်ရှိတွင် တောင်ခမ်း၊ အုမ္မတီး၊ အုမ္မခါး၊ ကံကော်၊ တောင်ခမ်း၊ မဲပုတ်၊ နောင်လင်နှင့် ယခင်နေရာများတွင်သာရှိနေပြီး အချိန်မရွေး တိုက်ပွဲထဖြစ်နိုင်သော အခြေအနေကို ရင်ဆိုင်ထားရကြောင်း နောက်ထပ် PDF အရင်းအမြစ်တစ်ဦးက မဲခေါင်ကိုပြောသည်။
ပြီးခဲ့သည့်နှစ်လယ်ပိုင်းမှစတင်ကာ တောင်ခမ်းအခြေစိုက် စစ်ကောင်စီ၏ အမှတ် ၉၀၂ အမြောက်စခန်းနှင့် အခြေစိုက်စခန်းများအား သိမ်းပိုက်နိုင်ရန် TNLA ဦးဆောင်သော တော်လှန်ရေးတပ်များမှ ထိုးစစ်များပြုလုပ်ခဲ့ပြီး လက်ရှိအချိန်အထိ သိမ်းပိုက်နိုင်ခြင်း မရှိသေးပေ။
စစ်ကောင်စီ၏ တောင်ခမ်းစစ်စခန်းသို့ ကျောက်ဂူ-နမ့်လန်လမ်းပိုင်းမှတဆင့် ယခုနှစ်အစပိုင်းမှစတင်ကာ ကားလမ်းမှရိက္ခာပို့ဆောင်နိုင်ရန် လမ်းကြောင်းစတင်ခဲ့ပြီး လက်ရှိအချိန်အထိ ၎င်းလမ်းပိုင်းအား အသုံးပြုနေသည်။
ဂနိုက်
#MeKongNews
#တောင်ခမ်း
#TNLA
#စစ်ကောင်စီ
#နောင်ချို
